( फोटो सौजन्य- सोशल मीडिया)
Govinda Video:बॉलिवूड अभिनेता गोविंदा गेल्या काही दिवसांपासून त्याच्या वैयक्तिक आयुष्यामुळे चर्चेत आहे. पत्नी सुनीता आहुजासोबत सुरू असलेल्या वैवाहिक वादाच्या पार्श्वभूमीवर आता गोविंदा मुंबईतील एका रुग्णालयातून बाहेर पडताना दिसला. त्याचा व्हिडिओ सोशल मीडियावर समोर आला असून, अभिनेत्याला पाहून चाहत्यांनी चिंता व्यक्त केली आहे.
व्हिडिओमध्ये गोविंदा पांढरा शर्ट आणि निळी जीन्स अशा कॅज्युअल लूकमध्ये दिसत आहे. त्याने चेहऱ्यावर मास्क लावला होता. रुग्णालयातून बाहेर आल्यानंतर पापाराझींनी त्याच्या तब्येतीची विचारपूस केली. त्यावर गोविंदाने “मी ठीक आहे” असं उत्तर दिलं. यानंतर त्याने कॅमेऱ्याकडे हात हलवला आणि आपल्या गाडीतून निघून गेला.
गोविंदा आणि सुनीता आहुजा यांच्यातील वैवाहिक वादाला गेल्या काही दिवसांत नवं वळण मिळालं आहे. सुनीताने अलीकडेच गोविंदा अभिनेत्री कोमल राणी स्वर्णकारसोबत लग्न करण्याची योजना आखत असल्याचा दावा केला होता. यामुळे दोघांच्या नात्याबाबत पुन्हा चर्चा सुरू झाली.
सुनीताने गोविंदाविरोधातील घटस्फोटाची याचिका मागे घेतल्याचंही समोर आलं. यामागे गोविंदा आणि कोमल लग्न करणार असल्याचं कारण असल्याचा दावा तिने केला.
मात्र, गोविंदाचे मॅनेजर शशी सिन्हा यांनी सुनीताचे हे दावे स्पष्टपणे फेटाळून लावले आहेत. ‘इंडिया टुडे’ला दिलेल्या मुलाखतीत त्यांनी गोविंदाच्या दुसऱ्या लग्नाबाबत कोणतीही योजना नसल्याचे सांगितले.
शशी सिन्हा म्हणाले, “असं काहीही नाही आणि असणारही नाही. दुसरं लग्न झालेलं नाही. ती त्याची पत्नी आहे.” सुनीताच्या मनात काही विचार असल्यामुळे ती असे दावे करत असावी, असंही त्यांनी म्हटलं.
दरम्यान, अभिनेत्री राखी सावंतसोबत फोनवर झालेल्या संभाषणात सुनीताने आपल्या घटस्फोटाच्या याचिकेबाबत भाष्य केलं. गोविंदा आणि कोमल लग्नाची योजना आखत असल्यामुळे आपण घटस्फोटाचा खटला मागे घेतल्याचा दावा तिने केला.
सुनीताने म्हटलं, “मी काल घटस्फोटाचा खटला मागे घेतला कारण ते लग्नाची योजना आखत होते.”
मात्र, गोविंदाच्या टीमने दुसऱ्या लग्नाच्या कोणत्याही योजना नसल्याचं स्पष्ट केलं आहे. त्यामुळे सुनीता आणि गोविंदामधील वैवाहिक वादावरून पुन्हा एकदा चर्चांना उधाण आलं आहे.
दरम्यान, गोविंदा लवकरच ‘रूपा’ या सिनेमातून प्रेक्षकांच्या भेटीला येणार असल्याची माहिती आहे. या चित्रपटात त्याच्यासोबत कोमल राणी स्वर्णकार प्रमुख भूमिकेत दिसणार आहे.
.png "Videos"){kind=small}
