दिल्लीतील पराभावाचे कारण काय?; काँग्रेसच्या तथ्य शोध समिती अहवालात धक्कादायक माहिती

लोकसभा निवडणुकीत दिल्लीत आम आदमी पक्षाला एकही जागा जिंकता आली नाही. यामुळे आता आप आणि काँग्रेसमध्ये वादाची ठिणगी पडण्याची शक्यता निर्माण झाली आहे. 

नवी दिल्ली :  लोकसभा निवडणुकीत दिल्लीत आम आदमी पक्षाला एकही जागा जिंकता आली नाही. यामुळे आता आप आणि काँग्रेसमध्ये वादाची ठिणगी पडण्याची शक्यता निर्माण झाली आहे.  काँग्रेसने दिल्लीतील पराभवामागे आपला जबाबदार धरल्याची माहिती आता समोर आली आहे. काँग्रेसच्या फॅक्ट फाईंडिंग कमिटीच्या अहवालात ही बाब समोर आल्याचे म्हटले आहे.

आघाडीच्या अंतर्गत दिल्लीत काँग्रेसला सातपैकी तीन जागा मिळाल्या होत्या आणि आम आदमी पक्षाने चार जागांवर उमेदवार उभे केले होते. सातही जागांवर युतीचे उमेदवार पराभूत झाले. काँग्रेसच्या उमेदवारांनी आता पराभवासाठी आम आदमी पार्टीला जबाबदार धरले आहे.

दिल्लीतील पराभवाचा आढावा घेण्यासाठी काँग्रेसने तथ्य शोध समिती स्थापन केली होती. दिल्लीतील तीनही उमेदवारांनी तथ्य शोध समितीसमोर पराभवाची कारणे दिली होती. या समितीने आता आपला अहवाल काँग्रेस अध्यक्ष मल्लिकार्जुन खर्गे यांना सादर केला आहे

आप-काँग्रेसच्या प्रतिनिधींमध्ये समन्वयाचा अभाव
उमेदवारांच्या पराभवाला आम आदमी पक्षच जबाबदार असल्याचे समितीच्या निदर्शनास आले आहे. समितीच्या नेत्यांसोबतच्या झालेल्या  बैठकीत उमेदवारांनी सांगितले की, लोकसभा निवडणुकीत काँग्रेसचे उमेदवार उदित राज, जेपी अग्रवाल आणि कन्हैया कुमार यांनी तथ्य शोध समितीसमोर आरोप केला आहे की आम आदमी पक्ष निवडणुकीत आपली मते हस्तांतरित करण्यात अपयशी ठरला आहे.

यासोबतच काँग्रेसचे संघटन नसणे हेही दिल्लीतील पराभवाचे कारण असल्याचे बोलले जात आहे. तसेच,  निवडणूक प्रचारादरम्यान आम आदमी पक्षाने त्यांना पाठिंबा दिला नसल्याचेही या तीनही नेत्यांनी फॅक्ट फाइंडिंग कमिटीला सांगितले आहे. तथापि, तीनही उमेदवारांनी काँग्रेस केडरशी चांगली वागणूक दिली नाही. त्यामुळे उमेदवारांनाही काँग्रेस कार्यकर्त्यांच्या नाराजीला सामोरे जावे लागले, असेही तथ्य शोध समितीने काँग्रेस अध्यक्षांना सादर केलेल्या अहवालात म्हटले आहे.

दरम्यान, युती अंतर्गत केंद्रशासित प्रदेशात सत्तेत असलेल्या आम आदमी पक्षाने चार तर काँग्रेसने तीन जागांवर उमेदवार उभे केले होते. युतीमध्ये काँग्रेसला उत्तर पश्चिम दिल्ली, चांदनी चौक आणि उत्तर पूर्व दिल्लीच्या जागा मिळाल्या होत्या. पक्षाने उत्तर-पश्चिम मतदारसंघातून माजी केंद्रीय मंत्री उदित राज, चांदनी चौकचे माजी खासदार आणि दिल्ली काँग्रेसचे माजी प्रदेशाध्यक्ष जेपी अग्रवाल आणि उत्तर-पूर्व दिल्लीतून कन्हैया कुमार यांना उमेदवारी दिली होती. काँग्रेसच्या तिन्ही उमेदवारांना मोठ्या फरकाने पराभव स्वीकारावा लागला.