6 आयुर्वेदिक उपाय, दातदुखीवर रामबाण; Oil Pulling पासून लवंग, हळद-मुलेठी दातांना देईल मजबूती

आयुर्वेदात दातांना कीड आणि जीवाणूंपासून वाचवण्यासाठी, तसेच हिरड्यांची सूज आणि संसर्ग टाळण्यासाठी सोपे उपाय आहेत. दातांच्या समस्यांपासून आराम देण्यासाठी पारंपरिक औषधी वनस्पतींचा वापर

• दातदुखीवर आयुर्वेदिक उपाय 

• दातदुखीसाठी कोणत्या आयुर्वेदिक वनस्पतींचा होतो वापर 

• नैसर्गिकरित्या कसे ठेवाल दात स्वच्छ 

दातदुखी ही एक सामान्य समस्या आहे. ती सहसा दातांमधील पोकळी, किडणे, संवेदनशीलता, हिरड्यांची सूज आणि संसर्गामुळे होते. आयुर्वेदिक उपचार दातांच्या समस्यांवर नैसर्गिक उपाय देतात. आयुर्वेदिक औषधी वनस्पती आणि पद्धती वापरून, तोंडाचे आरोग्य आणि स्वच्छता राखत दातदुखीवर नैसर्गिकरित्या उपचार करता येतात. या लेखात, आपण दातदुखीवरील आयुर्वेदिक उपचारांबद्दल चर्चा करणार आहोत. डॉ. उमाशंकर शर्मा यांनी याबाबत अधिक माहिती दिली आहे.  दातदुखीवरील ६ आयुर्वेदिक उपाय नक्की कोणते आहेत ते जाणून घेऊया. 

दात आणि हिरड्यांच्या नियमित स्वच्छतेव्यतिरिक्त, दातांच्या आरोग्यासाठी कॅल्शियम, व्हिटॅमिन डी आणि फायबरने समृद्ध असलेला सकस आहार आवश्यक आहे. साखर आणि अति गरम किंवा थंड पदार्थ टाळल्याने दातांवरील आवरणाचे (एनॅमलचे) संरक्षण होते आणि दातांची संवेदनशीलता कमी होते. निरोगी दात आणि हिरड्या राखण्यासाठी खालील ६ आयुर्वेदिक उपाय वापरले जाऊ शकतात

लवंग ठरते उत्तम  

लवंग आयुर्वेदातील सर्वात प्रभावी उपायांपैकी एक मानली जाते. लवंगातील युजेनॉल नैसर्गिक वेदनाशामक म्हणून काम करते आणि दातांमधील जीवाणूंपासून संरक्षण करते. लवंगाच्या वापरामुळे दातदुखी कमी होऊ शकते आणि जीवाणूंची वाढ रोखता येते.

वापरण्याची पद्धत: लवंग दाताजवळ धरून हळूहळू चावल्याने आराम मिळतो. लवंग तेल खोबरेल तेलात मिसळून कापसाच्या बोळ्याने दुखऱ्या भागावर लावल्याने आराम मिळतो. लवंग तेलाचा वापर प्रमाणातच करा; अतिवापरामुळे त्वचेला जळजळ होऊ शकते.

Toothache: थंडीत दातदुखीने झालात हैराण? किचनमधील पदार्थ ठरेल रामबाण उपाय

कडुलिंब आहे फायदेशीर 

कडुलिंब एक उत्कृष्ट जीवाणूनाशक आहे. त्याच्या वापरामुळे दातांवरील जीवाणू आणि हिरड्यांच्या सुजेपासून आराम मिळतो. जे नियमितपणे कडुलिंबाचा वापर करतात त्यांच्या हिरड्या मजबूत होतात, ज्यामुळे भविष्यात दातदुखीपासून आराम मिळू शकतो.

वापरण्याची पद्धत: कडुलिंबाच्या काड्यांचा वापर पारंपरिकरित्या नैसर्गिक टूथब्रश म्हणून केला जातो. कडुलिंबाच्या काड्या दातांवरील थर (plaque) काढण्यास, हिरड्यांची सूज कमी करण्यास आणि दातांचे आजार टाळण्यास मदत करतात. कडुलिंबाची पावडर हर्बल टूथ पावडर म्हणूनही वापरली जाऊ शकते.

