Marathi Movie: प्रेम, लग्न आणि नात्यांमधील ट्विस्ट! पूजा सावंत-अभिजीत खांडकेकरच्या ‘लग्न आणि बरंच काही’चा ट्रेलर प्रदर्शित

Marathi Movie: पूजा सावंत आणि अभिजीत खांडकेकर यांच्या ‘लग्न आणि बरंच काही’ चित्रपटाचा ट्रेलर प्रदर्शित झाला आहे. दोन नवीन गाणीही रिलीज झाली असून, चित्रपट २३ ऑक्टोबर २०२६ रोजी प्रदर्शित होणार आहे.

• ऑनलाइन प्रेमापासून लग्नापर्यंतचा भन्नाट प्रवास
• पूजा सावंत आणि अभिजीत खांडकेकर यांची प्रमुख भूमिका
• ‘मला लग्नाची झालिया घाई’ आणि ‘साखरपुडा’ गाणी प्रदर्शित

Marathi Movie: मराठी मनोरंजनसृष्टीत प्रेम, लग्न आणि नात्यांमधील गुंतागुंत उलगडणारा एक नवा चित्रपट लवकरच प्रेक्षकांच्या भेटीला येणार आहे. ‘लग्न आणि बरंच काही’ असे या चित्रपटाचे नाव असून, नुकताच या चित्रपटाचा ट्रेलर प्रदर्शित झाला आहे. यासोबतच चित्रपटातील ‘मला लग्नाची झालिया घाई’ आणि ‘साखरपुडा’ ही दोन गाणीही प्रेक्षकांच्या भेटीला आली आहेत. अभिनेत्री पूजा सावंत आणि अभिनेता अभिजीत खांडकेकर यांच्या प्रमुख भूमिका असलेल्या या चित्रपटातून आजच्या पिढीचे प्रेम, लग्न आणि नात्यांकडे पाहण्याचे बदलते दृष्टिकोन पाहायला मिळणार आहेत.

ऑनलाइन प्रेमापासून लग्नापर्यंतचा भन्नाट प्रवास

आजच्या डिजिटल युगात ऑनलाइन प्रोफाइल, राइट स्वाइप, पहिली चॅट आणि त्यानंतर लग्नाचा निर्णय, हा अनेकांच्या आयुष्याचा भाग बनला आहे. डिजिटल माध्यमातून जोडीदार शोधताना जुळणारे सूर, वाढणाऱ्या अपेक्षा आणि अचानक येणारे ट्विस्ट यांची मनोरंजक गोष्ट ‘लग्न आणि बरंच काही’ या चित्रपटातून उलगडणार आहे.

‘लग्न म्हणजे प्रेमाचा हॅप्पी एंडिंग की एका नव्या पिक्चरची सुरुवात?’ असा प्रश्न उपस्थित करणाऱ्या या चित्रपटाच्या ट्रेलरमध्ये मनोरंजन, भावनिक क्षण आणि सुरेल गाण्यांची झलक पाहायला मिळते. त्यामुळे चित्रपटाच्या कथेबद्दल प्रेक्षकांमध्ये उत्सुकता निर्माण झाली आहे.

पूजा सावंत आणि अभिजीत खांडकेकर यांची प्रमुख भूमिका

‘लग्न आणि बरंच काही’ या चित्रपटात पूजा सावंत आणि अभिजीत खांडकेकर प्रमुख भूमिकेत दिसणार आहेत. त्यांच्यासोबत अक्षया नाईक, सुकन्या गुरव, भारती पाटील आणि इतर कलाकारही महत्त्वाच्या भूमिकांमध्ये झळकणार आहेत. बदलत्या काळातील नातेसंबंध आणि लग्नाविषयीच्या अपेक्षा यांची मांडणी या कलाकारांच्या माध्यमातून पाहायला मिळणार आहे.

हा चित्रपट केवळ लग्नाभोवती फिरणारा नसून, आजच्या पिढीचे विचार, स्वतःची ओळख, नात्यांमधील अपेक्षा आणि समतोल यांसारख्या विषयांनाही स्पर्श करतो. विशेषतः महिलांच्या भावविश्वाकडे पाहण्याचा प्रयत्न या कथेतून करण्यात आला आहे. मनोरंजनासोबतच प्रेक्षकांना काही प्रश्नांवर विचार करायला लावणारी ही कथा ठरणार आहे.

 

‘मला लग्नाची झालिया घाई’ आणि ‘साखरपुडा’ गाणी प्रदर्शित

चित्रपटाच्या ट्रेलरसोबतच ‘मला लग्नाची झालिया घाई’ आणि ‘साखरपुडा’ ही दोन गाणी प्रदर्शित करण्यात आली आहेत. या चित्रपटातील गाण्यांना लोकप्रिय गायिका वैशाली सामंत यांनी आपला आवाज दिला असून, संगीत दिग्दर्शनाची जबाबदारीही त्यांनी सांभाळली आहे.

याशिवाय अवधूत गुप्ते, स्वप्नील बांदोडकर, सुरेश वाडकर, मैथिली जोशी आणि अवनी तुषार नान्नजकर या गायकांचाही चित्रपटातील गाण्यांना सुरेल साज लाभला आहे. प्रेमाच्या भावना, लग्नाची धामधूम आणि नात्यांमधील विविध रंग संगीताच्या माध्यमातून अनुभवायला मिळणार आहेत.

ट्रेलर आणि गीत अनावरण सोहळ्याला वैशाली सामंत यांची विशेष उपस्थिती होती. चित्रपटातील गाण्यांमुळेही ‘लग्न आणि बरंच काही’बद्दलची उत्सुकता वाढली आहे.

Ramayana Release Date: दिवाळीत बॉक्स ऑफिसवर रंगणार ‘रामायणम्’चा भव्य सोहळा! रणबीर कपूरच्या चित्रपटाची रिलीज डेट जाहीर

२३ ऑक्टोबरला चित्रपटगृहात रंगणार प्रेम आणि नात्यांचा खेळ

‘लग्न आणि बरंच काही’ या चित्रपटाचे दिग्दर्शन वेदांती चंद्रकांत दाणी यांनी केले आहे. नाद स्टुडिओज प्रस्तुत या चित्रपटाची निर्मिती अव्यान आर्ट्स आणि म्हाळसा एंटरटेनमेंट यांनी केली असून, पिकल एंटरटेनमेंटचे सहकार्य लाभले आहे. अंजली तुषार नान्नजकर आणि डॉ. संजना सुरेश पै या चित्रपटाच्या निर्मात्या आहेत, तर यशश्री मसूरकर यांनी चित्रपटाची कथा लिहिली आहे.

लग्न म्हणजे केवळ दोन व्यक्तींमधील नातं की त्यापलीकडेही बरंच काही, या प्रश्नातून उलगडणारा प्रेम, भावना, नाती आणि संगीताचा प्रवास प्रेक्षकांना २३ ऑक्टोबर २०२६ रोजी मोठ्या पडद्यावर अनुभवता येणार आहे.

Aai Tuljabhavani Serial: टेलिव्हिजन विश्वात तंत्रज्ञानाचा नवा आविष्कार; ‘आई तुळजाभवानी’ मालिकेत AI-VFX मधून साकारलं देवीचं रूप