(फोटो सौजन्य- सोशल मीडिया)
‘देवघर ऑन रेंट’ हा चित्रपट २५ सप्टेंबर २०२६ रोजी महाराष्ट्रासह बेळगाव, हैदराबाद, इंदूर आणि बडोदा येथे प्रदर्शित होणार आहे. चित्रपटात आध्यात्माची वर्तमानाशी सांगड घालताना त्याला नाट्य आणि दमदार अॅक्शनची जोड देण्यात आली आहे.
टिझरच्या सुरुवातीपासूनच एक रहस्यमय वातावरण निर्माण होतं. मंदिरासारखी वास्तू, पोलिसांची धावपळ, संशयास्पद हालचाली, रक्ताने माखलेलं शस्त्र आणि तणावपूर्ण प्रसंग यामुळे ही केवळ आध्यात्मिक कथा नसून त्यात रहस्य आणि अॅक्शनचाही मोठा भाग असल्याचं जाणवतं.
काही पात्रांच्या चेहऱ्यावरील तणाव आणि भावनिक संघर्षही टिझरमध्ये ठळकपणे समोर येतो. त्यामुळे देव, श्रद्धा आणि मानवी कर्म याभोवती फिरणाऱ्या या कथेत नेमकं कोणतं गूढ दडलं आहे, याची उत्सुकता निर्माण होते.
‘कर्म काहीही असो, सगळ्या वाटा देवाच्या दारात जातात’ या विचाराभोवती चित्रपटाची कथा गुंफलेली असल्याची झलक मिळते. ‘विचार आणि अविचाराच्या उंबरठ्यावरची गोष्ट’ अशी या चित्रपटाची ओळख करून देण्यात आली आहे.
दाक्षिणात्य अॅक्शनचीही जोड
‘देवघर ऑन रेंट’मध्ये मराठी कलाकारांसोबत दाक्षिणात्य कलाकार आणि तंत्रज्ञांचाही सहभाग आहे. ‘KGF’ फेम अभिनेता गरुडा राम आणि श्रवण राघवेंद्र महत्त्वाच्या भूमिकांमध्ये दिसणार आहेत. विशेष म्हणजे चित्रपटातील अॅक्शनची जबाबदारी दाक्षिणात्य अॅक्शन मास्टर कार्तिक डंगरी यांनी सांभाळली आहे. त्यामुळे मराठी कथेला दाक्षिणात्य शैलीतील अॅक्शनची भव्य जोड मिळणार आहे.
या चित्रपटात निखिल चव्हाण, अंकित मोहन, भाऊ कदम, शशांक शेंडे, अश्विनी चवरे, वैभव चव्हाण, सुरेश विश्वकर्मा, अनिल नगरकर, सिद्धेश्वर झाडबुके आणि गौतमी पाटील यांच्या भूमिका आहेत. गरुडा राम आणि श्रवण राघवेंद्र हे दाक्षिणात्य कलाकारही महत्त्वाच्या व्यक्तिरेखांमध्ये दिसणार आहेत.
स्वरूप सावंत यांचं दिग्दर्शन
आनंदी पिक्चर्स अमरावती प्रस्तुत आणि राधाकृष्ण प्रोडक्शन निर्मित या चित्रपटाची निर्मिती सचिन रोडे पाटील आणि पूनम चौधरी पाटील यांनी केली आहे. दिग्दर्शनाची जबाबदारी स्वरूप सावंत यांनी सांभाळली असून, चित्रपटाची संकल्पना पूनम चौधरी पाटील यांची आहे. कथा, पटकथा आणि संवाद संजय नवगिरे यांनी लिहिले आहेत.
चित्रपटाच्या तांत्रिक बाजूची जबाबदारीही अनुभवी टीमने सांभाळली आहे. चैतन्य साळुंखे यांनी सिनेमॅटोग्राफी, रोहित नागभीडे यांनी पार्श्वसंगीत, दिलीप कंधारे यांनी कला दिग्दर्शन आणि किशोर दळवी यांनी कोरिओग्राफी केली आहे. संगीतकार एस. सागर आणि कबीर शाक्य यांनी चित्रपटातील गीतांना संगीत दिलं आहे.
OTT Release: या आठवड्यात OTTवर होणार मनोरंजनाचा ‘घमासान’; ‘सिरफिरे’ही घेऊन येणार क्रांतीची मशाल!
२५ सप्टेंबरला चित्रपटगृहात
अध्यात्म, रहस्य, नाट्य आणि अॅक्शन यांचा अनोखा मेळ साधणारा ‘देवघर ऑन रेंट’ प्रदर्शनापूर्वीच चर्चेत आला आहे. टिझरमधील गूढ वातावरणामुळे चित्रपटाची कथा नेमकी कोणतं रहस्य उलगडणार, याची उत्सुकता आता वाढली आहे. हा चित्रपट २५ सप्टेंबर २०२६ रोजी महाराष्ट्रासह बेळगाव, हैदराबाद, इंदूर आणि बडोदा येथे प्रेक्षकांच्या भेटीला येणार आहे.
.png "Videos"){kind=small}
