बिहार : देशभरामध्ये लोकसभा निवडणूकीचे वारे वाहत आहेत. लोकसभेची निवडणूक अंतिम टप्प्यामध्ये आली असून पाच टप्प्यातील मतदान पार पडले आहे. शेवटचे टप्पे चालू असताना भाजपने भोजपुरी सुपरस्टार पवन सिंग यांना धक्का दिला आहे. पक्षाविरोधी भूमिका घेणं पवन सिंग या महागात पडले आहे. भाजपने पत्र लिहित पवन सिंग यांची पक्षातून हकालपट्टी केल्याचे जाहीर केले आहे.
पश्चिम बंगालच्या आसनसोल मतदारसंघासाठी एनडीएकडून भाजपचे पवन सिंग यांना उमेदवारी जाहीर करण्यात आली होती. पवन सिंग यांनी पक्षाचे आभार देखील मानले होते. पहिल्याच यादीमध्ये त्यांची उमेदवारी जाहीर झाली होती. मात्र त्यानंतर अचानक दुसऱ्या दिवशी पश्चिम बंगालमधून त्यांनी निवडणूक लढवण्यासाठी असमर्थता दाखवली. त्यामुळे भाजपने या मतदारसंघातून एसएस अहलूवालिया यांना उमेदवारी दिली. त्यानंतर काही दिवसांनी पवन सिंग यांनी काराकाटमधून लोकसभा निवडणूक लढवणार असल्याचे जाहीर केले.
बिहारमधील काराकाट या लोकसभा मतदारसंघासाठी उपेंद्र कुशवाह यांना उमेदवारी जाहीर केली. मात्र पवन सिंग यांनी देखील निवडणूक लढवण्याचा निर्णय घेतला. भाजप पक्षामध्ये असून देखील पवन सिंग यांनी एनडीए उमेदवारांच्याल विरोधामध्ये निवडणूक लढवण्याचा निर्धार केला. त्यामुळे भाजपने त्यांच्यावर कारवाईचा बडगा उगारला. भाजपचे बिहार प्रदेशाध्यक्ष सम्राट चौधरी यांच्या आदेशावरुन पवन सिंग यांची पक्षातून हकालपट्टी करण्यात आली आहे.
