( फोटो सौजन्य- सोशल मीडिया)
Zee Marathi New Serial: नाती, आपलेपणा, प्रेम आणि माणुसकी यांची सुंदर गोष्ट सांगणारी ‘धाकट्या सुनबाई’ ही नवी मालिका लवकरच प्रेक्षकांच्या भेटीला येणार आहे. दोन कुटुंबं, त्यांचे वेगवेगळे विचार आणि नात्यांमधील गुंतागुंत या मालिकेत पाहायला मिळणार आहे. २८ सप्टेंबरपासून दररोज संध्याकाळी ६:३० वाजता झी मराठीवर ही मालिका प्रसारित होणार आहे.
आपल्या माणसांची साथ आणि नात्यांमधला विश्वास आयुष्याला कसा अर्थ देतो, हे राधिका आणि वेदांतच्या आयुष्यातून या मालिकेत उलगडणार आहे.
कृष्ण मंदिराच्या पायऱ्यांवर लहानपणी सापडलेली राधिका ही आप्पा आणि निर्मलाची दत्तक मुलगी म्हणून वाढली आहे. आप्पांनी तिला कृष्णाचा प्रसाद मानून आपल्या मुलीप्रमाणे वाढवलं. सालस, मनमिळाऊ आणि उत्साही स्वभावाची राधिका नेहमी इतरांच्या मदतीसाठी पुढे असते.
मात्र, घरातील गोदाक्का आजही तिला ‘परकी’ मानतात. त्यामुळे घरात प्रेम मिळत असूनही राधिकाच्या मनात आपल्या खर्या घराचा आणि आपल्या माणसांचा शोध कायम आहे. आपल्या मनातलं दुःख ती कृष्णाशी मनमोकळेपणाने बोलते आणि त्यालाच आपला सखा मानते.
वेदांत कुटुंबाच्या परंपरांना महत्त्व देणारा
दुसरीकडे पटवर्धन कुटुंबातील वेदांत आहे. ‘आराधना’ या पूजा साहित्य, अत्तर आणि अगरबत्तीच्या व्यवसायाचा तो वारसदार आहे. हुशार, सुसंस्कृत आणि जबाबदार असलेला वेदांत कुटुंबाच्या परंपरांना महत्त्व देतो.
आई दमयंतीच्या शिस्तीत आणि विचारांमध्ये वाढलेल्या वेदांतच्या आयुष्यात राधिकेची एंट्री झाल्यानंतर मात्र एक नवा प्रश्न उभा राहतो. माणसाची ओळख त्याच्या रक्ताने आणि कुळाने ठरते की त्याच्या मनाने? राधिकेमुळे वेदांतला स्वतःच्या विचारांकडे नव्या पद्धतीने पाहण्याचा प्रवास सुरू होतो.
‘धाकट्या सुनबाई’ मालिकेत अभिनेत्री चिन्मयी मोरे राधिकाची भूमिका साकारत आहे. तर अभिनेता मंदार जाधव वेदांतच्या भूमिकेत दिसणार आहे. दोन्ही कुटुंबांच्या नात्यांमधून प्रेम, आपलेपणा, विश्वास आणि माणुसकीचे वेगवेगळे पैलू प्रेक्षकांसमोर येणार आहेत.
नात्यांना आणि माणुसकीला केंद्रस्थानी ठेवणारी ‘धाकट्या सुनबाई’ ही मालिका २८ सप्टेंबरपासून दररोज संध्याकाळी ६:३० वाजता झी मराठीवर पाहता येणार आहे.
.png "Videos"){kind=small}
