शनिवार, 3 ऑक्टोबर 2026
बिहारमध्ये पूरस्थिती गंभीर; अनेक नद्यांच्या पाणीपातळीत वाढ, 28 ठिकाणी ऑरेंज अलर्ट जारी (File Photo)
नवी दिल्ली : गेल्या काही दिवसांपासून देशातील अनेक राज्यांत वातावरणात कमालीचा बदल झाल्याचे पाहिला मिळत आहे. बिहारमधील पूरस्थिती गंभीर होत आहे. गंडक नदीचे पाणी सारण जिल्ह्यातील नवीन भागांमध्ये शुक्रवारी पोहोचले. काही ठिकाणी बंधारे फुटल्यानंतर पाणी नवीन भागांमध्ये पसरले. केंद्रीय जल आयोगाने (CWC) ‘ऑरेंज’ बुलेटिन जारी केले आहे, जे अनेक जिल्ह्यांमधील 28 ठिकाणी गंभीर पूरस्थिती दर्शवते. इतर नद्यांमधील पाण्याची पातळीही वाढत आहे.
हवामान विभागाच्या बुलेटिननुसार, अनेक ठिकाणी गंगा नदी धोक्याच्या पातळीच्या वर वाहत आहे. यामध्ये दानापूर, गांधी घाट, हाथीदाह, दिघा घाट, बांका घाट, महनार, कल्याणपूर, काहलगाव आणि सुलतानगंज यांचा समावेश आहे. दानापूरमध्ये गंगा नदीची पाणी पातळी ५१.४४ मीटर होती, जी धोक्याच्या पातळीपेक्षा ०.२४ मीटर जास्त होती. पाटण्यातील गांधी घाटावर पाणी पातळी ४९.६९ मीटर नोंदवली गेली, जी धोक्याच्या पातळीपेक्षा १.०९ मीटर जास्त होती.
सारण जिल्ह्यात, पनापूर आणि मेकर ब्लॉकमधील खराब झालेले बंधारे ओलांडून पुराचे पाणी नवीन भागांत पोहोचले. यामध्ये करचौलिया, अमनौर, जगदीशपूर, मेकर आणि परसा यांचा समावेश आहे. डुमरियाघाट, लालगंज आणि रेवा घाट येथे गंडक नदी धोक्याच्या पातळीच्या वर वाहत होती. मात्र, या तिन्ही ठिकाणी पाणी पातळी कमी होत होती.
कोसीची पाणी पातळी होतेय कमी
लालगंजमध्ये नदीची पाणी पातळी तिच्या मागील सर्वोच्च पूर पातळीपेक्षा (HFL) फक्त ०.१५ मीटर कमी होती. कुरसेला येथे कोसी नदीची पाणी पातळी वाढत होती, तर बाल्टारा येथे कोसीची पाणी पातळी कमी होत होती. खगरिया येथील बुढी गंडक आणि मोहिउद्दीन नगर येथील बाया नदीची पाणी पातळीही वाढत होती.
अनेक नद्यांना धोका वाढला
अधिकाऱ्यांनी सांगितले की, नेपाळ आणि उत्तर प्रदेशात झालेल्या मुसळधार पावसामुळे अनेक नद्या धोक्याच्या पातळीच्या वर वाहत आहेत. यामध्ये गंडक, गंगा, कोसी, बागमती आणि घाघरा नद्यांचा समावेश आहे.
