आहारात करा प्रथिने युक्त पौष्टिक पदार्थाचा समावेश! पारंपरिक पद्धतीने बनवा मोड आलेल्या मुगाची आमटी, नोट करा रेसिपी

आज आम्ही तुम्हाला गरमागरम वाफाळत्या भातासोबत खाण्यासाठी मोड आलेल्या मुगाची आमटी बनवण्याची सोपी रेसिपी सांगणार आहोत. चला तर जाणून घेऊया आमटी बनवण्याची कृती.

रोजच्या आहारात प्रत्येकाला काहींना काही चमचमीत आणि चविष्ट पदार्थ खाण्यास हवे असतात. नेहमीच तीच साधी डाळ खाऊन कंटाळा आल्यानंतर काहींना काही नवीन खाण्याची इच्छा होते. अशावेळी तुम्ही पारंपरिक पद्धतीमध्ये मोड आलेल्या मुगाची आमटी बनवू शकता. लहान मुलांसह मोठ्यांना मोड आलेल्या मुगाची भाजी खायला अजिबात आवडत नाही. त्यामुळे मुलांना वेगवेगळे पदार्थ खाण्यास तुम्ही देऊ शकता. मूग खाल्ल्यामुळे शरीराला भरपूर पोषण मिळते. मोड आलेल्या मुगामध्ये भरपूर फायबर, विटामिन सी, प्रोटीन, अँटिऑक्सिडंट्स, मॅग्नेशियम आणि पोटॅशियम इत्यादी आवश्यक खनिजे आढळून येतात.त्यामुळे आठवड्यातून एकदा तरी आहारात मोड आलेल्या मुगाचे सेवन करावे. घरातील आजारी व्यक्तीला तिखट किंवा तेलकट पदार्थ खाण्यास देण्याऐवजी तुम्ही मुगाची आमटी आणि भात खाण्यास देऊ शकता. चला तर जाणून घेऊया मोड आलेल्या मुगाची आमटी बनवण्याची सोपी रेसिपी.(फोटो सौजन्य – pinterest)

डाळभाताची चव वाढवण्यासाठी १० मिनिटांमध्ये बनवा मसालेदार अंड्याचे काप, लहान मुलांचा आवडता पदार्थ

साहित्य:

• मोड आलेले मूग
• आलं लसूण मिरची पेस्ट
• कोथिंबीर
• लाल तिखट
• हळद
• मीठ
• खोबऱ्याचे वाटण
• कढीपत्ता
• जिरं
• मोहरी
• तेल
• कांदा
• टोमॅटो

गुढीपाडव्यानिमित्त पारंपरिक पद्धतीमध्ये घरी बनवा कडुलिंबाची चटणी, रोगप्रतिकारशक्ती वाढवणारा शक्तिशाली पदार्थ

कृती:

• मोड आलेल्या मुगाची आमटी बनवण्यासाठी सर्वप्रथम, कुकरच्या भांड्यात भिजवलेले मूग घेऊन त्यात चवीनुसार मीठ आणि पाणी घालून मिक्स करा. त्यानंतर कुकरच्या २ शिट्ट्या काढून मूग शिजवून घ्या.
• कढईमध्ये तेल गरम करून त्यात जिरं, मोहरी, हिंग, कढीपत्ता, कांदा आणि टोमॅटो घालून व्यवस्थित मिक्स करा.
• त्यानंतर त्यात चवीनुसार मीठ घालून कांदा टोमॅटो शिजवा. शिजवलेल्या कांद्यात आलं लसूण पेस्ट घालून भाजा.
• कांद्याच्या मिश्रणात लाल तिखट, हळद, गरम मसाला आणि तयार केलेले खोबऱ्याचे वाटप घालून व्यवस्थित मिक्स करा.
• सर्व मसाले व्यवस्थित भाजल्यानंतर त्यात शिजवलेले मूग घालून मिक्स करा आणि आमटी बनवण्यासाठी आवश्यकतेनुसार पाणी घालून शिजवून घ्या.
• आमटीला एक उकळी आल्यानंतर चव वाढवण्यासाठी कोकम घालून मिक्स करून घ्या आणि वरून बारीक चिरलेली कोथिंबीर घाला.
• तयार आहे सोप्या पद्धतीमध्ये बनवलेली मोड आलेल्या मुगाची आमटी.