शनिवार, 8 ऑगस्ट 2026
'या' पद्धतीने केसांवर लावा आयुर्वेदिक गुणधर्मांनी समृद्ध असलेले आवळ्याचे पाणी
जीवनशैलीतील बदल, खाण्यापिण्याच्या सवयी, प्रदूषण, वातावरणात होणारे बदल, कामाचा वाढलेला तणाव, मानसिक तणाव इत्यादी अनेक गोष्टींचा परिणाम आरोग्यावर लगेच दिसून येतो. हल्ली आरोग्यासोबतच केसांच्या समस्या सुद्धा मोठ्या प्रमाणावर वाढू लागल्या आहेत. केस गळणे, केसांमध्ये कोंडा होणे तर काहीवेळा टाळूवर इन्फेक्शन वाढण्याची जास्त शक्यता असते. तरुण वयात अचानक पांढरे झालेली केस, केस विंचरताना मूठ भरून केस गळणे इत्यादी समस्या उद्भवल्यानंतर महिला गोंधळून जातात. अशावेळी बाजारात उपलब्ध असलेल्या वेगवेगळ्या हेअर केअर प्रॉडक्टचा वापर, हेअर ट्रीटमेंट तर काहीवेळा केसांची गुणवत्ता सुधारण्यासाठी महागड्या गोळ्या औषध सुद्धा खाल्ल्या जातात.(फोटो सौजन्य – istock)
Hair Spa खरंच केसांसाठी फायदेशीर की फक्त पैशांची उधळण; जाणून घ्या
केसांची मूळ कमकुवत झाल्यानंतर केस गळू लागतात. त्यामुळे योग्य वेळी उपचार करणे फार आवश्यक आहे. केसांच्या वाढीसाठी कायमच बाजारत उपलब्ध असलेले हेअर केअर वापरण्याऐवजी आयुर्वेदिक गुणधर्मांनी समृद्ध असलेल्या पदार्थांचा वापर करावा. आज आम्ही तुम्हाला केसांच्या मुळांवर आवळ्याचे पाणी कशा पद्धतीने वापरावे, याबद्दल जाणून घेऊया सविस्तर.
केसांची नैसर्गिक चमक कायम टिकवून ठेवण्यासाठी आवळ्याचे सेवन करण्याचा सल्ला दिला जातो. आवळ्याच्या सेवनासोबतच केसांच्या मुळांवर आवळ्याचे पाणी लावल्यास केस चमकदार आणि मजबूत होतील. आवळ्यामध्ये असलेले विटामिन सी आणि अँटिऑक्सिडंट्सयुक्त घटक अकाली केस पांढरे होण्यापासून बचाव करतात. याशिवाय केस मजबूत ठेवण्यासोबतच केस काळेभोर राहतात. केमिकलयुक्त शाम्पूच्या वापरामुळे केसांची नैसर्गिक चमक नष्ट होते, त्यामुळे आवळ्याच्या पाण्याचा वापर करावा. यामुळे केसांमधील ओलावा कायम टिकून राहतो आणि केस मजबूत, घनदाट होतात.
आवळ्याचे पाणी तयार करण्यासाठी सर्वप्रथम, आवळे स्वच्छ धुवून घ्या. टोपात एक लिटर पाणी गरम करण्यासाठी ठेवा. पाण्याला उकळी आल्यानंतर त्यात आवळे घालून पाण्याला उकळी काढून घ्या. पाण्याचा रंग तपकिरीसर झाल्यानंतर गॅस बंद करून पाणी थंड होण्यासाठी ठेवा. त्यानंतर पाणी गाळून घ्या. तयार केलेले आवळ्याचे पाणी बाटलीमध्ये भरून ठेवा. केस धुवण्याआधी केसांच्या मुळांवर आवळ्याचे पाणी स्प्रे करून काहीवेळ हलक्या हाताने मसाज करा. त्यानंतर १ ते २ तास केस तसेच ठेवून द्या आणि केस पाण्याने स्वच्छ करून घ्या. आवळ्याचे पाणी केसांच्या मुळांवर लावल्यास केस गळणे, केसांमध्ये वाढलेला कोंडा कमी होण्यास मदत होईल.
