महाराष्ट्रासोबत मध्य प्रदेशातही काँग्रेसला खिंडार; अनेक नेत्यांचा भाजपमध्ये प्रवेश

महाराष्ट्रासह मध्य प्रदेशातून काँग्रेसला जबर धक्का बसला आहे. महाराष्ट्राचे ज्येष्ठ नेते अशोक चव्हाण यांनीही पक्षाचा राजीनामा दिला आहे. इकडे मध्य प्रदेशातही भाजपाचे दिग्गज नेते ज्योतिरादित्य सिंधिया यांनी ग्वाल्हेर शहरातील अनेक नेत्यांना पक्षाचे सदस्यत्व मिळवून दिले.

भोपाळ : महाराष्ट्रासह मध्य प्रदेशातून काँग्रेसला जबर धक्का बसला आहे. महाराष्ट्राचे ज्येष्ठ नेते अशोक चव्हाण यांनीही पक्षाचा राजीनामा दिला आहे. इकडे मध्य प्रदेशातही भाजपाचे दिग्गज नेते ज्योतिरादित्य सिंधिया यांनी ग्वाल्हेर शहरातील अनेक नेत्यांना पक्षाचे सदस्यत्व मिळवून दिले.

भोपाळमध्येही नरोत्तम मिश्रा आणि भाजपाचे प्रदेशाध्यक्ष व्ही.डी. शर्मा यांच्या उपस्थितीत अनेक काँग्रेस नेत्यांनी पक्षात प्रवेश केला. सोमवारी सकाळी विदिशा जिल्हा काँग्रेस अध्यक्ष राकेश कटारे, माजी आमदार दिनेश अहिरवार यांच्यासह अर्धा डझन काँग्रेस नेत्यांनी पक्ष सोडून भाजपमध्ये प्रवेश केला. भाजपमध्ये दाखल झालेल्या काँग्रेस नेत्यांमध्ये टिकमगडचे माजी काँग्रेस आमदार दिनेश अहिरवार यांचा समावेश आहे. याशिवाय छतरपूरचे माजी मंडी उपाध्यक्ष कैलाश द्विवेदी, गौरीहर जिल्हाध्यक्ष तुलसी अनुरागी, काँग्रेस नेते आशिष द्विवेदी आणि अनिल दीक्षित यांचा समावेश आहे.

पक्षानेही केली कारवाई

काँग्रेसने सोमवारीच राकेश कटारे यांना हटवण्याचे पत्र दिले आहे. त्यात असे लिहिले आहे की, प्रदेश काँग्रेस कमिटीने वेळोवेळी दिलेल्या संघटनात्मक मार्गदर्शक सूचनांचे पालन करण्यात निष्क्रिय राहिल्याने त्यांना जिल्हा काँग्रेस अध्यक्षपदावरून तत्काळ प्रभावाने कार्यमुक्त करण्यात येत आहे.

शिंदेंनी दिला ‘दे धक्का’

सोमवारी ग्वाल्हेरच्या जयविलास पॅलेसमध्ये आयोजित कार्यक्रमात केंद्रीय मंत्री ज्योतिरादित्य सिंधिया यांनी काँग्रेसला मोठा धक्का दिला. सिंधिया यांच्या उपस्थितीत काँग्रेसच्या अनेक नेत्यांनी भाजपाचे सदस्यत्व घेतले.