मंगळवार, 3 नोव्हेंबर 2026
Cyclone Murasu: 'मुरासु' चक्रीवादळाचा कहर! आंध्र प्रदेशात ११० किमी वेगाने वारे, अनेक जिल्ह्यांत पूरस्थिती, सौजन्य : आयएएनएस
‘मुरासु’ (Cyclone Murasu) या तीव्र चक्रीवादळाच्या प्रभावामुळे आंध्र प्रदेशच्या दक्षिण किनारपट्टीवरील भागांत मुसळधार पाऊस सुरू असून जनजीवन विस्कळीत झाले आहे. मंगळवारी पहाटे हे चक्रीवादळ किनारपट्टीवरून पुढे सरकले. जोरदार वाऱ्यांमुळे अनेक ठिकाणी झाडे आणि विजेचे खांब उन्मळून पडले, तर मुसळधार पावसामुळे सखल भागांत पाणी साचले. काही जिल्ह्यांमध्ये पिकांचे नुकसान झाले असून वीजपुरवठाही खंडित झाला आहे. मात्र, आतापर्यंत जीवितहानी झाल्याचे वृत्त नाही.
नेल्लोर आणि नरसापूरदरम्यान दक्षिण आंध्र प्रदेशच्या किनारपट्टीवरून पहाटे 3.30 ते 5.30 या वेळेत चक्रीवादळ पुढे सरकले. या वेळी वाऱ्यांचा वेग ताशी 100 ते 110 किलोमीटर होता. वाऱ्यांच्या झोतांचा वेग ताशी 120 किलोमीटरपर्यंत पोहोचला होता.
प्रकाशम, बापटला, पलनाडू, कृष्णा, एलुरू आणि पश्चिम गोदावरी जिल्ह्यांत मोठ्या प्रमाणावर पावसाची नोंद झाली. सोमवारपासून राज्यात सरासरी 20.38 सेंटीमीटर पाऊस पडल्याची माहिती अधिकाऱ्यांनी दिली. बापटला जिल्ह्यात 21 सेंटीमीटर, तर प्रकाशम जिल्ह्यात 20 सेंटीमीटर पावसाची नोंद झाली आहे. बापटला, गुंटूर आणि प्रकाशम जिल्ह्यांत बुधवार सकाळपर्यंत मुसळधार पाऊस सुरू राहण्याची शक्यता आहे.
बापटला जिल्ह्यातील किनारपट्टी भागांत समुद्र खवळलेला असून उंच लाटा उसळत आहेत. सूर्यलंका समुद्रकिनाऱ्यावर जोरदार लाटांमुळे समुद्राचे पाणी सुमारे 50 मीटर आतपर्यंत घुसले.
दरम्यान, ‘अरनाब’ आणि ‘मुरासु’ या चक्रीवादळांमुळे झालेल्या पावसाने राज्यातील सरासरी पावसाची तूट 53 टक्क्यांवरून 28.9 टक्क्यांपर्यंत कमी झाली आहे. आंध्र प्रदेश राज्य आपत्ती व्यवस्थापन प्राधिकरणाच्या माहितीनुसार, पुढील काही तासांत पोलावरम, काकीनाडा, एनटीआर, कृष्णा, बापटला आणि पलनाडू जिल्ह्यांत मुसळधार पाऊस होण्याची शक्यता आहे. तर मान्यम, पूर्व गोदावरी, पश्चिम गोदावरी, कोनसीमा आणि एलुरू जिल्ह्यांत मध्यम स्वरूपाचा पाऊस पडू शकतो.
भारतीय हवामानशास्त्र विभागाच्या अंदाजानुसार, ‘मुरासु’ चक्रीवादळ उत्तर-वायव्य दिशेने सरकत असून मंगळवारी मध्यरात्रीपर्यंत त्याची तीव्रता कमी होऊन त्याचे रूपांतर ‘डीप डिप्रेशन’ अर्थात तीव्र कमी दाबाच्या क्षेत्रात होण्याची शक्यता आहे. मंगळवारी किनारी आंध्र प्रदेश, यानम आणि लगतच्या तेलंगणात अतिवृष्टीचा इशारा देण्यात आला आहे. बुधवारीही किनारी आंध्र प्रदेश आणि यानममध्ये अतिवृष्टी होण्याचा अंदाज आहे.
मुख्यमंत्री एन. चंद्राबाबू नायडू यांनी सचिवालयातील ‘रिअल टाइम गव्हर्नन्स सोसायटी’च्या केंद्रातून चक्रीवादळाच्या परिस्थितीचा आढावा घेतला. विविध भागांतील पाऊस आणि वाऱ्यांचा वेग याबाबत त्यांनी अधिकाऱ्यांकडून माहिती घेतली. नागरिकांना सातत्याने सतर्क ठेवल्यामुळे अनेकांचे प्राण वाचविण्यात यश आल्याचे त्यांनी सांगितले. तसेच तमिळनाडू आणि कर्नाटकच्या मुख्यमंत्र्यांशी चर्चा करून मदत व पुनर्वसनाच्या कामांसाठी सहकार्य मागितल्याचेही त्यांनी स्पष्ट केले.
प्रशासनाने उपलब्ध आकडेवारीचे विश्लेषण करून परिस्थितीचा प्रभावीपणे सामना करावा, असे निर्देश नायडू यांनी दिले. प्रत्येक स्तरावर आकडेवारीच्या आधारे निर्णय घेण्याची गरज असल्याचेही त्यांनी नमूद केले.
गेल्या 24 तासांत राज्यातील पावसाची तूट दोन टक्क्यांनी कमी झाली असून पुढील पाच दिवसांत आणखी दोन टक्क्यांनी घट होण्याची शक्यता अधिकाऱ्यांनी व्यक्त केली आहे. एकाच दिवसात भूजल पातळीत 0.45 मीटरने वाढ झाली आहे. त्यामुळे भूजल साठ्यात 20 ते 30 टीएमसी पाण्याची भर पडू शकते, असा अंदाज आहे. तलाव आणि लहान सिंचन टाक्यांमध्ये 10 टीएमसीपर्यंत पाणी जमा होण्याची शक्यता असून जलाशयांमध्ये आतापर्यंत सात ते आठ टीएमसी पाणी जमा झाल्याची माहिती अधिकाऱ्यांनी दिली.
Ans: आंध्र प्रदेशच्या दक्षिण किनारपट्टीवरील नेल्लोर, बापटला आणि प्रकाशम परिसरासह अनेक जिल्ह्यांत चक्रीवादळाचा प्रभाव जाणवला.
Ans: वाऱ्यांचा वेग ताशी १०० ते ११० किलोमीटर होता. झोतांचा वेग ताशी 120 किलोमीटरपर्यंत पोहोचला.
Ans: पोलावरम, काकीनाडा, एनटीआर, कृष्णा, बापटला आणि पलनाडू जिल्ह्यांना मुसळधार पावसाचा इशारा देण्यात आला आहे.
