(फोटो सौजन्य - सोशल मीडिया)
Ketaki Mategaonkar: जन्माष्टमीच्या निमित्ताने गायिका आणि संगीतकार केतकी माटेगावकरने चाहत्यांसाठी खास संगीतभेट आणली आहे. ‘कृष्णार्पण सिरीज’च्या माध्यमातून केतकी भक्ती, संगीत आणि सर्जनशीलतेचा सुंदर संगम घडवून आणणार आहे. भगवान श्रीकृष्णाला समर्पित या विशेष मालिकेत एकूण पाच संगीत अर्पणे सादर केली जाणार असून, त्यामध्ये तीन निवडक कव्हर गाण्यांसोबत एका ओरिजिनल रचनेचाही समावेश आहे.
केतकी माटेगावकरच्या याआधीच्या भक्तिसंगीत प्रकल्पाला प्रेक्षकांचा भरभरून प्रतिसाद मिळाला होता. तिच्या ‘रामार्पण सिरीज’ला लाखो व्ह्यूज मिळाले आणि या माध्यमातून देशभरातील प्रेक्षकांशी तिचं नातं आणखी घट्ट झालं. याच यशानंतर आता केतकीने ‘कृष्णार्पण सिरीज’च्या माध्यमातून भक्तिसंगीताचा प्रवास पुढे नेण्याचा निर्णय घेतला आहे.
या मालिकेत लोकप्रिय आणि परिचित भक्तिगीतांना केतकी आपल्या खास गायकीच्या शैलीत नव्याने सादर करणार आहे. त्यामुळे या कव्हर गाण्यांना तिच्या आवाजाची वेगळी छटा मिळणार आहे. त्यासोबतच सिरीजमधील ओरिजिनल रचनेतून तिच्या वैयक्तिक संगीतविचारांची आणि भावविश्वाची झलक प्रेक्षकांना अनुभवता येणार आहे.
गायनासोबतच संगीत रचना आणि संगीतमय कथनाच्या क्षेत्रातही केतकीने स्वतःची वेगळी ओळख निर्माण केली आहे. *‘कृष्णार्पण सिरीज’*मधून तिच्या या बहुआयामी प्रतिभेचं दर्शन घडणार आहे.
कव्हर गाण्यांमधून लोकप्रिय भक्तिसंगीताला स्वतःच्या शैलीत सादर करताना, तर ओरिजिनल रचनेतून स्वतःच्या भावना व्यक्त करताना केतकीचा कलाकार म्हणून झालेला प्रवास अधोरेखित होतो. पारंपरिक भक्तिसंगीताला आधुनिक संगीत संयोजनाची जोड देण्याचा प्रयत्नही या मालिकेत पाहायला मिळणार आहे.
या सिरीजमधील शेवटचं रिलीज होणारं गाणं ‘मनमोहन कृष्णा’ हे केतकी माटेगावकर ने स्वतः रचलेलं ओरिजिनल गाणं आहे. हे गाणं आपल्या मनाच्या खूप जवळचं असल्याचं केतकीने सांगितलं आहे.
जन्माष्टमीच्या या खास उपक्रमाबद्दल बोलताना केतकी म्हणाली, “जन्माष्टमीची ऊर्जा खूपच वेगळी असते, कारण या सणामध्ये भक्ती, उत्सव आणि संगीत या तिन्ही भावनांचा सुंदर संगम असतो. यावर्षी माझी ही संगीतभेटही याच सर्व भावनांचे प्रतिबिंब असावी, अशी माझी इच्छा होती.”
“कव्हर गाणी माझ्या शैलीतून नव्याने सादर करण्याची संधी मिळाली”
पुढे केतकी म्हणाली, “लोकांना आधीपासून आवडणारी गाणी कव्हर करताना मला ती माझ्या शैलीतून नव्याने सादर करण्याची संधी मिळाली, तर ओरिजिनल गाण्यांमधून कृष्णाबद्दलच्या माझ्या भावना आणि संगीतविषयक जाणिवा अधिक वैयक्तिक पद्धतीने व्यक्त करता आल्या.”
‘मनमोहन कृष्णा’ या ओरिजिनल गाण्याबद्दल बोलताना ती म्हणाली, “हे गाणे माझ्या मनाच्या खूप जवळचे आहे आणि प्रत्येक गाण्याशी श्रोते कशा प्रकारे जोडले जातील, याची मला खूप उत्सुकता आहे.”
भक्तिसंगीताला डिजिटल माध्यमांवर तरुण प्रेक्षकांकडूनही मोठा प्रतिसाद मिळत असताना, ‘कृष्णार्पण सिरीज’च्या माध्यमातून केतकी माटेगावकर पारंपरिक भक्तीभावाला आधुनिक संगीताची जोड देत आपला हा सुरेल प्रवास पुढे नेत आहे. जन्माष्टमीच्या निमित्ताने तिची ही संगीतभेट रसिकांसाठी नक्कीच खास ठरणार आहे.
.png "Videos"){kind=small}
