आघाडीत बिघाडी; प्रकाश आंबेडकर महाविकास आघाडीतून बाहेर! उमेदवारांची यादी जाहीर

वंचित बहुजन आघाडीचे नेते प्रकाश आंबेडकर यांनी आपले उमेदवार जाहीर केले आहेत. त्यामुळे आता प्रकाश आंबेडकर यांनी ‘एकला चलो रे’ चा पवित्रा घेतला असल्याच्या चर्चा रंगल्या आहेत

नागपूर – आगामी लोकसभा निवडणूकीमुळे देशभरातील तसेच राज्यातील राजकीय सूत्रे बदलताना दिसत आहेत. मागील काही दिवसांपासून वंचित बहुजन आघाडी व महाविकास आघाडीमध्ये बिनसलेले दिसून येत होते. आता वंचित बहुजन आघाडीचे नेते प्रकाश आंबेडकर यांनी आपले उमेदवार जाहीर केले आहेत. त्यामुळे आता प्रकाश आंबेडकर यांनी ‘एकला चलो रे’ चा पवित्रा घेतला असल्याच्या चर्चा रंगल्या आहेत. मराठा आंदोलक मनोज जरांगे पाटील यांच्यासोबत बैठक घेत प्रकाश आंबेडकर यांनी निर्णय घेतले आहेत. नागपूरमध्ये पत्रकार परिषद घेत प्रकाश आंबेडकर यांनी आपली भूमिका स्पष्ट केली आहे.

पत्रकार परिषदेला संबोधित करताना प्रकाश आंबेडकर म्हणाले, “वंचित बहुजन आघाडीच्या राज्यसमितीची काल बैठक घेतली. या बैठकीत आगामी निवडणूक लढण्यासंदर्भात आम्ही काही निर्णय घेतले आहेत. आमच्याबरोबर जे आघाडी करण्यासाठी इच्छूक होते. त्यांना आम्ही सांगितले की, महाराष्ट्रातील जरांगे पाटील फॅक्टर लक्षात घ्यावा. पण तो फॅक्टर लक्षात घेतला गेला नाही. जरांगे पाटील यांच्यासह काल आमची बैठक झाली. पहिल्या टप्प्यातील अर्ज भरण्याची मुदत संपत आहे. पण दुसऱ्या आणि तिसऱ्या टप्प्यासाठी विचार विनिमय करून अर्ज करण्याचे आमचे ठरले आहे.” असे मत प्रकाश आंबेडकर यांनी व्यक्त केले.

ते पुढे म्हणाले, भाजपाने मुस्लीमांना बाजूला टाकण्याचं राजकारण सुरू केले आहे. त्यासाठी मुस्लीम समाजाला उमेदवारी देण्याचे आम्ही ठरविले. तसेच जैन समाजालाही उमेदवारी देऊन त्यांना जिंकून आणण्याचा आम्ही निर्धार केला आहे. मराठा, मुस्लीम आणि गरीब ओबीसी यांची सांगड घालून आम्ही नवी वाटचाल करत आहोत. राजकारणात हल्ली प्रचंड पैसा खर्च केला जातो. त्यामुळे निवडून गेलेला नेता जनतेशी बांधिलकी न ठेवता त्याला देणगी देणाऱ्यांशी बांधिलकी ठेवतो. त्यामुळे आम्ही सामान्य जनतेला आवाहन करत आहोत की, गावागावातून लोकांनी पुढे येऊन प्रचार करावा, असे आवाहन प्रकाश आंबेडकर यांनी पत्रकार परिषदेमधून केले.

 

तसेच वंचित बहुजन आघाडीच्या उमेदवारांची नावे जाहीर झाली असली तरी महाविकास आघाडीमधून ते बाहेर पडले आहेत का याबाबत प्रकाश आंबेडकर यांनी उत्तर देणं टाळलं आहे. आज फक्त उमेदवारांची घोषणा करत आहे. प्रश्नोत्तरांना उद्या उत्तर देईल, असेही प्रकाश आंबेडकर यांनी पत्रकार परिषदेत सांगतिले.

वंचित बहुजन आघाडीचे उमेदवार

भंडारा-गोंदिया – संजय गजानन केवट

गडचिरोली-चिमूर – हितेश पांडुरंग मढावी

चंद्रपूर – राजेश बेले

बुलढाणा – वसंत मगर

अकोला – प्रकाश आंबेडकर

अमरावती – प्राजक्ता पिल्लेवान

वर्धा – प्रा. राजेंद्र साळुंखे

यवतमाळ-वाशिम – खेमसिंग प्रतापराव पवार