जे.जे. रुग्णालयातील डॉक्टरांची कमाल! मेंदूच्या मुख्य धमनीजवळ अडकलेली गोळी सुरक्षितपणे काढली

जळगावमधील गोळीबाराच्या घटनेत एका व्यक्तीच्या कवटीच्या तळाशी गोळी अडकली होती. मेंदूला रक्तपुरवठा करणाऱ्या महत्त्वाच्या धमनीजवळ अडकलेली ही गोळी बाहेर काढण्याचे आव्हान मुंबईतील जे.जे. रुग्णालयाच्या डॉक्टरांनी यशस्वीपणे पेलले.

• गोळी कवटीच्या तळाशी महत्त्वाच्या रक्तवाहिनीजवळ अडकली होती.
• गुंतागुंतीच्या शस्त्रक्रियेसाठी आधुनिक वैद्यकीय तंत्रज्ञानाची मदत घेण्यात आली.
• न्यूरोसर्जरी आणि कान-नाक-घसा विभागाच्या डॉक्टरांनी समन्वयातून शस्त्रक्रिया केली.

जळगावमध्ये फायरिंगच्या घटनेत कानशिलावर पिस्तूल रोखलेले असताना संबंधित व्यक्तीने अचानक हालचाल केल्याने गोळी मेंदूत घुसण्याऐवजी कवटीच्या तळाशी अडकली. त्यामुळे मेंदूला थेट इजा होण्याचा धोका टळला, मात्र मेंदूला रक्तपुरवठा करणाऱ्या महत्त्वाच्या धमनीच्या अगदी जवळ कवटीच्या तळाशी अडकलेली एक सेंटीमीटरची गोळी सुरक्षितपणे बाहेर काढण्याचे आव्हान जे.जे. रुग्णालयातील डॉक्टरांनी यशस्वीरीत्या पेलले. अत्यंत नाजूक भागात अडकलेली ही गोळी बाहेर काढताना रक्तवाहिनीला इजा होण्याचा धोका होता. मात्र, आधुनिक तंत्रज्ञान, अचूक नियोजन आणि न्यूरोसर्जरी व कान-नाक-घसा विभागाच्या डॉक्टरांच्या समन्वयातून ही गुंतागुंतीची शस्त्रक्रिया यशस्वी झाली.

इंडोनेशिया ते थायलंड… जगभरातील या देशांमध्ये मोठ्या जल्लोषात साजरा होते रामलीला

कवटीच्या तळाचा भाग शस्त्रक्रियेसाठी अत्यंत संवेदनशील

वैद्यकीय महाविद्यालय आणि सर जे.जे. समूह रुग्णालयातील डॉक्टरांनी ही शस्त्रक्रिया केली. कवटीच्या तळाचा भाग हा शस्त्रक्रियेसाठी अत्यंत संवेदनशील मानला जातो. त्यातच गोळी अंतर्गत कैरोटिड धमनीच्या जवळ अडकली होती. ही धमनी मेंदूला रक्तपुरवठा करणाऱ्या प्रमुख रक्तवाहिन्यांपैकी एक आहे. त्यामुळे गोळीचे अचूक स्थान शोधणे आणि बाजूच्या महत्त्वाच्या संरचनांना इजा न करता ती बाहेर काढणे हे डॉक्टरांसमोरील मोठे आव्हान होते. या शस्त्रक्रियेसाठी न्यूरो नेव्हिगेशन तंत्रज्ञान, सी-आर्म इमेजिंग आणि एंडोस्कोपिक तंत्राचा वापर करण्यात आला.

या डॉक्टरांनी बजावली अत्यंत मोलाची भूमिका

न्यूरोसर्जरी विभागाचे प्रमुख डॉ. व्हर्नन वेल्हो आणि कान-नाक-घसा विभागाचे प्रमुख डॉ. श्रीनिवास चव्हाण यांच्या मार्गदर्शनाखाली ही शस्त्रक्रिया करण्यात आली. न्यूरोसर्जरी विभागाचे डॉ. हृषिकेश, कान-नाक-घसा विभागाचे सहायक प्राध्यापक डॉ. नवीन सिंह यांच्यासह भूलतज्ज्ञ डॉ. अनंतन कृष्णन आणि निवासी डॉक्टर डॉ. अरुनंधी यांनीही महत्त्वाची भूमिका बजावली. अत्यंत जोखमीच्या भागात अडकलेली गोळी आधुनिक तंत्रज्ञानाच्या मदतीने बाहेर काढल्याने जे.जे. रुग्णालयातील बहुविभाग उपचारपद्धती आणि डॉक्टरांच्या कौशल्याचे दर्शन घडले.

Cortisol Hormone: सकाळी उपाशी पोटी चहा कॉफी पिता? कॉर्टिसॉल हॉर्मोनच्या पातळीमध्ये बिघडल्यानंतर दिसून येतात ‘ही’ गंभीर लक्षणे

जेजे रुग्णालयातील डॉ. श्रीनिवास चव्हाण म्हणाले की, “गोळी आकाराने लहान होती आणि मेंदूच्या आजूबाजूच्या अतिशय नाजूक भागात अडकली होती. त्यामुळे तिचे अचूक स्थान शोधणे हे मोठे आव्हान होते. मात्र, सी-आर्म, न्यूरो नेव्हिगेशन आणि एंडोस्कोपी तंत्रज्ञानाची मदत झाल्याने गोळीचे स्थान निश्चित करून ती सुरक्षितपणे बाहेर काढता आली. मेंदूच्या या नाजूक भागातून गोळी काढण्यासाठी सुमारे चार तास लागले. जळगावमध्ये १२ ऑक्टोबरला गोळी लागल्याची घटना घडली. त्यानंतर रुग्णाला १३ ऑक्टोबरला जे.जे. रुग्णालयात आणण्यात आले आणि १४ ऑक्टोबरला शस्त्रक्रिया करून गोळी काढण्यात आली”.

(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.