गोकुळपाठोपाठ वारणा दूध संघाचीही दरवाढ; म्हशीचे दूध ३, गायीचे २ रुपयांनी महागले, ग्राहकांना झटका!
वारणा समूहाने दिलेल्या माहितीनुसार, दूध उत्पादन, प्रक्रिया आणि आनुषंगिक खर्चात वाढ झाल्याने विक्री दरातही वाढ करण्याचा निर्णय घेण्यात आला आहे. त्यानुसार म्हशीच्या दुधाच्या विक्री दरात प्रतिलिटर ६ रुपये, तर गायीच्या दुधाच्या विक्री दरात प्रतिलिटर ४ रुपयांची वाढ करण्यात आली आहे. वाढता पशुखाद्य खर्च, जनावरांचे संगोपन, पशुवैद्यकीय सेवा आणि इतर उत्पादन खर्च लक्षात घेऊन दूध उत्पादकांना अधिक मोबदला मिळावा, यासाठी खरेदी दरात वाढ केल्याचे वारणा समूहाकडून स्पष्ट करण्यात आले आहे.
दरम्यान, कोल्हापूर जिल्हा सहकारी दूध उत्पादक संघ अर्थात गोकुळनेही दूध उत्पादकांना दिलासा देणारा निर्णय घेतला आहे. गोकुळशी संलग्न दूध उत्पादकांच्या कष्टाला योग्य मोबदला मिळावा, दुग्ध व्यवसायाला बळ मिळावे आणि दूध उत्पादन वाढीस प्रोत्साहन मिळावे, या उद्देशाने म्हशीच्या आणि गायीच्या दूध खरेदी दरात वाढ करण्यात आली आहे. २१ नोव्हेंबरपासून म्हशीच्या दूध खरेदी दरात प्रतिलिटर ३ रुपये, तर गायीच्या दूध खरेदी दरात प्रतिलिटर २ रुपयांची वाढ लागू झाली आहे. विशेष म्हणजे, म्हशीच्या दूध खरेदी दरातील प्रतिलिटर ३ रुपयांची वाढ ही गेल्या दहा वर्षांतील सर्वाधिक दरवाढ असल्याचे गोकुळ प्रशासनाने सांगितले आहे.
गोकुळने जाहीर केलेल्या दरानुसार, ६.० फॅट आणि ९.० एसएनएफ गुणप्रतिच्या म्हशीच्या दुधाचा खरेदी दर प्रतिलिटर ५५ रुपयांवरून ५८ रुपये करण्यात आला आहे. तर ३.५ फॅट आणि ८.५ एसएनएफ गुणप्रतिच्या गायीच्या दुधाचा खरेदी दर प्रतिलिटर ३७ रुपयांवरून ३९ रुपये करण्यात आला आहे. या दरवाढीमुळे गोकुळशी संलग्न दूध उत्पादकांना महिन्याला सुमारे १४ कोटी रुपयांची अतिरिक्त रक्कम मिळणार आहे. त्यामुळे दूध उत्पादक शेतकऱ्यांना आर्थिक आधार मिळण्याची अपेक्षा आहे.
यंदा पावसाचे आगमन उशिरा झाल्याने तसेच काही भागांत पावसाचे प्रमाण कमी-जास्त राहिल्याने चाऱ्याच्या उपलब्धतेवर परिणाम झाला आहे. याचा थेट परिणाम पशुधनाच्या दूध उत्पादनावर होत असून दूध संकलनातही चढ-उतार पाहायला मिळत आहेत. दुसरीकडे, पशुखाद्याचे वाढते दर, जनावरांच्या देखभालीचा खर्च आणि पशुवैद्यकीय सेवांवरील खर्च यामुळे दूध उत्पादक शेतकरी आर्थिक अडचणींचा सामना करत आहेत. या पार्श्वभूमीवर गोकुळ आणि वारणा दूध संघांनी खरेदी दरवाढीचा निर्णय घेतला आहे.
गोकुळने दूध खरेदी दरात वाढ केली असली, तरी ही वाढ अपुरी असल्याची भूमिका काही दूध उत्पादक शेतकऱ्यांनी घेतली आहे. दूध उत्पादनासाठी लागणारा खर्च सातत्याने वाढत असल्याने म्हशीच्या आणि गायीच्या दुधाला प्रतिलिटर किमान ५ रुपये दरवाढ मिळावी, अशी मागणी दूध उत्पादकांकडून करण्यात येत आहे. एकीकडे दूध खरेदी दरवाढीमुळे शेतकऱ्यांना दिलासा मिळण्याची अपेक्षा आहे, तर दुसरीकडे विक्री दरातील वाढीमुळे ग्राहकांचे दूध खरेदीचे बजेट वाढणार आहे. त्यामुळे दूध उत्पादक आणि ग्राहक या दोघांसाठीही ही दरवाढ महत्त्वाची ठरणार आहे.
Ans: वारणा दूध संघाने म्हशीच्या दूध खरेदी दरात प्रतिलिटर ३ रुपये, तर गायीच्या दूध खरेदी दरात प्रतिलिटर २ रुपयांची वाढ केली आहे.
Ans: वारणा दूध संघाने म्हशीच्या दुधाच्या विक्री दरात प्रतिलिटर ६ रुपये, तर गायीच्या दुधाच्या विक्री दरात प्रतिलिटर ४ रुपयांची वाढ केली आहे.
Ans: गोकुळच्या दूध खरेदी दरवाढीमुळे संलग्न दूध उत्पादकांना महिन्याकाठी सुमारे १४ कोटी रुपयांची अतिरिक्त रक्कम मिळणार असल्याची माहिती देण्यात आली आहे.






