(फोटो सौजन्य- सोशल मीडिया)
Aali Mothi Shahani Movie: हृता दुर्गुळे चा ‘आली मोठी शहाणी’ हा मराठी चित्रपट त्याच्या वेगळ्या कथानकामुळे चर्चेत आहे. चित्रपटातील हृता दुर्गुळे आणि सारंग साठ्ये या जोडीला प्रेक्षकांची पसंती मिळत असून, आता या जोडीची धमाल केमिस्ट्री नव्या गाण्यात पाहायला मिळत आहे. चित्रपटातील ‘बोनिता बोनिता’ हे गाणं नुकतंच प्रदर्शित झालं असून, यात हृता आणि सारंगचा बिनधास्त अंदाज पाहायला मिळत आहे.
‘बोनिता बोनिता’ या गाण्यात हृता दुर्गुळे आणि सारंग साठ्ये एकत्र थिरकताना दिसत आहेत. दोघांची एनर्जी, डान्स मूव्ह्ज आणि गाण्याचा उत्साही मूड यामुळे हे गाणं लक्ष वेधून घेत आहे. हृता आणि सारंगची ऑनस्क्रीन जुगलबंदी गाण्याला आणखी रंगत आणताना दिसते.
या गाण्याला सिद्धांत भोसले आणि केतकी माटेगावकर यांचा आवाज लाभला आहे. गाण्याचे शब्द गुरू ठाकूर यांनी लिहिले असून, पंकज पडघण यांनी संगीत दिलं आहे. गाण्याचा ठेका आणि गायकांच्या आवाजातील सहजता यामुळे ‘बोनिता बोनिता’चा मूड अधिक खुलतो.
‘तरुणाईला आवडेल असा फ्रेश मूड ठेवण्याचा प्रयत्न’
संगीतकार पंकज पडघण यांनी गाण्याबद्दल बोलताना सांगितलं की, ‘बोनिता बोनिता’ तयार करताना आजच्या तरुणाईला आवडेल असा फ्रेश, मोकळा आणि एनर्जेटिक मूड ठेवण्याचा प्रयत्न करण्यात आला. सिद्धांत आणि केतकीच्या आवाजामुळे गाण्याला हवा असलेला चार्म मिळाल्याचंही त्यांनी सांगितलं.
दिग्दर्शक आनंद दिलीप गोखले यांच्या मते, हे गाणं चित्रपटात फ्रेश आणि उत्साही मूड घेऊन येतं. हृता आणि सारंगची जोडी या गाण्यासाठी योग्य वाटली असून, दोघांनीही डान्स आणि गाण्याची एनर्जी सहजपणे पकडल्याचं त्यांनी सांगितलं. गाण्याच्या शूटिंगदरम्यानचा त्यांचा उत्साह पडद्यावरही दिसत असल्याचं दिग्दर्शकांनी नमूद केलं.
२ ऑक्टोबरला चित्रपटगृहात दाखल होणार सिनेमा
निर्मात्या श्रुती साठे आणि ईशा मुठे यांनीही ‘बोनिता बोनिता’बद्दल उत्सुकता व्यक्त केली. ‘आली मोठी शहाणी’मधील प्रत्येक गाण्याला स्वतःची ओळख देण्याचा प्रयत्न करण्यात आल्याचं त्यांनी सांगितलं. चित्रपटाच्या घोषणेपासूनच हृता आणि सारंगच्या जोडीबद्दल उत्सुकता होती आणि त्यांना या गाण्यात एकत्र आणण्याची कल्पना चांगली जमून आल्याचं निर्मात्यांनी म्हटलं.
आनंद दिलीप गोखले लिखित आणि दिग्दर्शित ‘आली मोठी शहाणी’ या चित्रपटाची निर्मिती फाईन ब्रू प्रोडक्शन्स आणि ट्रू होप फिल्म्स वर्क यांनी केली आहे. जयकुमार मुनोत, ईशा मुठे आणि श्रुती साठे हे चित्रपटाचे निर्माते आहेत. हृता दुर्गुळे आणि सारंग साठ्ये प्रमुख भूमिकेत असून, ‘आली मोठी शहाणी’ २ ऑक्टोबरला चित्रपटगृहात प्रदर्शित होणार आहे.
.png "Videos"){kind=small}
