गुरुवार, 5 नोव्हेंबर 2026
(फोटो सौजन्य- सोशल मिडिया)
Vikrant Massey Musafir Cafe: राष्ट्रीय पुरस्कार विजेते अभिनेता विक्रांत मैसी आता त्याच्या गाजलेल्या ‘मुसाफिर कॅफे’ची संकल्पना पडद्याच्या पलीकडे प्रत्यक्षात साकारताना दिसणार आहे. हिमाचल प्रदेश आणि उत्तराखंड येथे दोन नवीन ‘मुसाफिर कॅफे’ उभारण्याचे काम सुरू असून, यापैकी एका कॅफेच्या बांधकामाची खास झलक समोर आली आहे. डोंगरांच्या कुशीत आकार घेत असलेल्या या कॅफेची पहिली झलक पाहून चाहत्यांची उत्सुकता वाढली आहे.
हिमाचल आणि उत्तराखंडमध्ये उभारले जातायत दोन ‘मुसाफिर कॅफे’
विक्रांत मैसी यांच्या या प्रकल्पांतर्गत हिमाचल प्रदेश आणि उत्तराखंड येथे दोन ‘मुसाफिर कॅफे’ सुरू करण्यात येणार आहेत. सध्या दोन्ही ठिकाणी बांधकाम सुरू असून, मालिकेत पाहायला मिळालेल्या कॅफेच्या रूपरेषेपासून प्रेरणा घेऊन या जागांची रचना केली जात आहे.
डोंगराळ परिसराशी सुसंगत अशी या कॅफेची रचना करण्यात येत असून, मालिकेतील ‘मुसाफिर कॅफे’ची उबदार आणि आपुलकीची भावना प्रत्यक्षात अनुभवता यावी, असा या प्रकल्पामागील प्रयत्न आहे.
या कॅफे प्रकल्पाचे आणखी एक वैशिष्ट्य म्हणजे आर्टिस्ट रेसिडेन्सी. कलाकारांसाठी तब्बल २० खोल्यांची व्यवस्था या संकुलात असणार आहे. कलाकारांना राहता यावे आणि त्यांना सर्जनशील कामासाठी जागा मिळावी, या उद्देशाने ही सुविधा उभारली जात आहे.
त्यामुळे ‘मुसाफिर कॅफे’ केवळ कॅफेपुरता मर्यादित न राहता कलाकारांसाठी एक वेगळी जागा म्हणूनही विकसित केला जात आहे.
समोर आलेल्या छायाचित्रात बांधकाम सुरू असलेल्या कॅफेची झलक पाहायला मिळते. डोंगराळ भूप्रदेशाला साजेशी स्टोन-अँड-वुड आर्किटेक्चर या कॅफेसाठी वापरण्यात येत आहे.
मालिकेत दिसलेल्या कॅफेसारखाच लुक आणि फील प्रत्यक्ष जागेत निर्माण करण्याचा प्रयत्न केला जात आहे. कॅफेसोबत आर्टिस्ट रेसिडेन्सीच्या खोल्यांचाही या संकुलात समावेश करण्यात येत आहे.
‘मुसाफिर कॅफे’च्या संकल्पनेचा मालिकेच्या कथेशीही जवळचा संबंध आहे. विक्रांत मैसी यांनी या मालिकेत चंदरची भूमिका साकारली होती. चंदर आपल्या स्वप्नांचा पाठपुरावा करत डोंगरांमध्ये स्थायिक होतो आणि स्वतःच्या कॅफेभोवती आयुष्याचा नवा प्रवास सुरू करण्याचा प्रयत्न करतो.
कॅफे हा चंदरच्या प्रवासाचा आणि मालिकेच्या कथानकाचा महत्त्वाचा भाग होता. आता मालिकेतील ही काल्पनिक दुनिया प्रत्यक्ष आयुष्यातील जागेच्या रूपाने साकारताना दिसत आहे.
विक्रांत मैसी यांच्या प्रोडक्शन हाऊस ‘होममेड स्टोरीज’च्या माध्यमातून हा प्रकल्प आकार घेत आहे. अभिनयासोबतच निर्मिती आणि आता अशा अनुभवाधारित जागेच्या निर्मितीकडेही त्यांचा प्रवास होताना दिसत आहे.
हिमाचल प्रदेश आणि उत्तराखंडच्या निसर्गरम्य वातावरणात आकार घेत असलेले हे दोन्ही ‘मुसाफिर कॅफे’ मालिकेतील जगाला प्रत्यक्ष जीवनाशी जोडण्याचा प्रयत्न करत आहेत.
