गर्दीपासून दूर मुंबईपासून काही अंतरावर वसला आहे ‘भारताचा मिनी गोवा’, कमी बजेटमध्ये घेता येईल संस्मरणीय अनुभव

मुंबईजवळील या शांत ठिकाणी समुद्रकिनारे, नारळाची , ऐतिहासिक किल्ले आणि चविष्ट सीफूडसाठी प्रसिद्ध आहे. कमी खर्चात निसर्ग आणि शांतता अनुभवण्यासाठी हे ‘मिनी गोवा’ परफेक्ट वीकेंड डेस्टिनेशन आहे.

• रोजच्या बीजी जीवनातून थोडा वेळ स्वतःसाठी काढा.
• कुटुंबासोबत फिरण्यासाठी एका शांत आणि परवडणाऱ्या ठिकाणाला शोधत असाल तर ही बातमी तुमच्यासाठीच.
• मुंबईपासून काही तासांच्या अंतरावर वसलेल्या या ठिकाणी घेता येईल बीचचा अनुभव.

धावपळीच्या रोजच्या आयुष्यातून थोडा ब्रेक घ्यायचा असेल आणि फारसा खर्च न करता समुद्र, निसर्ग आणि शांततेचा अनुभव घ्यायचा असेल, तर मुंबईजवळच असलेले एक सुंदर किनारी ठिकाण तुमच्यासाठी उत्तम पर्याय ठरू शकते. स्वच्छ समुद्रकिनारे, उंचच उंच नारळाची झाडे, निवांत वातावरण आणि चविष्ट सीफूड यामुळे हे ठिकाण वीकेंड ट्रिपसाठी खास ओळखले जाते. म्हणूनच अनेक प्रवासी याला प्रेमाने “महाराष्ट्राचे गोवा” किंवा “मिनी गोवा” असेही म्हणतात.
या निसर्गरम्य ठिकाणाचे नाव आहे अलीबाग. महाराष्ट्रातील रायगड जिल्ह्यात वसलेले अलीबाग हे अरबी समुद्राच्या काठावर असलेले एक लोकप्रिय बीच टाउन आहे. मुंबईपासून साधारण ९५ किलोमीटर अंतरावर असलेले अलीबाग रस्त्याने किंवा फेरी बोटीद्वारे सहज गाठता येते. शांत समुद्रकिनारे, ऐतिहासिक किल्ले आणि हिरवाई यामुळे अलीबाग गोव्याला एक उत्तम देशी पर्याय मानले जाते.

भारतातील या ठिकाणी असते सर्वाधिक थंडी; तलावही जाते गोठून…

अलीबाग बीच हे येथील प्रमुख आकर्षण आहे. येथूनच समुद्रात उभा असलेला ऐतिहासिक कुलाबा किल्ला दिसतो. ओहोटीच्या वेळी पायी चालत या किल्ल्यापर्यंत जाता येते, हा अनुभव पर्यटकांसाठी खास ठरतो. याशिवाय नागाव बीच, काशीद बीच आणि वरसोली बीच हे गर्दीपासून दूर शांतता शोधणाऱ्यांसाठी उत्तम आहेत. इथले सूर्यास्ताचे दृश्य इतके सुंदर असते की ते एखाद्या पोस्टकार्डसारखे भासते.

इतिहासाची आवड असणाऱ्यांसाठी अलीबाग परिसरात मुरुड-जंजिरा किल्ला, चौल येथील प्राचीन अवशेष आणि काही जुनी मंदिरे पाहण्यासारखी आहेत. साहसप्रेमींना येथे पॅरासेलिंग, जेट स्की, बनाना राइड यांसारखे वॉटर स्पोर्ट्स करून पाहता येतात, जे ट्रिपला अधिक रोमांचक बनवतात.

पाण्यावरचं आलिशान स्वप्न! भारतात ‘या’ ठिकाणी घेता येईल हाऊसबोट्सचा अविस्मरणीय अनुभव

खाण्याचे शौकीन असाल, तर अलीबाग तुम्हाला नक्कीच आवडेल. येथील खास महाराष्ट्रीयन जेवण आणि ताजे सीफूड चवीला अप्रतिम असते. नारळावर आधारित करी, कुरकुरीत फिश फ्राय आणि थंडगार सोलकढी यांचा स्वाद दीर्घकाळ लक्षात राहतो. राहण्यासाठी येथे बजेट होमस्टेपासून ते आरामदायी बीचसाइड रिसॉर्ट्सपर्यंत विविध पर्याय उपलब्ध आहेत. एकूणच, कमी खर्चात निसर्ग, समुद्र आणि शांततेचा अनुभव घ्यायचा असेल, तर अलीबाग ही एक परिपूर्ण वीकेंड डेस्टिनेशन ठरते.