हळद आहे आयुर्वेदिक रामबाण औषध  

दातदुखीच्या उपचारांमध्ये हळद खूप लोकप्रिय आहे. तिच्यामध्ये जीवाणू नष्ट करण्याची क्षमता असते. हळदीच्या दाह-विरोधी गुणधर्मांमुळे ती हिरड्यांच्या वेदनांवर एक प्रभावी उपचार ठरते.

वापरण्याची पद्धत – हळदीची पावडर पाण्यात किंवा मोहरीच्या तेलात मिसळून टूथपेस्ट म्हणून वापरता येते. या उपचाराने वेदना आणि सूज दोन्ही कमी होण्यास मदत होते. ही पेस्ट जखम भरण्यासही मदत करते.

ज्येष्ठमधाचा करा वापर
आयुर्वेदिक औषधशास्त्रानुसार, ज्येष्ठमधाचे मूळ तोंडाच्या आरोग्यासाठी एक उपयुक्त औषधी वनस्पती मानले जाते. त्याचे जिवाणूविरोधी गुणधर्म दात किडण्यास कारणीभूत असलेल्या जिवाणूंशी लढतात आणि हिरड्यांच्या सुजेपासून आराम देतात.

वापरण्याची पद्धत – ज्येष्ठमधाची पावडर हर्बल टूथपेस्ट म्हणून वापरली जाऊ शकते. त्यामुळे दातदुखीपासून आराम मिळू शकतो. याचा वापर दररोज मर्यादित प्रमाणात केला जाऊ शकतो.

दातांमध्ये साचलेली कीड निघेल बाहेर, आयुर्वेदिक डॉक्टरांनी सांगितले 5 देसी उपाय; तोंडातील दुर्गंधी-रक्तस्त्रावही होईल दूर

मीठ ठरते उपयुक्त 

मिठाच्या पाण्याने गुळण्या करणे तोंडाच्या स्वच्छतेसाठी, घशाच्या त्रासासाठी आणि दातांना जिवाणूंपासून वाचवण्यासाठी फायदेशीर आहे.

वापरण्याची पद्धत: कोमट पाण्यात सैंधव मीठ मिसळून गुळण्या केल्याने हिरड्यांची सूज कमी होते, तोंड स्वच्छ होते आणि शरीरातील संसर्गजन्य पदार्थ निघून जातात. दिवसातून दोन ते तीन वेळा मिठाच्या पाण्याने गुळण्या करणे दातांच्या आरोग्यासाठी फायदेशीर आहे.

ऑइल पुलिंग: आयुर्वेदात, ऑइल पुलिंगला दातांच्या स्वच्छतेचा एक महत्त्वाचा भाग मानले जाते. ऑइल पुलिंगला ‘गंडूषा’ असेही म्हणतात.

वापरण्याची पद्धत: ऑइल पुलिंगमध्ये एक मोठा चमचा तिळाचे तेल किंवा खोबरेल तेल १० ते १५ मिनिटे तोंडात फिरवले जाते. नियमित ऑइल पुलिंगमुळे विषारी घटक आणि जीवाणू निघून जातात, दात व हिरड्या निरोगी राहतात आणि दातांची संवेदनशीलता कमी होते.

दातांची सुरक्षितता सर्वात महत्त्वाची आहे

दातांच्या समस्यांवरील वर नमूद केलेले उपाय सकारात्मक परिणाम देऊ शकतात, परंतु ते वापरताना दातांच्या सुरक्षिततेची खबरदारी घेणे महत्त्वाचे आहे. तीव्र हर्बल तेले पातळ न करता थेट त्वचेवर लावणे टाळा. यामुळे त्वचेला जळजळ होऊ शकते. ज्या लोकांना ॲलर्जी किंवा दातांच्या समस्या आहेत, त्यांनी कोणताही घरगुती उपाय वापरण्यापूर्वी दातांची तपासणी करून घ्यावी. ज्यांना दातांचा गंभीर संसर्ग, गळवे, जखमा किंवा सतत वेदना होत असतील, त्यांनी प्रथम दंतवैद्यकीय उपचार घ्यावेत.

टीप –  हा लेख केवळ सामान्य माहितीसाठी लिहिण्यात आला असून कोणत्याही प्रकारच्या उपचाराचा दावा यामध्ये करण्यात आलेला नाही. कोणताही उपाय करण्यापूर्वी आपल्या डॉक्टरांचा सल्ला घ्या आणि त्यांच्या सल्ल्यानुसारच योग्य बदलानुसार वापर करावा.