NEET आंदोलन पुन्हा पेटणार? 5 सप्टेंबरला दिल्लीत CJP चा मोर्चा; देशभरातील तरुणांना सहभागी होण्याचे आवाहन
NEET पेपर लीकच्या मुद्द्यावर CJP ने यापूर्वी दिल्लीतील जंतर-मंतरवर दीर्घकाळ आंदोलन केले होते. 25 जुलै रोजी सरकारसोबत झालेल्या चर्चेनंतर आंदोलन मागे घेण्यात आले होते. त्यावेळी आंदोलकांवरील एफआयआर मागे घेणे आणि प्रभावित कुटुंबांना भरपाई देण्यासह विविध मुद्द्यांवर तोडगा निघाल्याचे सांगण्यात आले होते. मात्र जवळपास एक महिना उलटल्यानंतरही महत्त्वाची आश्वासने पूर्ण झालेली नाहीत, असा आरोप आता CJP ने केला आहे. त्यामुळे पुन्हा आंदोलनाचा मार्ग स्वीकारण्याचा निर्णय संघटनेने घेतला आहे.
Indian Railway : भारतीय रेल्वेचा नवा विक्रम; ४२२ किमीच्या प्रवासात ३६० कंटेनरची विक्रमी वाहतूक
CJP ने 5 सप्टेंबर रोजी शांततापूर्ण मोर्चा काढण्याची घोषणा केली आहे. हा मोर्चा इंडिया गेटपासून सुरू होऊन नवी दिल्ली पोलीस मुख्यालयाच्या दिशेने जाणार असल्याचे संघटनेने म्हटले आहे. CJP चे सौरव दास यांच्या म्हणण्यानुसार, NEET प्रकरणाशी संबंधित मृत विद्यार्थ्यांचे कुटुंबीय तसेच पोलीस कारवाईमुळे प्रभावित झालेल्या व्यक्तींचे कुटुंबीय या मोर्चाचे नेतृत्व करतील. देशभरातील विद्यार्थी, युवा संघटना आणि तरुण नागरिक या आंदोलनात सहभागी होण्याची अपेक्षा CJP ने व्यक्त केली आहे.
CJP च्या राष्ट्रीय कार्यसमितीची सोमवारी ऑनलाइन बैठक झाली. या बैठकीत 25 जुलै रोजी आंदोलन मागे घेताना केंद्र सरकार आणि संबंधित राज्य सरकारांकडून मिळालेल्या आश्वासनांचा आढावा घेण्यात आल्याचे संघटनेने म्हटले आहे. एक महिना उलटूनही अनेक मुद्द्यांवर अपेक्षित कार्यवाही झालेली नाही आणि प्रक्रिया लांबवली जात असल्याचा CJP चा आरोप आहे. सरकारकडून मिळालेल्या आश्वासनांनंतरच सद्भावना दाखवत देशव्यापी आंदोलन मागे घेण्यात आले होते, असा दावा संघटनेने केला आहे.
NEET पेपर लीकविरोधातील आंदोलनादरम्यान CJP ने सरकारसमोर विविध मागण्या मांडल्या होत्या. त्यामध्ये तत्कालीन केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी प्रमुख होती. याशिवाय NEET प्रकरणाशी संबंधित मृत विद्यार्थ्यांच्या कुटुंबांना एक कोटी रुपयांची भरपाई आणि आंदोलनादरम्यान आंदोलकांविरोधात दाखल करण्यात आलेले गुन्हे मागे घेण्याची मागणीही करण्यात आली होती. 25 जुलैच्या चर्चेनंतर आंदोलन मागे घेण्यात आले. मात्र भरपाई आणि एफआयआर मागे घेण्याच्या प्रक्रियेबाबत अद्याप समाधानकारक कार्यवाही झालेली नसल्याचा CJP चा आरोप आहे.
आंदोलकांविरोधातील एफआयआर मागे घेण्याच्या मुद्द्यावर CJP ने यापूर्वीही सरकारला इशारा दिला होता. संघटनेने लेखी आश्वासनाची मागणी करत, कार्यवाही न झाल्यास पुन्हा आंदोलन करण्याचे संकेत दिले होते. आता 5 सप्टेंबरच्या मोर्चाच्या घोषणेमुळे NEET पेपर लीक आणि त्यानंतरच्या विद्यार्थी आंदोलनाशी संबंधित प्रश्न पुन्हा एकदा केंद्रस्थानी येण्याची शक्यता आहे.
CJP ने सप्टेंबरपासून देशव्यापी स्तरावर नागरिकांपर्यंत पोहोचण्यासाठी विविध उपक्रम राबविण्याची घोषणाही केली आहे. बेरोजगारी, शिक्षण, पारदर्शकता, उत्तरदायित्व आणि संस्थात्मक सुधारणांसारख्या मुद्द्यांवर दबावगट म्हणून काम करण्याची भूमिका संघटनेने यापूर्वी स्पष्ट केली आहे. त्यामुळे 5 सप्टेंबरचा दिल्लीतील मोर्चा केवळ NEET प्रकरणापुरता मर्यादित राहतो की व्यापक युवा आंदोलनाचे स्वरूप घेतो, याकडे आता लक्ष लागले आहे. दरम्यान, मोर्चाचा मार्ग, आवश्यक परवानग्या आणि सुरक्षाव्यवस्थेबाबत दिल्ली पोलिसांकडून पुढे कोणती भूमिका घेतली जाते, हेही महत्त्वाचे ठरणार आहे.
हिमाचल प्रदेशात पावसाचा हाहा: कार; आत्तापर्यंत 111 जणांचा मृत्यू, 11 पुलांना फटका
.png "Videos"){kind=small}
