बुधवार, 19 ऑगस्ट 2026
आता तिसऱ्या बाळासाठी ३६५ दिवसांची प्रसूती रजा मिळणार, सरकारचा मोठा निर्णय
सध्याच्या नियमांनुसार, दोनपेक्षा कमी जिवंत अपत्ये असलेल्या विवाहित नियमित महिला सरकारी कर्मचाऱ्यांना ३६५ दिवसांची प्रसूती रजा मिळते. मात्र, दोन किंवा त्यापेक्षा अधिक जिवंत अपत्ये असलेल्या महिला कर्मचाऱ्यांना तिसऱ्या अपत्यासाठी केवळ १२ आठवड्यांची रजा मिळत होती. आता तिसऱ्या अपत्यासाठीची ही रजा १२ आठवड्यांवरून थेट ३६५ दिवसांपर्यंत वाढवण्यात येणार आहे. त्यामुळे पहिल्या दोन अपत्यांप्रमाणेच तिसऱ्या अपत्यासाठीही वर्षभराची प्रसूती रजा मिळण्याचा मार्ग मोकळा झाला आहे.
झारखंड परीक्षा आंदोलनाला मोठे यश; परीक्षा रद्द झाल्यानंतर देवेंद्र महतो यांच्यासह तिघांचे उपोषण मागे
विधानसभेत निर्णयाची घोषणा करताना मंत्री डी. सरथकुमार यांनी सांगितले की, तामिळनाडू सरकार सामाजिक कल्याण आणि महिला सक्षमीकरणाला प्राधान्य देणारे प्रशासन आहे. त्यामुळे महिला सरकारी कर्मचाऱ्यांना तिसऱ्या अपत्यासाठी सध्या मिळणारी १२ आठवड्यांची प्रसूती रजा वाढवून ३६५ दिवस करण्याचा निर्णय घेण्यात आला आहे.
तामिळनाडूमध्ये महिला सरकारी कर्मचाऱ्यांच्या प्रसूती रजेच्या कालावधीत गेल्या काही वर्षांत टप्प्याटप्प्याने वाढ करण्यात आली आहे.
२०११: ९० दिवसांची प्रसूती रजा वाढवून ६ महिने करण्यात आली.
२०१६: प्रसूती रजा ९ महिन्यांपर्यंत वाढवण्यात आली.
जुलै २०२१: प्रसूती रजा वाढवून ३६५ दिवस करण्यात आली.
आता: तिसऱ्या अपत्यासाठीही ३६५ दिवसांची रजा देण्याचा निर्णय.
घटता प्रजनन दरही चर्चेत
तामिळनाडू सरकारने हा निर्णय घेत असताना राज्यातील बदलत्या लोकसंख्या रचनेचा मुद्दाही चर्चेत आहे. तामिळनाडूचा एकूण प्रजनन दर (TFR) १.४ पेक्षा खाली घसरला आहे, जो लोकसंख्या स्थिर ठेवण्यासाठी आवश्यक मानल्या जाणाऱ्या २.१ रिप्लेसमेंट लेव्हलपेक्षा कमी आहे.
राज्यात वृद्ध लोकसंख्येचे प्रमाणही वाढत आहे. सुमारे १६ टक्के लोकसंख्या ६० वर्षांपेक्षा अधिक वयाची असल्याचे आरोग्यमंत्र्यांनी सांगितले आहे. त्यामुळे भविष्यातील लोकसंख्या रचना आणि सार्वजनिक आरोग्य व्यवस्थेवर त्याचा परिणाम होण्याची शक्यता व्यक्त केली जात आहे.
तामिळनाडूतील घटता प्रजनन दर लक्षात घेता तिसऱ्या अपत्याला प्रोत्साहन देण्याच्या उपाययोजनांवरही चर्चा सुरू आहे. आरोग्यमंत्री के. जी. अरुणराज यांनी दक्षिण भारतातील एका कार्यक्रमात बोलताना लोकसंख्येतील बदल हे सार्वजनिक आरोग्यासमोरील मोठे आव्हान असल्याचे म्हटले होते.
काही राज्यांमध्ये तिसऱ्या अपत्यासाठी प्रोत्साहन देण्याच्या धोरणांचा विचार केला जात आहे. त्यामुळे तामिळनाडूतील तिसऱ्या अपत्यासाठी ३६५ दिवसांच्या प्रसूती रजेचा निर्णय हा केवळ कर्मचारी कल्याणाच्या दृष्टीने नव्हे, तर राज्यातील बदलत्या लोकसंख्येच्या पार्श्वभूमीवरही महत्त्वाचा मानला जात आहे.
भारतात 35 हजार टन सोने घरांत पडून; कर्जासाठी भारतीय नागरिकांची परकीय भांडवलासाठी धडपड
