मंगळवार, 3 नोव्हेंबर 2026
(फोटो सौजन्य- सोशल मीडिया)
Tusshar Kapoor: बॉलिवूडमध्ये सेलिब्रिटींना धमकीचे फोन येण्याचे सत्र सुरूच आहे. अभिनेता तुषार कपूरलाही ५ कोटी रुपयांची खंडणी मागणारा धमकीचा फोन आल्याने खळबळ उडाली होती. फोन करणाऱ्या व्यक्तीने स्वतःची ओळख लॉरेन्स बिश्नोई गँगचा सदस्य अशी करून दिली होती. मात्र, मुंबई पोलिसांच्या प्राथमिक तपासात या धमकीच्या कॉलमधील आवाज आणि हॅरी बॉक्सरच्या मूळ ऑडिओ सॅम्पलमध्ये साम्य नसल्याचे समोर आले आहे. त्यामुळे हा कॉल बनावट असण्याचा संशय पोलिसांनी व्यक्त केला आहे.
मिळालेल्या माहितीनुसार, हॅरी बॉक्सर नावाच्या व्यक्तीने तुषार कपूरला धमकीचा फोन करून ५ कोटी रुपयांची खंडणी मागितली होती. या कॉलमध्ये संबंधित व्यक्तीने आपण लॉरेन्स बिश्नोई गँगशी संबंधित असल्याचे सांगितले होते. या धमकीच्या फोनचे ऑडिओ रेकॉर्डिंग तपासासाठी महत्त्वाचे ठरले आहे.
तुषार कपूरने या घटनेची माहिती तातडीने मुंबई पोलिसांना दिली. प्रकरणाचे गांभीर्य लक्षात घेऊन पोलिसांनी तपास सुरू केला असून, त्याची जबाबदारी खंडणीविरोधी पथक आणि गुन्हे शाखेकडे सोपवण्यात आली.
ऑडिओ सॅम्पलची जुळवणी केली, पण…
मुंबई पोलिसांच्या गुन्हे शाखेच्या तांत्रिक पथकाने तुषार कपूरला मिळालेल्या धमकीच्या कॉलमधील आवाजाची तपासणी केली. तसेच, हा आवाज त्यांच्या डेटाबेसमध्ये उपलब्ध असलेल्या हॅरी बॉक्सरच्या मूळ ऑडिओ सॅम्पलशी जुळवून पाहण्यात आला.
मात्र, दोन्ही ऑडिओ सॅम्पल्समध्ये साम्य आढळले नसल्याची माहिती पोलिसांच्या वरिष्ठ अधिकाऱ्यांनी दिल्याचे समजते. त्यामुळे प्राथमिक तपासात हा धमकीचा कॉल बनावट असण्याची शक्यता व्यक्त केली जात आहे. बिश्नोई गँगचे नाव वापरून दहशत निर्माण करण्याचा प्रयत्न एखाद्या उपद्रवी व्यक्तीने केला असावा, असा पोलिसांना संशय आहे.
सध्या मुंबई पोलीस धमकीचा ऑडिओ पाठवणाऱ्या व्यक्तीचा शोध घेत आहेत. या प्रकरणामागे एखाद्या व्यक्तीचा हात आहे की संघटित टोळीचा सहभाग आहे, याचा तपास सुरू आहे. ऑडिओ रेकॉर्डिंग आणि इतर तांत्रिक पुराव्यांच्या आधारे पोलीस पुढील तपास करत आहेत.
दरम्यान, तुषार कपूर हा बॉलिवूडमधील प्रसिद्ध कपूर कुटुंबातील सदस्य आहे. तो ज्येष्ठ अभिनेते जितेंद्र आणि निर्मात्या शोभा कपूर यांचा मुलगा आहे. त्याची बहीण एकता कपूर ही हिंदी चित्रपट आणि दूरचित्रवाणी क्षेत्रातील प्रसिद्ध निर्माती आहे.
