मंगळवार, 3 नोव्हेंबर 2026
B.Sc Nursing Admission : नर्सिंग प्रवेशासाठी ६ नोव्हेंबर शेवटची मुदत! विद्यार्थ्यांनो, संधी चुकवू नका, सौजन्य : आयएएनएस
बी.एस्सी. नर्सिंग अभ्यासक्रमाला (B.Sc Nursing Admission) प्रवेश घेऊ इच्छिणाऱ्या विद्यार्थ्यांसाठी महत्त्वाची बातमी आहे. महाराष्ट्रात 2026-27 या शैक्षणिक वर्षासाठी नर्सिंग प्रवेशाच्या नव्या निकषांनुसार पात्र ठरलेल्या विद्यार्थ्यांना 6 नोव्हेंबरपर्यंत ऑनलाइन नोंदणी आणि ‘Session Apply’ प्रक्रिया पूर्ण करावी लागणार आहे. राज्य सामाईक प्रवेश परीक्षा कक्षाने यासंदर्भात सूचना जारी केली आहे. विद्यार्थ्यांनी अंतिम मुदतीची वाट न पाहता प्रवेश प्रक्रियेतील सर्व टप्पे वेळेत पूर्ण करावेत, असे आवाहन महाराष्ट्र मेडिकल एज्युकेशन अँड रिसर्च सेंटरच्या अध्यक्षा अबेदा पी. इनामदार यांनी केले आहे.
आझम कॅम्पस, पुणे येथील अबेदा पी. इनामदार नर्सिंग कॉलेजच्या वतीने विद्यार्थी आणि पालकांना प्रवेश प्रक्रियेबाबत मार्गदर्शन करण्यात आले आहे. केवळ अंतिम तारीख चुकल्यामुळे विद्यार्थ्यांची प्रवेशाची संधी हुकू नये. प्रत्येक अर्जामागे विद्यार्थ्याचे स्वप्न आणि कुटुंबाची मेहनत असते. त्यामुळे अर्जातील सर्व प्रक्रिया वेळेत पूर्ण कराव्यात, असे अबेदा पी. इनामदार यांनी सांगितले.
राज्य सामाईक प्रवेश परीक्षा कक्षाच्या सूचना क्रमांक ५ नुसार विद्यार्थ्यांना तीन महत्त्वाचे टप्पे पूर्ण करावे लागणार आहेत.
ऑनलाइन नोंदणी : 6 नोव्हेंबर रोजी रात्री 11.59 वाजेपर्यंत नोंदणी आणि ‘Session Apply’ प्रक्रिया पूर्ण करावी.
नोंदणी शुल्क : 7 नोव्हेंबर रोजी सायंकाळी 5 वाजेपर्यंत अधिकृत ऑनलाइन पेमेंट सुविधेद्वारे शुल्क भरावे.
कागदपत्रे अपलोड : आवश्यक मूळ कागदपत्रांच्या रंगीत स्कॅन प्रती अपलोड करून 7 नोव्हेंबर रोजी रात्री 11.59 वाजेपर्यंत ‘Submit’ बटणावर क्लिक करावे.
केवळ कागदपत्रे अपलोड करून चालणार नाही, तर अर्ज अंतिम स्वरूपात सादर करणेही आवश्यक आहे. आवश्यक कागदपत्रे सादर न केल्यास संबंधित प्रवर्गातून अर्जाचा विचार होणार नाही किंवा अर्ज नाकारला जाऊ शकतो.
संस्थास्तरावरील दुसऱ्या प्रवेश फेरीसाठी पात्र विद्यार्थ्यांनी 8 ते 10 नोव्हेंबरदरम्यान संबंधित महाविद्यालयात निर्धारित नमुन्यात अर्ज करावा. अर्ज सादर करण्याची अंतिम मुदत 10 नोव्हेंबर रोजी सायंकाळी 5.30 वाजेपर्यंत आहे. केवळ ऑनलाइन नोंदणी केल्याने प्रवेश निश्चित होत नाही, याची विद्यार्थ्यांनी नोंद घ्यावी.
27 ऑक्टोबर रोजी सायंकाळी 5.30 वाजता प्रवेशासाठी जागा मिळालेल्या विद्यार्थ्यांना तसेच संस्थास्तरावरील पहिल्या फेरीत प्रवेश घेतलेल्या विद्यार्थ्यांना दुसऱ्या फेरीत सहभागी होता येणार नाही.
आर्थिक अडचणींमुळे नर्सिंगचे शिक्षण घेण्यापासून विद्यार्थी वंचित राहू नयेत, यासाठी शिष्यवृत्तीच्या पर्यायांची माहिती घेण्याचे आवाहनही करण्यात आले आहे. पात्र आणि मेहनती विद्यार्थ्यांना योग्य शिष्यवृत्ती शोधण्यासाठी तसेच अर्ज प्रक्रिया पूर्ण करण्यासाठी महाविद्यालयाकडून शक्य ती मदत केली जाईल, असे अबेदा पी. इनामदार यांनी स्पष्ट केले.
प्रवेश प्रक्रिया, अभ्यासक्रम आणि शिष्यवृत्तीविषयी अधिक माहितीसाठी विद्यार्थी व पालकांनी अबेदा पी. इनामदार नर्सिंग कॉलेजशी 74474 42103 या क्रमांकावर संपर्क साधावा किंवा apinursing.org या संकेतस्थळाला भेट द्यावी.
