शनिवार, 7 नोव्हेंबर 2026
( फोटो सौजन्य- सोशल मिडिया)
Katrina Kaif Body Shaming: अंबानी कुटुंबाच्या गणेश चतुर्थीच्या सेलिब्रेशनला बॉलिवूडमधील अनेक कलाकारांनी हजेरी लावली. अभिनेत्री कतरिना कैफदेखील पती विक्की कौशलसोबत या सोहळ्यात सहभागी झाली होती. या कार्यक्रमातील कतरिनाचे फोटो सोशल मीडियावर व्हायरल झाले. मात्र, काही नेटकऱ्यांनी तिच्या लूकवर आणि वजनावरून कमेंट्स करत तिला ट्रोल करण्यास सुरुवात केली. आता कतरिनाच्या ट्रोलिंगवर अभिनेत्री सोमी अली ने संताप व्यक्त केला आहे.
कतरिनाला तिच्या वजनावरून ट्रोल करणाऱ्यांना सोमी अली यांनी सडेतोड उत्तर दिलं आहे. तिने आपल्या इन्स्टाग्राम अकाउंटवर कतरिना आणि विक्की कौशलचा अंबानींच्या कार्यक्रमातील फोटो शेअर करत एक लांबलचक पोस्ट लिहिली.
सोमी अलीने लिहिलं, ‘कुठल्याही महिलेचं शरीर ही सार्वजनिक मालमत्ता नाही. आई होण्याचा अर्थ असा अजिबात नाही की लोकांनी तिच्या शरीरावर टिप्पणी करावी.’
सोमी अली ने पुढे महिलांच्या शरीरावर कमेंट करणाऱ्यांना सुनावलं. त्यांच्या म्हणण्यानुसार, एका महिलेने या जगात नव्या जीवाला जन्म दिला आहे, त्यामुळे ती थट्टेची नाही तर सन्मानाची हकदार आहे.
स्क्रीनच्या मागे लपून महिलांच्या शरीराची खिल्ली उडवणाऱ्यांना त्यांच्या शरीराशी काहीही देणंघेणं नसल्याचंही सोमी यांनी म्हटलं. महिलेचं काम, तिचं कौशल्य आणि तिची माणुसकी याकडे लक्ष दिलं पाहिजे, असं त्यांनी सांगितलं.
View this post on Instagram
‘बाळाच्या जन्मानंतर शरीरासाठी माफी मागण्याची गरज नाही’
सोमी अली ने आपल्या पोस्टमध्ये मातृत्वानंतर होणाऱ्या शारीरिक बदलांवरही भाष्य केलं. बाळाच्या जन्मानंतर महिलेचं शरीर जसं असेल, त्यासाठी तिने माफी मागण्याची गरज नाही. हे शरीर तिच्या ताकदीचं, बदलाचं आणि मातृत्वाचं प्रतीक असल्याचं त्यांनी म्हटलं.
‘सुंदरतेचा कोणताही एक आकार किंवा ठरावीक कालावधी नसतो. एखाद्या महिलेची किंमत तिचं शरीर इतरांच्या अपेक्षांनुसार किती आहे, यावर ठरत नाही,’ असा संदेश सोमी अली यांनी दिला.
कतरिनाच्या ट्रोलिंगनंतर तिचे चाहतेही अभिनेत्रीच्या समर्थनार्थ पुढे आले. काही युजर्सनी कतरिनाच्या वाढत्या वयाचा आणि मातृत्वानंतर शरीरात होणाऱ्या नैसर्गिक बदलांचा उल्लेख करत ट्रोलर्सना उत्तर दिलं.
एका युजरने म्हटलं की, ती ४० वर्षांची आहे, २० वर्षांची नाही. वय आणि मातृत्वामुळे महिलेच्या शरीरात बदल होतात. तर आणखी एका चाहत्याने कतरिना आजही तितकीच सुंदर असल्याचं म्हणत, तिने इतरांच्या सौंदर्याच्या मापदंडांमध्ये बसण्याची गरज नसल्याचं म्हटलं.
दरम्यान, कतरिना कैफ आणि विक्की कौशल यांनी ७ नोव्हेंबर २०२५ रोजी आपल्या मुलाचं स्वागत केलं होतं. आई झाल्यानंतर कतरिना पहिल्यांदाच अशा सार्वजनिक कार्यक्रमात दिसल्याने तिचे फोटो चर्चेत आले. मात्र, तिच्या लूकवर टीका करण्याऐवजी मातृत्वाचा सन्मान करावा, असा संदेश सोमी अली यांच्या पोस्टमधून देण्यात आला आहे.
