जामखेड / नवराष्ट्र न्यूज नेटवर्क : जामखेड तालुक्यातील आपटी येथे अल्पवयीन प्रेयसी मुलीच्या आत्महत्येनंतर (Couple Suicide) काही तासांतच प्रियकर मुलाने देखील गळफास घेऊन आत्महत्या (Suicide in Jamkhed) केली. एकाच दिवशी दोघा अल्पवयीन मुलगी व मुलाने आत्महत्या केल्याने तालुक्यात एकच खळबळ उडाली आहे. मात्र, दोघांनी आत्महत्या का केली ? याबाबत अद्याप माहिती समजू शकली नाही.
अशोक बंडू कडू (वय १७), व आशा उर्फ (अश्विनी) गोपीनाथ घुले (वय १६, दोघे रा. आपटी, ता. जामखेड) अशी आत्महत्या केलेल्या दोघा अल्पवयीन प्रियकर व प्रियसीची नावे आहेत. बुधवारी (दि. २४) जामखेड तालुक्यातील आपटी या ठिकाणी आशा हीने दुपारी बारा ते एकच्या दरम्यान आपल्या घरी गळफास घेऊन आत्महत्या केली. ती माहिती याच गावात रहाणारा तीचा प्रियकर अशोकला समजली. आपल्या प्रियसीने नक्की आत्महत्या केली आहे का? याची खात्री करण्यासाठी प्रियकर अशोक हा मुलीच्या घरी गेला. त्या वेळी आपल्या प्रियसीने आत्महत्या केली असल्याचे समजले.
व्हॉट्सऍपवर स्टेट्स ठेवत आत्महत्या
मुलीचा मृतदेह शवविच्छेदनासाठी जामखेड ग्रामीण रुग्णालय आणण्यात आला. प्रियकर अशोक कडू याने देखील व्हॉट्सऍपवर मी देखील माझे जीवन संपवत आहे, असा स्टेट्स ठेवला होता. त्याच दिवशी दि. २४ रोजी काही तासातच म्हणजे दुपारी तीनच्या दरम्यान मुलाने देखील शेतातील झाडाला गळफास घेऊन आत्महत्या केल्याची घटना घडली.
अकस्मात मृत्यूची नोंद
दोघांनीही आत्महत्या का केली याची माहिती अद्याप समोर आली नसून दोघांचे प्रेम संबध होते, अशी माहिती समोर आली आहे. पोलीस त्या दृष्टीने तपास करीत आहेत. या बाबत जामखेड पोलीस स्टेशनला अकस्मात मृत्यूची नोंद करण्यात आली आहे. घटनेची माहिती समजताच घटनास्थळी पोलीस निरीक्षक संभाजी गायकवाड, सहायक पोलीस निरीक्षक सुनिल बडे, पोलीस नाईक संभाजी शेंडे, पोलीस कॉन्स्टेबल शशी मस्के व पोलीस कॉन्स्टेबल संजय जायभाय यांनी भेट दिली.
