महागाईच्या झळा सोसणाऱ्या सर्वसामान्यांच्या खिशाला आणखी कात्री; एप्रिलमध्ये वाढणार औषधांचे दर

आधीच महागाईच्या झळा सोसणाऱ्या सर्वसामान्यांच्या खिशावरचा बोजा आणखी वाढणार आहे. अनेक वस्तूंचे दर गगनाला भिडले असताना येत्या 1 एप्रिलपासून औषधे महागणार आहेत, ज्यात पेनकिलर्सपासून अँटिबायोटिक्स यांसारख्या 800 औषधांचा समावेश आहे.

नवी दिल्ली : आधीच महागाईच्या झळा सोसणाऱ्या सर्वसामान्यांच्या खिशावरचा बोजा आणखी वाढणार आहे. अनेक वस्तूंचे दर गगनाला भिडले असताना येत्या 1 एप्रिलपासून औषधे महागणार आहेत, ज्यात पेनकिलर्सपासून अँटिबायोटिक्स यांसारख्या 800 औषधांचा समावेश आहे.

‘अॅन्यूअल होलसेल प्राईज इंडेक्स’मधील बदलांच्या अनुषंगाने औषध कंपन्यांना त्यांच्या किंमती वाढवण्याची परवानगी देण्यासाठी सरकार तयार आहे. वाढत्या महागाईमुळे औषधांच्या किंमती वाढवण्याची मागणी केली जात होती. ज्या औषधांचा आवश्यक यादीत समावेश केला जातो, ते बहुतेक लोकांसाठी उपयुक्त असते. या औषधांच्या किंमती सरकार ठरवते, ज्यात अँटी कॅन्सरसारख्या औषधांचा समावेश असतो. कंपनी अशा औषधांच्या किंमतीत वर्षभरात 10 टक्क्यांनी वाढ करू शकते.

पॅरासिटामॉल, अँटीबायोटिक्स, अॅनिमिया, जीवनसत्त्वे आणि खनिजे औषधांच्या किंमती वाढणार आहेत. कोविड-19 च्या मध्यम ते गंभीर आजारी रुग्णांवर उपचार करण्यासाठी वापरण्यात येणारी काही औषधे आणि स्टिरॉइड् देखील या यादीत आहेत.

दर वाढण्यामागचे कारण

गेल्या काही वर्षांमध्ये काही महत्त्वाच्या औषधांचे दर 15 ते 130 टक्के यांच्या दरम्यान आहेत. पॅरासिटामॉलच्या किमतीत 130 टक्के आणि एक्सिपियंट्सच्या किमती 18-262 टक्क्यांनी वाढल्या आहेत. ग्लिसरीन आणि प्रोपीलीन ग्लायकॉलसह सॉल्व्हेंट्स, सिरप अनुक्रमे 263 टक्के आणि 83 टक्क्यांनी महाग झाले आहेत.