शनिवार, 7 नोव्हेंबर 2026
मी संसार माझा रेखिते मधून समाजाला महत्त्वाचा संदेश
मालिकेत बॅडमिंटन कोच गोयलकडून पिहूचं लैंगिक शोषण झाल्याची घटना समोर आली आहे. आपल्या मुलीवर झालेल्या अन्यायाविरोधात अनुप्रिया शांत न बसता गोयलविरोधात लढण्याचा निर्णय घेते. पिहूला न्याय मिळावा यासाठी ती रस्त्यावर उतरून उपोषणदेखील करते. एका आईचा आपल्या मुलीसाठी सुरू असलेला हा संघर्ष प्रेक्षकांचं लक्ष वेधून घेत आहे. आता या प्रकरणात न्यायालय काय निर्णय देणार, याकडे सर्वांचं लक्ष लागलं आहे. हा महाएपिसोड येत्या शनिवारी ७ नोव्हेंबर रोजी दुपारी १ व सायंकाळी ७ वाजता हा भाग प्रसारित होईल.
मालिकेतील या प्रसंगाविषयी अभिनेत्री दीप्ती केतकर म्हणाली की, ‘आजही आपल्या आजूबाजूला मुलींवर अत्याचार आणि लैंगिक छळाच्या घटना घडत आहेत, हे पाहून खूप वाईट वाटतं. निर्भया प्रकरण असो किंवा आज समोर येणाऱ्या अशा घटना, प्रत्येक वेळी मनात एकच प्रश्न येतो की हे कधी थांबणार? ‘मी संसार माझा रेखिते’ मालिकेत असे प्रसंग साकारताना एक कलाकार म्हणून मलाच खूप त्रास होतो. अनेकदा ते दृश्य करताना मन अस्वस्थ होतं.
मग ज्यांच्या खऱ्या आयुष्यात हे सगळं घडतं, त्या मुलींचं आणि त्यांच्या कुटुंबीयांचं काय होत असेल, याचा विचारही करवत नाही. एक आई म्हणून तर हा विचार आणखी अस्वस्थ करतो. प्रत्येक आईला आपली मुलगी सुरक्षित असावी असंच वाटतं. पण फक्त काळजी करून चालणार नाही, तर मुलींना चुकीच्या गोष्टीविरोधात बोलण्याचं धैर्य आणि घरातून त्यांना साथ मिळणंही तितकंच महत्त्वाचं आहे. अनुप्रियाच्या माध्यमातून मला एवढंच सांगायचं आहे की, कोणावरही अन्याय झाला तर गप्प बसू नका. आपल्या मुलीच्या पाठीशी ठामपणे उभं राहणं ही प्रत्येक पालकाची जबाबदारी आहे.’
एका आईचा आपल्या मुलीसाठीचा हा संघर्ष केवळ मालिकेपुरता मर्यादित नसून समाजातील एका महत्त्वाच्या प्रश्नाकडे लक्ष वेधणारा आहे. पीडितांना न्याय मिळणं आणि प्रत्येक मुलीला सुरक्षित वातावरण मिळणं किती आवश्यक आहे, हे ‘मी संसार माझा रेखिते’ या मालिकेच्या माध्यमातून अधोरेखित होत आहे.
