शनिवार, 3 ऑक्टोबर 2026
Jaslok Hospital Mumbai
मुंबई: वैद्यकीय क्षेत्रात विश्वास, परंपरा आणि योगायोगाचे अनेक प्रसंग पाहायला मिळतात, पण जसलोक हॉस्पिटल अँड रिसर्च सेंटरमध्ये नुकतीच घडलेली घटना ही अत्यंत दुर्मीळ आणि भावनिक आहे. १०० वर्षांहून अधिक वय असलेले ज्येष्ठ ईएनटी (नाक, कान, घसा) सर्जन डॉ. ए. सी. जोहारी यांनी नुकतेच स्वतःच्या घशाच्या त्रासावर जसलोक हॉस्पिटलमध्ये उपचार घेतले. गेल्या सहा दशकांपासून मुंबईत वैद्यकीय सेवेत कार्यरत असलेल्या डॉ. जोहारी यांनी आयुष्यात हजारो रुग्णांचे प्राण वाचवले आणि उपचार केले, परंतु यावेळी ते स्वतः रुग्णाच्या भूमिकेत होते.
डॉ. जोहारी यांना घशात सतत जळजळ होणे, काहीतरी अडकल्यासारखे वाटणे आणि अन्न गिळण्यास प्रचंड त्रास होणे यांसारखी लक्षणे जाणवत होती. त्यांचे वय आणि लक्षणे पाहता, घशात काही गंभीर आजार तर नाही ना, याबद्दल चिंता वाटणे स्वाभाविक होते. यासाठी जसलोक हॉस्पिटलच्या ईएनटी ओपीडीमध्ये त्यांची व्हिडिओ लॅरिंन्गोस्कोपी करण्यात आली. तपासणीत घशाच्या भागात लहान पिशवीसारखी रचना दिसून आली, जी एक सामान्य (नॉर्मल) स्थिती असून त्यात कोणत्याही गंभीर किंवा धोकादायक आजाराची चिन्हे आढळली नाहीत. या निष्कर्षांमुळे डॉ. जोहारी आणि त्यांच्या कुटुंबाला मोठा दिलासा मिळाला.
या वैद्यकीय प्रसंगात एक अत्यंत दुर्मिळ योगायोग घडून आला. तब्बल ५० वर्षांपूर्वी (५ दशकांपूर्वी) डॉ. जोहारी यांनी डॉ. दिव्य प्रभात नावाच्या एका लहान मुलीवर सायनसची यशस्वी सर्जरी केली होती. काळाच्या ओघात त्या मुलीने स्वतः ईएनटी सर्जन बनून वैद्यकीय क्षेत्रात नाव कमावले. आज अनेक दशकांनंतर, जेव्हा डॉ. जोहारी रुग्ण म्हणून जसलोक हॉस्पिटलमध्ये (Jaslok Hospital)आले, तेव्हा त्यांच्यावर व्हिडिओ लॅरिंन्गोस्कोपीची तपासणी करणाऱ्या दुसऱ्या कोणी नसून जसलोक हॉस्पिटलच्या ईएनटी सर्जरी कन्सल्टंट डॉ. दिव्य प्रभात याच होत्या.
या भावूक प्रसंगाबद्दल बोलताना जसलोक हॉस्पिटलच्या ईएनटी सर्जरी कन्सल्टंट डॉ. दिव्य प्रभात म्हणाल्या, “डॉ. जोहारी यांच्यासारख्या अनुभवी ईएनटी सर्जनला अशा प्रकारची लक्षणे दिसतात, तेव्हा गंभीर आजाराची चिंता वाटणे स्वाभाविक असते. व्हिडिओ लॅरिंन्गोस्कोपीमुळे तात्काळ स्पष्टता मिळाली आणि स्थिती सामान्य असल्याचे समजताच त्यांच्या चेहऱ्यावरील आनंद पाहणे माझ्यासाठी अत्यंत समाधानकारक होते. ज्या डॉक्टरांनी ५० वर्षांपूर्वी माझ्यावर उपचार केले होते, आज त्यांच्या उपचारात मदत करण्याची संधी मिळणे हा माझ्यासाठी अत्यंत भाग्याचा आणि विलक्षण अनुभव आहे.”
आपला अनुभव सांगताना ज्येष्ठ ईएनटी सर्जन डॉ. ए. सी. जोहारी म्हणाले, “माझे संपूर्ण आयुष्य रुग्णांच्या सेवेत घालवल्यानंतर जेव्हा मला स्वतःला ही लक्षणे जाणवू लागली, तेव्हा मलाही नक्की काय घडत आहे हे जाणून घ्यायचे होते. लॅरिंन्गोस्कोपीमुळे कोणताही गंभीर आजार नसल्याची खात्री पटली. मी ५ दशकांपूर्वी ज्यांच्यावर उपचार केले होते, त्याच डॉक्टरांकडून माझी तपासणी होणे हा एक अद्भुत अनुभव होता. वैद्यकीय क्षेत्र आपल्याला अनपेक्षित मार्गाने अशा योगायोगांच्या टप्प्यावर आणून उभे करते.”
वेळेवर तपासणी आणि विश्वासाचे महत्त्व: या दिलासादायक निष्कर्षांनंतर डॉ. जोहारी यांना केवळ औषधोपचारांचा सल्ला देण्यात आला आहे. घशात जळजळ होणे किंवा गिळण्यास त्रास होणे ही लक्षणे नेहमीच गंभीर आजाराची असतात असे नाही, ती सामान्य कारणांमुळेही असू शकतात. त्यामुळे वेळेवर केलेली ईएनटी तपासणी योग्य कारण शोधून रुग्णाला मोठा मानसिक आधार देते, हेच या घटनेतून अधोरेखित होते.
जसलोक हॉस्पिटल अँड रिसर्च सेंटरचे सीईओ श्री. जितेंद्र हरियाण म्हणाले, “आरोग्यसेवा ही विश्वासावर आधारित असते. ज्या डॉक्टरांनी आपले संपूर्ण आयुष्य रुग्णांच्या सेवेत व्यतीत केले, त्यांनी त्याच प्रकारचा विश्वास आमच्या डॉक्टरांवर ठेवणे ही विशेष सन्मानाची बाब आहे. डॉ. जोहारी यांचा प्रवास त्यांच्या वैद्यकीय कारकिर्दीला एक प्रकारे पूर्णत्व देतो. डॉक्टर म्हणून आपण कितीही अनुभवी असलो, तरी रुग्ण म्हणून उपचारांमधील स्पष्टता, सहानुभूती आणि विश्वास या गोष्टींनाच आपण प्राधान्य देतो, याची आठवण हा प्रसंग करून देतो.”
शरीरात नेहमी थकवा अन् अशक्तपणा जाणवतोय? आहारात समाविष्ट करा ‘हे’ ५ पदार्थ; मॅग्नेशियमची कमी होईल दूर
