आज चार राज्यांतील ६ जागांचा निकाल; विजय आणि सुवेंदू अधिकारी यांची प्रतिष्ठा पणाला!
तामिळनाडूमधील मदुरांतकम आणि धारापूरम या दोन विधानसभा मतदारसंघांसाठी ६ ऑक्टोबर रोजी मतदान पार पडले. हे दोन्ही मतदारसंघ अनुसूचित जातींसाठी राखीव आहेत. राज्यातील सत्ताधारी आणि विरोधी पक्षांच्या प्रमुख नेत्यांनी या निवडणुकांसाठी जोरदार प्रचार केला होता. मिळालेल्या माहितीनुसार, अभिनेता विजय यांच्या TVK पक्षाने यापूर्वी विधानसभेच्या १०८ जागांवर विजय मिळवला होता. मात्र, बहुमतासाठी आवश्यक असलेल्या ११८ जागांपेक्षा हा आकडा कमी असल्याने पोटनिवडणुकीचे निकाल पक्षासाठी महत्त्वाचे ठरणार आहेत.
CJP च्या निदर्शनाला पोलिसांची परवानगी अद्याप नाहीच; जमाव रोखण्यासाठी पोलिसांचा तगडा बंदोबस्त
धारापूरम विधानसभा मतदारसंघात एकूण २२ उमेदवार निवडणुकीच्या रिंगणात होते. या मतदारसंघात ८०.२५ टक्के मतदानाची नोंद झाली. मतमोजणी एल.आर.जी. शासकीय कला महाविद्यालयात कडेकोट सुरक्षा व्यवस्थेत होणार आहे. सकाळी ८ वाजता टपाली मतपत्रिकांच्या मोजणीला सुरुवात होईल. त्यानंतर सकाळी ८.३० वाजल्यापासून इलेक्ट्रॉनिक मतदान यंत्रांमधील मतांची मोजणी २३ फेऱ्यांमध्ये केली जाणार आहे. मतमोजणी केंद्रावर ३०० हून अधिक सुरक्षाकर्मी तैनात करण्यात आले आहेत. सकाळी ११ वाजेपर्यंत सुरुवातीचे कल समोर येण्याची, तर दुपारी २ वाजेपर्यंत निकालाचे चित्र स्पष्ट होण्याची शक्यता व्यक्त करण्यात आली आहे.
पश्चिम बंगालमधील पूर्व मेदिनीपूर जिल्ह्यातील नंदीग्राम आणि मुर्शिदाबाद जिल्ह्यातील रेजीनगर विधानसभा मतदारसंघांच्या निकालांकडे विशेष लक्ष लागले आहे. नंदीग्राममध्ये तृणमूल काँग्रेसच्या उमेदवार संचिता प्रधान डे यांनी अखेरच्या क्षणी उमेदवारी अर्ज मागे घेतल्याने निवडणुकीला वेगळे वळण मिळाले. त्यांच्या माघारीनंतर भाजपच्या उमेदवार हासी राणी रथ यांच्या विजयाची शक्यता राजकीय विश्लेषकांकडून व्यक्त करण्यात येत आहे.
हासी राणी रथ या दिवंगत चंद्रनाथ रथ यांच्या आई आहेत. चंद्रनाथ रथ हे भाजप नेते सुवेंदू अधिकारी यांचे खासगी सहाय्यक होते. ६ मे रोजी त्यांची हत्या झाली होती. या पार्श्वभूमीवर नंदीग्रामची पोटनिवडणूक चर्चेत आली आहे. सुवेंदू अधिकारी यांनी मंगळवारी दावा केला होता की, हासी राणी रथ यांच्या विजयाचे मताधिक्य २०१६ मध्ये स्वतः मिळवलेल्या मताधिक्यापेक्षाही अधिक असू शकते. त्यामुळे या मतदारसंघातील निकाल भाजपसाठी प्रतिष्ठेचा विषय ठरला आहे.
पुदुच्चेरीतील थट्टानचावडी विधानसभा मतदारसंघ आणि आसाममधील नागाव लोकसभा मतदारसंघासाठीही आज मतमोजणी होणार आहे. या निकालांमुळे संबंधित पक्षांच्या राजकीय ताकदीचे चित्र स्पष्ट होणार आहे. चार राज्यांतील या सहा जागांचे निकाल केवळ उमेदवारांचे राजकीय भवितव्य ठरवणार नाहीत, तर आगामी राजकीय समीकरणांवरही त्यांचा प्रभाव पडू शकतो.
.png "Videos"){kind=small}
