गुरुवार, 24 सप्टेंबर 2026
ज्ञानेश कुमार यांच्या राजीनाम्यासाठी विरोधक आक्रमक; CJP ची दिल्लीत पत्रकार परिषद
दोन्ही निवडणूक आयुक्तांनी काही महत्त्वाचे निर्णय त्यांच्या माहितीशिवाय संपूर्ण निवडणूक आयोगाच्या नावाने घेतले जात असल्याचा दावा केला. यातील काही निर्णय ‘अनधिकृत आणि बेकायदेशीर’ असल्याचेही त्यांनी म्हटल्याचे वृत्तात नमूद करण्यात आले आहे. दरम्यान, कॉकरोच जनता पार्टीने (CJP) गुरुवारी (२४ सप्टेंबर) नियोजित केलेले सर्व कार्यक्रम रद्द केले आहेत. ‘भारतीय लोकशाहीचे अपहरण’ या विषयावर पक्षाचे नेतृत्व दुपारी दिल्ली येथे पत्रकार परिषद घेणार असल्याचे पक्षाकडून सांगण्यात आले.
या आरोपांवर भारतीय निवडणूक आयोगाने बुधवारी स्पष्टीकरण दिले. आयोगाचे सर्व कामकाज कायदे आणि आयोगाच्या निर्देशांनुसारच झाले असल्याचे आयोगाने स्पष्ट केले. गेल्या १० महिन्यांत मंजूर झालेल्या प्रस्तावांची संख्या, घेतलेले निर्णय, जारी केलेले निर्देश आणि विविध उपक्रमांची मोठी संख्या लक्षात न घेता केवळ काही अंतर्गत नोंदी किंवा टिप्पण्यांवर लक्ष केंद्रित करणे म्हणजे ‘चित्राची केवळ एक बाजू दाखवणे’ असल्याचे आयोगाने म्हटले.
दरम्यान, भाजपनेही विरोधकांच्या आरोपांवर प्रतिक्रिया दिली. अधिकृत चर्चेदरम्यान तीन निवडणूक आयुक्तांची वेगवेगळी मते असल्याच्या बातम्या समोर येणे, हे निवडणूक आयोग लोकशाही पद्धतीने काम करत असल्याचे दर्शवते, असा दावा भाजपने केला. यामुळे निवडणूक आयोग ‘हुकूमशाही पद्धतीने’ काम करत असल्याचा विरोधकांचा आरोप चुकीचा ठरत असल्याचेही भाजपने म्हटले.
भाजप मुख्यालयात पत्रकार परिषद घेत पक्षाचे प्रवक्ते संबित पात्रा यांनी सांगितले की, अधिकृत चर्चांमध्ये निवडणूक आयुक्तांनी वेगवेगळी मते मांडल्याच्या बातम्या या ‘खऱ्या लोकशाहीची निशाणी’ असल्याचे त्यांनी म्हटले.
