शुक्रवार, 13 नोव्हेंबर 2026
आसाममध्ये काळाचा घाला! भरधाव मिनी बस कंटेनर ट्रकवर आदळली; २३ प्रवाशांचा मृत्यू, अनेक जखमी
गोलाघाट जिल्ह्यातील राष्ट्रीय महामार्ग ७१५ वर कोहोरा रेंजअंतर्गत हातीकुली टी इस्टेटजवळील रंगाजन परिसरात हा अपघात झाला. प्रवासी मिनी बसची समोरून येणाऱ्या कंटेनर ट्रकशी जोरदार धडक झाली. धडक इतकी भीषण होती की बसमधील अनेक प्रवासी गंभीर जखमी झाले.
गोलाघाटचे जिल्हाधिकारी बिस्वजीत फुकन यांनी दिलेल्या माहितीनुसार, जखमींना उपचारासाठी जवळच्या रुग्णालयात दाखल करण्यात आले आहे. वरिष्ठ पोलीस अधीक्षक स्वप्ननील डेका यांनी सुरुवातीच्या माहितीनुसार २३ जणांचा मृत्यू झाल्याचे सांगितले. बचाव पथकाकडून बसमधून मृतदेह बाहेर काढण्याचे काम सुरू होते. बसमध्ये एकूण किती प्रवासी होते, याची माहिती तातडीने उपलब्ध होऊ शकली नव्हती.
या भीषण दुर्घटनेबद्दल आसामचे मुख्यमंत्री हिमंत बिस्वा सरमा यांनी तीव्र दुःख व्यक्त केले. या दुर्घटनेमुळे मोठा धक्का बसल्याचे त्यांनी म्हटले. मृतांच्या कुटुंबीयांप्रति त्यांनी संवेदना व्यक्त केल्या असून, या कठीण प्रसंगी संपूर्ण आसाम त्यांच्या पाठीशी असल्याचे सांगितले.जखमींना कोणताही विलंब न करता सर्वोत्तम वैद्यकीय सुविधा मिळाव्यात, याला सरकारचे सर्वोच्च प्राधान्य असल्याचे मुख्यमंत्र्यांनी स्पष्ट केले. जखमी लवकर बरे व्हावेत आणि मृतांच्या कुटुंबीयांना या दुःखातून सावरण्याचे बळ मिळावे, अशी प्रार्थनाही त्यांनी केली.
अपघाताची माहिती मिळताच आसामचे पंचायत आणि ग्रामीण विकास मंत्री तसेच स्थानिक आमदार अतुल बोरा घटनास्थळी दाखल झाले. त्यांनी मदत आणि बचावकार्याचा आढावा घेतला. जखमींना कोहोरा मॉडेल रुग्णालयात दाखल करण्यात आले, तर गंभीर जखमींना पुढील उपचारांसाठी जोरहाट मेडिकल कॉलेज आणि रुग्णालयात पाठवण्यात आले.
गोलाघाटचे वरिष्ठ पोलीस अधीक्षक स्वप्ननील डेका यांच्या माहितीनुसार, मिनी बस वेगाने जात होती. काझीरंगा राष्ट्रीय उद्यानाच्या परिसरात लागू असलेल्या वेगमर्यादेचे उल्लंघन झाल्याचा प्राथमिक अंदाज आहे. भरधाव वेगामुळे चालकाचे बसवरील नियंत्रण सुटले आणि बस समोरून येणाऱ्या कंटेनर ट्रकला धडकली असावी, अशी शक्यता पोलिसांनी व्यक्त केली आहे. मात्र, अपघाताचे नेमके कारण अद्याप स्पष्ट झालेले नाही. पोलीस या प्रकरणाचा तपास करत आहेत.
दरम्यान, मध्य प्रदेशातील सागर जिल्ह्यात राष्ट्रीय महामार्ग ४४ वर देवरी पोलीस ठाण्याच्या हद्दीतील गोपालपुरा परिसरात ट्रक आणि एसयूव्हीची समोरासमोर धडक झाली. या अपघातात एसयूव्हीमधील चार जणांचा जागीच मृत्यू झाला, तर अन्य पाच जण गंभीर जखमी झाले. सर्व प्रवासी भैंसा गावातील रहिवासी होते. अमावस्येनिमित्त नर्मदा स्नानासाठी ते बर्मन येथे जात असताना हा अपघात झाला. धडक इतकी जोरदार होती की एसयूव्हीचा चक्काचूर झाला. वाहनात अडकलेल्या प्रवाशांना बाहेर काढण्यासाठी गाडी कापावी लागली.
Ans: प्राथमिक माहितीनुसार, मिनी बस आणि कंटेनर ट्रकच्या धडकेत २३ जणांचा मृत्यू झाला आहे. मृतांचा आकडा वाढण्याची शक्यता पोलिसांनी व्यक्त केली आहे.
Ans: आसाममधील गोलाघाट जिल्ह्यात राष्ट्रीय महामार्ग ७१५ वरील कोहोरा रेंजअंतर्गत हातीकुली टी इस्टेटजवळील रंगाजन परिसरात हा अपघात झाला.
Ans: जखमींना कोहोरा मॉडेल रुग्णालयात दाखल करण्यात आले आहे. गंभीर जखमींना पुढील उपचारांसाठी जोरहाट मेडिकल कॉलेज आणि रुग्णालयात हलवण्यात आले आहे.
