Recipe: उरलेल्या भातापासून बनवा क्रिस्पी मंचुरियन, नोट करा झटपट आणि चविष्ट रेसिपी

Leftover Rice Manchurian Recipe: तुम्ही घरच्या घरी उरलेल्या भातापासून चटपटीत मंचुरियन बनवू शकता. ही सोपी रेसिपी नक्की फॉलो करा.

अनेकदा रात्री केलेला भात उरतो आणि तो दुसऱ्या दिवशी कसा वापरायचा हा प्रश्न पडतो. अशावेळी उरलेल्या भातापासून स्वादिष्ट आणि कुरकुरीत मंचुरियन तयार करून तुम्ही घरच्यांना एक भन्नाट इंडो-चायनीज डिश सर्व्ह करू शकता. ही रेसिपी चविष्ट तर आहेच, शिवाय कमी वेळात तयार होते. विशेष म्हणजे मुलांनाही ही डिश खूप आवडते. उरलेल्या भाताचा योग्य वापर करून झटपट तयार होणारी ही रेसिपी संध्याकाळच्या स्नॅक्ससाठी किंवा पार्टी स्टार्टरसाठी उत्तम पर्याय ठरू शकते. मग ही सोपी रेसिपी नोट करा.

मंचुरियन बनवण्यासाठी लागणारे साहित्य –

• २ कप उरलेला भात
• १ बारीक चिरलेला कांदा
• २-३ चमचे बारीक चिरलेली ढोबळी मिरची
• २ चमचे कॉर्नफ्लोअर
• १ चमचा मैदा
• १ चमचा लाल तिखट किंवा चिली फ्लेक्स
• १ चमचा लिंबाचा रस
• मीठ चवीनुसार
• तळण्यासाठी तेल

ग्रेव्हीसाठी लागणारे साहित्य –

• २ चमचे तेल
• ४-५ लसूण पाकळ्या (बारीक चिरलेल्या)
• १ कांदा
• १ टोमॅटो
• २ चमचे टोमॅटो सॉस
• १ चमचा ग्रीन चिली सॉस
• १ चमचा सोया सॉस
• काळी मिरी पावडर
• मीठ चवीनुसार
• पाणी आवश्यकतेनुसार

मंचुरियन बनवण्याची पद्धत

सर्वप्रथम उरलेला भात मिक्सरमध्ये थोडा बारीक करून एका भांड्यात काढून घ्या. त्यात कांदा, ढोबळी मिरची, कॉर्नफ्लोअर, मैदा, चिली फ्लेक्स, लिंबाचा रस आणि मीठ घालून मिश्रण चांगले मळून घ्या. आता त्याचे छोटे गोळे तयार करा. कढईत तेल गरम करून हे गोळे सोनेरी आणि कुरकुरीत होईपर्यंत तळून घ्या. एका पॅनमध्ये तेल गरम करून त्यात लसूण आणि कांदा परता. त्यानंतर ढोबळी मिरची आणि टोमॅटो घालून काही मिनिटांसाठी मंद आचेवर शिजवा. आता टोमॅटो सॉस, ग्रीन चिली सॉस, सोया सॉस, काळी मिरी आणि मीठ घालून मिश्रण एकजीव करा. थोडे पाणी घालून उकळी येऊ द्या. शेवटी तळलेले मंचुरियन बॉल्स ग्रेव्हीत टाकून ३० सेकंद शिजवा. गरमागरम राईस मंचुरियन तुम्ही फ्राईड राईस किंवा नूडल्ससोबत सर्व्ह करू शकता. वरून स्प्रिंग ऑनियन टाकल्यास चव आणखी वाढते.