शुक्रवार, 9 ऑक्टोबर 2026
(फोटो सौजन्य- सोशल मीडिया)
Prahaar Movie Song: बॉलिवूडमधील लोकप्रिय गायक श्रेया घोषाल आणि सोनू निगम यांची जोडी पुन्हा एकदा प्रेक्षकांच्या भेटीला आली आहे. ‘प्रहार – द अनटोल्ड स्टोरी ऑफ उज्ज्वल निकम’ या आगामी चित्रपटातील ‘तुझ में बसी मेरी जान’ हे रोमँटिक गाणं प्रदर्शित झालं आहे. राजकुमार राव आणि वामिका गब्बी यांच्यावर चित्रित करण्यात आलेल्या या गाण्यात प्रेम, लग्नसोहळ्यातील आनंद आणि नात्यातील हळवे क्षण पाहायला मिळत आहेत.
टी-सीरिज प्रस्तुत या गाण्यात श्रेया घोषाल आणि सोनू निगम यांच्या सुरेल आवाजाची जादू अनुभवायला मिळते. संगीतकार प्रीतम यांनी या गाण्याला संगीत दिलं आहे, तर अमिताभ भट्टाचार्य यांनी हिंदी गीताचे बोल लिहिले आहेत. मराठी गीतलेखनाची जबाबदारी अमेय दयाळ यांनी सांभाळली आहे. प्रेमातील आपुलकी, एकमेकांसोबत घालवलेले खास क्षण आणि नात्यातील भावनिक बंध या गाण्यातून सुंदरपणे मांडण्यात आले आहेत.
‘तुझ में बसी मेरी जान’ या गाण्यात राजकुमार राव आणि वामिका गब्बी यांच्या लग्नसोहळ्याची झलक पाहायला मिळते. एकमेकांकडे पाहताना चोरून दिलेले कटाक्ष, खोडकर क्षण आणि प्रेम व्यक्त करणाऱ्या छोट्या छोट्या गोष्टींमधून त्यांच्या नात्यातील गोडवा दिसून येतो. दोन्ही कलाकारांची केमिस्ट्री आणि श्रेया घोषाल-सोनू निगम यांचा सुरेल आवाज यामुळे गाण्याला खास रंगत आली आहे.
श्रेया घोषाल-सोनू निगम यांच्या आवाजाची जादू
या गाण्याबद्दल बोलताना श्रेया घोषाल यांनी सांगितलं की, ‘तुझ में बसी मेरी जान’ हे प्रेम, सहजीवन आणि नात्यातील छोट्या पण महत्त्वाच्या क्षणांचं सुंदर सेलिब्रेशन आहे. सोनू निगम यांच्यासोबत पुन्हा गाणं गाण्याचा अनुभव खास असल्याचंही त्यांनी नमूद केलं. राजकुमार राव आणि वामिका गब्बी यांच्यातील केमिस्ट्रीमुळे गाण्यातील भावना अधिक प्रभावीपणे व्यक्त झाल्याचं त्यांनी सांगितलं.
सोनू निगम यांनीही या गाण्याबद्दल आनंद व्यक्त केला. प्रेमाच्या साध्या आणि सुंदर भावनेचा अनुभव देणारं हे गाणं असून, श्रेया घोषाल यांच्यासोबत पुन्हा काम करणं आनंददायी असल्याचं त्यांनी म्हटलं. दोन्ही गायकांच्या आवाजातील भावपूर्ण सादरीकरणामुळे या रोमँटिक गाण्याला वेगळीच उंची मिळाली आहे.
दिनेश विजान आणि मॅडॉक फिल्म्स यांची निर्मिती असलेल्या ‘प्रहार – द अनटोल्ड स्टोरी ऑफ उज्ज्वल निकम’ या चित्रपटात राजकुमार राव आणि वामिका गब्बी मुख्य भूमिकेत आहेत. अविनाश अरुण धवरे यांनी या चित्रपटाचं दिग्दर्शन केलं आहे. हा चित्रपट १६ ऑक्टोबर २०२६ रोजी चित्रपटगृहांत प्रदर्शित होणार आहे.
‘तुझ में बसी मेरी जान’ हे गाणं सर्व प्रमुख म्युझिक स्ट्रीमिंग प्लॅटफॉर्मवर उपलब्ध झालं असून, त्याचा म्युझिक व्हिडीओ टी-सीरिजच्या अधिकृत यूट्यूब चॅनेलवर पाहता येणार आहे.
