Gondiya News: गोंदियात ६२१ सर्वजनिक दुर्गामूर्तीची स्थापना! गरबा-दांडियाचा उत्साह; नवरात्रोत्सवासाठी पोलिसांचा बंदोबस्त

गोंदिया जिल्ह्यात नवरात्रोत्सवानिमित्त धार्मिक कार्यक्रम, गरबा-दांडिया आणि सामाजिक उपक्रमांचे आयोजन करण्यात आले आहे. 621 सार्वजनिक दुर्गामूर्ती, 627 शारदा मूर्तींची स्थापना आणि 43 गरबा आयोजनस्थळांच्या पार्श्वभूमीवर पोलिसांनी व्यापक बंदोबस्त आखला आहे. यात दंगल नियंत्रण पथके, जलद प्रतिसाद पथके आणि होमगार्डचाही समावेश आहे.

• गोंदिया जिल्ह्यात 621 सार्वजनिक मंडळांनी दुर्गामूर्तीची स्थापना केली असून, नवरात्रोत्सवाला उत्साहात सुरुवात झाली आहे.
• जिल्ह्यात 627 ठिकाणी शारदा मातेची स्थापना होणार असून, 43 ठिकाणी गरबा-दांडियाचे आयोजन करण्यात आले आहे.
• नवरात्रोत्सवातील गर्दी आणि सुरक्षेसाठी जिल्ह्यात 2,000 पोलिस अधिकारी-कर्मचारी तैनात राहणार आहेत.

नवरात्रोत्सवाला सुरुवात झाली असून, जिल्हाभरात भक्तिमय वातावरण निर्माण झाले आहे. जिल्ह्यातील ६२१ सार्वजनिक मंडळांनी ढोल-ताशे, टाळ आणि फटाक्यांच्या आतषबाजीत देवीचे स्वागत करून विधिवत पूजा-अर्चा केली आणि दुर्गामूर्तीची स्थापना केली. नऊ दिवस चालणाऱ्या या उत्सवादरम्यान धार्मिक कार्यक्रमांसह गरबा-दांडियाचा उत्साह पाहायला मिळणार आहे. दरम्यान, कायदा व सुव्यवस्था राखण्यासाठी जिल्हा पोलिसांकडून व्यापक बंदोबस्त तैनात करण्यात आला आहे. गोंदिया जिल्ह्यात दुर्गोत्सव मोठ्या उत्साहात साजरा केला जातो. गेल्या पंधरवड्यापासून सार्वजनिक मंडळांकडून मंडप उभारणी, सजावट आणि रोषणाईची तयारी सुरू होती. नवरात्रोत्सवाच्या पार्श्वभूमीवर बाजारपेठाही पूजा साहित्य, विविध रंगांच्या वस्त्रांनी आणि सजावटीच्या साहित्याने सजल्या होत्या. घटस्थापनेच्या पूर्वसंध्येला नागरिकांनी खरेदीसाठी बाजारपेठांत गर्दी केली. यंदा जिल्ह्यात ६२१ ठिकाणी सार्वजनिक मंडळांकडून दुर्गामूर्तीची स्थापना करण्यात आली आहे. तसेच, जिल्ह्यातील विविध मंदिरांमध्ये घटस्थापना करण्यात आली.

Gondiya News: गोंदियात ‘राहुल गांधीं’नी थांबवली गाडी; कार्यकर्त्याशी साधला संवाद! मृत आदिवासी मुलांच्या कुटुंबीयांची घेतली भेट

जिल्ह्यात शारदा मातेचा उत्सवही मोठ्या श्रद्धेने साजरा केला जातो. काही उकाणी दुर्गामूर्तीच्या स्थापनेनंतर तिसऱ्या दिवशी शारदा मातेच्या मूर्तीची स्थापना केली जाते. यंदा जिल्हाभरात ६२७ ठिकाणी शारदा मातेच्या मूतींची स्थापना केली जाणार आहे. जिल्ह्यातील ४३ ठिकाणी गरबा आयोजित केला जाणार आहे. यामध्ये गोंदिया शहर पोलीस ठाण्याच्या हद्दीत आठ, रामनगरमध्ये ११, रावणवाडीत चार, आमगावमध्ये पाच, गोरेगावमध्ये तीन, सालेकसामध्ये तीन, गंगाझरी, देवरी, अर्जुनी मोरगाव आणि नवेगावबांध येथे प्रत्येकी एक, तर दवनीवाडा परिसरात तीन ठिकाणांचा समावेश आहे.

नवरात्रोत्सवादरम्यान भाविकांची गर्दी लक्षात घेता, अनुचित प्रकार टाळण्यासाठी पोलिसांनी कडेकोट बंदोबस्त ठेवला आहे. जिल्ह्यातील सर्व १६ पोलिस ठाण्यांचे प्रभारी अधिकारी आणि इतर अधिकारी परिस्थितीवर लक्ष ठेवणार आहेत. बंदोबस्तासाठी चार दंगल नियंत्रण पथके, दोन जलद प्रतिसाद पथके, सहा ट्रॅकिंग पथके, एक सी-६० पथक आणि बॉम्बशोधक व निकामी करणारी पथके तैनात करण्यात येणार आहेत. याशिवाय ३२० पुरुष आणि ४५ महिला होमगार्डही बंदोबस्तासाठी नियुक्त करण्यात आले आहेत. उत्सवादरम्यान एकूण दोन हजार पोलिस अधिकारी व कर्मचारी तैनात राहणार आहेत.

Gondiya News: हरणाच्या पाडसावर भटक्या कुत्र्यांचा हल्ला; 2 चिमुकल्यांनी धाडसाने वाचवला जीव

नऊ दिवसांच्या कालावधीत मंडळांकडून धार्मिक कार्यक्रम, महाप्रसाद वितरणासह रक्तदान शिबिरे, नेत्रतपासणी आणि आरोग्य तपासणीसारखे सामाजिक उपक्रम राबविले जाणार आहेत. नवरात्रोत्सवात गरबा आणि दांडियाचेही आकर्षण असते. यंदा जिल्ह्यातील ४३ ठिकाणी गरब्याचे आयोजन करण्यात आले आहे. पहिल्या दिवसापासूनच काही ठिकाणी गरबा दांडियाला सुरुवात झाली असून, तरुणाईमध्ये उत्साहाचे वातावरण आहे. दरम्यान, जिल्ह्यातील ६२७ ठिकाणी शारदा मातेच्या मूर्तीची स्थापना केली जाणार आहे.