शनिवार, 24 ऑक्टोबर 2026
(फोटो सौजन्य -सोशल मीडिया)
Bhata Marathi Movie:आजच्या कृत्रिम बुद्धिमत्तेच्या युगातही समाजातील काही घटक शिक्षणापासून वंचित आहेत. अशाच एका वंचित घटकाच्या संघर्षाची संवेदनशील कहाणी आता मोठ्या पडद्यावर पाहायला मिळणार आहे. बेलदार समाजाचा इतिहास आणि शिक्षणासाठीच्या संघर्षाची गोष्ट मांडणारा ‘भाटा’ हा मराठी चित्रपट ११ सप्टेंबरपासून सर्वत्र चित्रपटगृहात प्रदर्शित होणार आहे.
‘भाटा’च्या माध्यमातून पिढ्यानपिढ्या दगड फोडत उदरनिर्वाह करणाऱ्या बेलदार समाजातील एका वडिलांची आपल्या मुलांना शिकवून त्यांच्या आयुष्याला नवी दिशा देण्याची धडपड दाखवण्यात आली आहे. गरिबी, प्रतिकूल परिस्थिती आणि पारंपरिक विचारांना सामोरं जात मुलांना शिक्षण देण्यासाठी केलेला संघर्ष या चित्रपटाच्या केंद्रस्थानी आहे.
पारंपरिक समाजरचनेत प्रत्येक समाजघटकाच्या कामाचे स्वरूप निश्चित होते. मात्र, काळ बदलला तशी परिस्थितीही बदलत गेली आणि नव्या पिढीने नवी स्वप्ने पाहण्यास सुरुवात केली. तरीही बेलदार समाजासारख्या अनेक घटकांतील मुले आजही शिक्षणापासून वंचित आहेत.
याच वास्तवावर ‘भाटा’ भाष्य करतो. शिक्षण, नव्या पिढीची स्वप्ने, प्रथा-परंपरा आणि बदलत्या सामाजिक परिस्थितीच्या माध्यमातून एक वेगळा अनुभव देण्याचा प्रयत्न चित्रपटातून करण्यात आला आहे. विशेष म्हणजे, बेलदार समाजाचा इतिहास उलगडण्याचा प्रयत्नही या चित्रपटातून करण्यात आला आहे.
‘भाटा’मध्ये ज्येष्ठ अभिनेते मोहन जोशी, अरुण नलावडे, प्रशांत मोहिते, अभिनेत्री रुपाली जाधव, विजय कदम, अनिल नगरकर, लक्ष्मण दावभट, ऋषभ जाधव, प्रेमा किरण आणि बालकलाकार तनिष्का जाधव यांच्या भूमिका पाहायला मिळणार आहेत.
व्ही. डी. एंटरटेनमेंट आणि मोरया उद्योग समूह यांनी या चित्रपटाची प्रस्तुती केली आहे. अरायव्हल स्टुडिओ प्रा. लि. या निर्मिती संस्थेने चित्रपटाची निर्मिती केली असून सुनील आबा जाधव आणि विजय चंद्रकांत चव्हाण हे निर्माते आहेत. रिजवान शेख, मितेश पराडकर आणि सुनील कातकर हे सहनिर्माते आहेत.
भरतराज नारायण यादव यांनी चित्रपटाचे दिग्दर्शन केले आहे. कथा विजय चंद्रकांत चव्हाण यांची असून पटकथा आणि संवाद शरद कारंडे यांचे आहेत. श्रेयस आंगणे यांनी गीतलेखन आणि संगीताची जबाबदारी सांभाळली आहे. हरेश सावंत यांनी छायाचित्रण केले आहे.
चित्रपटाचा उत्सुकता वाढवणारा टीझर याआधी प्रदर्शित झाला होता. त्यानंतर आता ‘भाटा’चा प्रभावी ट्रेलरही लाँच करण्यात आला आहे. ट्रेलरला सोशल मीडियावर चांगला प्रतिसाद मिळत असून चित्रपटाची संकल्पना आणि मांडणीचं कौतुक होत आहे.
शिक्षणापासून वंचित राहिलेल्या समाजघटकाची व्यथा आणि मुलांच्या उज्ज्वल भविष्यासाठी झगडणाऱ्या बापाची कहाणी मांडणारा ‘भाटा’ ११ सप्टेंबरपासून प्रेक्षकांच्या भेटीला येणार आहे.
