हलका, कुरकुरीत आणि आरोग्यदायी… गुजराती स्टाईलमध्ये बनवा ‘मसाला मेथी खाखरा’

Masala Methi Khakhara Recipe : मसाला मेथी खाखरा गरम चहा, लोणचे, दही किंवा चटणीसोबत खायला अतिशय स्वादिष्ट लागतो. हलका, पौष्टिक आणि कुरकुरीत, हा नाश्ता एकदा खाल्ला की पुन्हा पुन्हा खावासा वाटतो!

खाखरा हा गुजरातचा पारंपारिक आणि अतिशय प्रसिद्ध स्नॅक आहे, जो हलका, कुरकुरीत आणि आरोग्यदायी असतो. आजच्या धावपळीच्या जीवनात असा नाश्ता सर्वांना हवासा वाटतो जो चविष्ट, टिकाऊ आणि हेल्दी असावा. असाच एक पदार्थ म्हणजे मसाला मेथी खाखरा! गुजरात स्पेशल खाखरा देशभर प्रसिद्ध आहेत. खाखरा अनेक प्रकारचे बननता येतात आणि बरेच दिवस साठवूनही ठेवले जातात. अशात आज आम्ही तुम्हाला मसाला मेथी खाखरा घरी कसा तयार करायचा याची एक सोपी रेसिपी सांगत आहोत.

तिखट, झणझणीत आणि कुरकुरीत चवीची ‘लसूण शेव’ घरी कशी तयार करायची? पारंपरिक रेसिपी जाणून घ्या

या खाखऱ्यामध्ये मेथीच्या पानांचा ताजेपणा, मसाल्यांचा झणझणीत स्वाद आणि गव्हाच्या पिठाची पौष्टिकता एकत्र येते. सकाळच्या नाश्त्यासाठी, डब्यात, प्रवासात किंवा चहाबरोबर स्नॅक म्हणून हा खाखरा अगदी परफेक्ट पर्याय आहे. हलक्या भकेला शमवण्यासाठीही हा एक चांगला पर्याय आहे. चला तर मग लगेच नोट करुन घेऊयात यासाठी लागणारे साहित्य आणि कृती.

साहित्य:

• गव्हाचे पीठ – १ कप
• बेसन – २ टेबलस्पून
• बारीक चिरलेली मेथीची पाने – ½ कप
• हळद – ¼ टीस्पून
• लाल तिखट – ½ टीस्पून
• धणे-जिरे पूड – ½ टीस्पून
• ओवा– ¼ टीस्पून
• तीळ – १ टीस्पून
• मीठ – चवीनुसार
• तेल – २ टेबलस्पून (आणि भाजण्यासाठी थोडे वेगळे)
• पाणी – लागेल तसे

जिभेवर ठेवताच विरघळून जातील रव्याचे चविष्ट लाडू, नोट करून घ्या मऊसूत लाडू बनवण्याची सोपी रेसिपी

कृती

• एका भांड्यात गव्हाचे पीठ, बेसन, चिरलेली मेथी, हळद, लाल तिखट, धणे-जिरे पूड, ओवा, तीळ आणि मीठ घाला.
• दोन टेबलस्पून तेल घालून सर्व मिश्रण चांगले मळा. हळूहळू पाणी घालून घट्ट पण मऊसर पीठ तयार करा.
• मळलेले पीठ झाकून १५-२० मिनिटे बाजूला ठेवा, त्यामुळे खाखरे अधिक मऊ आणि स्वादिष्ट होतील.
• पीठाचे लहान लहान गोळे करून लाटण्यासाठी तयार ठेवा. प्रत्येक गोळा पुर्‍यासारखा लाटावा.
• खाखरे खूप पातळ लाटावे, कारण खाखरा कुरकुरीत होण्यासाठी पातळ असणे गरजेचे आहे.
• गरम तव्यावर खाखरा ठेवा आणि कमी आचेवर दोन्ही बाजूंनी भाजा. फुगू लागल्यावर कापड किंवा झाऱ्याने दाबत भाजा.
• खाखरे पूर्ण थंड झाल्यावर एअरटाइट डब्यात ठेवा. हे १०-१५ दिवस टिकतात आणि प्रवासासाठी उत्तम स्नॅक ठरतात.
• मेथीच्या ऐवजी पालक किंवा कोथिंबीर वापरूनही हे खाखरे तयार करता येतात.
• भाजताना खाखऱ्यावर थोड तूप लावल्यास त्याची चव आणखीन वाढते.