मुंबई : सुकेश चंद्रशेखरची अंमलबजावणी संचालनालय अर्थात ईडी कसून चौकशी करत आहे.या चौकशीतून सुकेशचं बॉलीवूड कनेक्शनसमोर आलं आहे. बॉलिवूडमधील आणखी टॉप तीन अभिनेत्रींची नावे समोर आली आहेत. सारा अली खान, (Sara Ali khan) जान्हवी कपूर (Jahnvi kapoor) आणि भूमी पेडणेकर(Bhumi pednekar) या सुकेशच्या (Sukesh) जाळ्यात अडकल्या होत्या या तिघींनाही सुकेशने महागड्या वस्तू दिल्या होत्या. याआधी सुकेशने जॅकलिन फर्नांडिस आणि नोरा फतेही (Nora Fateh) यांना भेटवस्तू दिल्या होत्या.
सुकेशने ईडीला सांगितलं की, त्याने २०२१ मध्ये साराला टार्गेट करायला सुरुवात केली. २१ मे रोजी सुकेशने साराला व्हॉट्सअॅपवर मेसेज पाठवला होता. सुकेशने त्याची ओळख साराला सूरज रेड्डी अशी करून दिली होती. साराला पाठवलेल्या मेसेजमध्ये सुकेशने सांगितले की, तिला आणि तिच्या कुटुंबाला त्याला एक गाडी भेटी दाखल द्यायची आहे. याच संदर्भात त्यांची सीईओ मिसेस पिंकी ईरानी यांनी साराशी संपर्क साधण्याचा प्रयत्न केला होता. परंतु संपर्क होऊ शकला नव्हता. मिसेस पिंकी ईरानी ही सुकेशची साथीदार आहे. सुकेश आणि बॉलिवूडमधील अभिनेत्रींमध्ये संवाद घडवून आणण्याचे काम ती करायची. ईरानी हिनेच सुकेशची जॅकलिनशी भेट घालून दिली होती. सारा अलीची ईडीने या भेटवस्तूंबाबत चौकशी केली होती. यासंदर्भात साराने ईडीला १४ जानेवारी २०२२ रोजी नोटीस पाठवली होती. त्यात तिने म्हटले होते की, सुकेश तिला सातत्याने भेटवस्तू पाठवण्याबाबत विचारत होता. परंतु तिने या भेटवस्तू घेण्यास नकार दिला होता. परंतु तो ऐकतच नव्हता. त्यामुळे अखेर त्याला चॉकलेटचा एक बॉक्स पाठवायला सांगितले. तेव्हा त्याने चॉकलेटच्या बॉक्सबरोबर फ्रँक मलर कंपनीचे महागडे घड्याळ पाठवले. या घड्याळ्याची किंमत लाखोंच्या घरात आहे.
साराच्या पाठोपाठ सुकेशने बायको लीना मारिया पॉलच्या माध्यमातून जान्हवी कपूरला टार्गेट करायला सुरुवात केली. लीनाने जान्हवीला तिची ओळख नेल आर्टिस्ट म्हणून करून दिली. १९ जुलै २०२१ मध्ये तिने जान्हवीला बेंगळुरमधील तिच्या सलूनच्या उद्घाटनासाठी आमंत्रित केले.सुकेश आणि लीनाची कोणतीही माहिती न घेता जान्हवी बेंगळुरच्या कार्यक्रमाला गेली. त्यावेळी लीनाने जान्हवीला १८.९४ लाख रुपये मानधन म्हणून दिले. तुरुंगात असताना सुकेशने एका उद्योगपतीच्या बायकोकडून जी खंडणी उकळली होती. त्यातील काही पैसे जान्हवीला दिले. हे पैसे लीनाने थेट जान्वहवीच्या खात्यात जमा केले होते. जान्हवीची ईडीने चौकशी केली होती तेव्हा तिने सांगितले की, त्या उद्घाटनाच्या कार्यक्रमावेळी लीनाच्या आईने ख्रिश्टियन डियॉरची टोट बॅग भेटीदाखल दिली होती. चौकशीवेळी जान्हवीने ईडीला तिच्या बँके अकाऊंटचे सर्व माहिती दिली आहे.
भूमी पेडणेकर हिला देखील सुकेशने टार्गेट केले होते. पिंकी ईरानी हिने सुकेशच्या वतीने भूमीला संपर्क केला. पिंकीने स्वतःची ओळख भूमीला न्यूड एक्स्प्रेस पोस्टची एचआर म्हणून करून दिली. जानेवारी २०२१ मध्ये पिंकीने भूमीला सांगितले की, तिच्या कंपनीचे ग्रुप चेअरपर्सन सुकेश चंद्रशेखर तिचे मोठे चाहते आहे. त्यांना तुझ्याशी एका मोठ्या प्रोजेक्टबाबत बोलायचे आहे. इतकेच नाही तर सुकेशला तुला एक गाडी भेटीदाखल द्यायची आहे. त्यानंतर सुकेशने स्वतःहून भूमीशी संपर्क साधला. त्यावेळी सुकेशने स्वतःची ओळख सांगताना शेखर अशी करून दिली. शेखर उर्फ सुकेशने तिला पिंकी ईरानीने दिलेल्या प्रोजेक्टच्या आणि गाडीच्या ऑफरबद्दल विचारले. त्यानंतर मे २०२१ मघध्ये पिंकी ईरानीने भूमीला मेसेज केला. त्यात तिने लिहिले होते की, सुकेश हा अब्जाधिश आहे. त्याला आपल्या मित्रमंडळींना भेटवस्तू द्यायला आवडतात. त्यामुळेच सुकेशला तुला गाडी भेटीदाखल द्यायची आहे. त्यानंतर सुकेशने भूमीला फोन केला आणि स्वतःची ओळख एनईग्रपचा सुरज म्हणून करून दिली. याप्रकरणी ईडीने भूमीची चौकशी केली असता तिने सुकेशकडून कोणतीही भेटवस्तू मिळाली नसल्याचे सांगितले.
