जेवणानंतर गोड पदार्थ खाण्याची इच्छा होते? १० मिनिटांमध्ये बनवा पौष्टिक शेंगदाणा खोबऱ्याची वडी, नोट करुन घ्या पदार्थ

जेवणानंतर अनेकांना गोड पदार्थ खाण्याची सवय असते. अशावेळी अतिसाखर असलेले पदार्थ खाण्याऐवजी शेंगदाणे खोबऱ्याची वडी खावी. चला तर जाणून घेऊया रेसिपी.

जेवणानंतर प्रत्येकाला काहींना काही गोड पदार्थ खाण्याची इच्छा होते. कधी मिठाई खाल्ली जाते तर काहीवेळा चमचाभर साखर खाऊन गोड पदार्थ खाण्याची क्रेव्हिंग पूर्ण केली जाते. पण नेहमी नेहमी साखर किंवा अतिगोड पदार्थ खाणे शरीरासाठी धोक्याचे ठरू शकते. अतिगोड पदार्थ खाल्ल्यामुळे मधुमेह होण्याची जास्त शक्यता असते. त्यामुळे गोड पदार्थ खाण्याची इच्छा झाल्यास नैसर्गिक गोडवा असलेले पदार्थ खावेत. आज आम्ही तुम्हाला सोप्या पद्धतीमध्ये शेंगदाणे खोबऱ्याची वडी बनवण्याची रेसिपी सांगणार आहोत. हा पदार्थ कमीत कमी साहित्यात झटपट तयार होतो.आहारात शेंगदाण्याचे सेवन केल्यास शरीरात निर्माण झालेली रक्ताची कमतरता भरून निघेल आणि ऊर्जा वाढेल. सकाळच्या नाश्त्यात नियमित एक वडी खाल्ल्यास संपूर्ण दिवस आनंद आणि उत्साहात जाईल. गुळामध्ये असलेला नैसर्गिक गोडवा शरीराचे कोणतेही नुकसान करत नाही. त्यामुळे साखर खाण्याऐवजी गुळाचे सेवन करावे. चला तर जाणून घेऊया शेंगदाणे खोबऱ्याची वडी बनवण्याची सोपी रेसिपी.(फोटो सौजन्य – istock)

Breakfast Recipe: सकाळच्या नाश्त्यासाठी ५ मिनिटांमध्ये बनवा काकडीचे सँडविच, चहा चपातीसाठी उत्तम पर्याय

साहित्य:

• शेंगदाणे
• गूळ
• पांढरे तीळ
• ओल्या खोबऱ्याचा किस
• तूप
• वेलची पावडर
• जायफळ पावडर

Summer Drink: उन्हाळ्यात शरीर राहील थंड! झटपट घरी बनवा Melon-Mint Cooler, नोट करून घ्या रेसिपी

कृती:

• शेंगदाणे खोबऱ्याची वडी बनवण्यासाठी, कढईमध्ये तूप गरम करून घ्या. त्यानंतर त्यात बारीक केलेला सुका मेवा भाजून काढून घ्या.
• त्यानंतर त्यात तूप घालून किसून घेतलेले गूळ घालून आणि पूर्णपणे वितळवून घ्या. गूळ पूर्णपणे वितळवून झाल्यानंतर किसून घेतलेल्या ओल्या खोबऱ्याचा किस घालून व्यवस्थित मिक्स करा.
• भाजून घेतलेले शेंगदाणे साल काढून मिक्सरच्या भांड्यात बारीक वाटून घ्या. त्यानंतर तयार केलेल्या खोबऱ्याच्या मिश्रणात टाकून व्यवस्थित मिक्स करा.
• त्यानंतर त्यात वेलची पावडर आणि जायफळ पावडर घालून व्यवस्थित मिक्स करा. खोबऱ्याचे मिश्रण पूर्णपणे एकजीव करून झाल्यानंतर गॅस बंद करून घ्या.
• केळीच्या पानांवर तूप लावा आणि त्यावर तयार केलेले खोबऱ्याचे मिश्रण एकसमान पसरवून वरून पांढरे तीळ आणि सुका मेवा घालून हलक्या हाताने दाबा.
• सुरीच्या सहाय्याने तुम्हाला हवे त्या आकारात वड्या करून घ्या.
• तयार आहेत सोप्या पद्धतीमध्ये बनवलेल्या शेंगदाणा खोबऱ्याच्या वड्या.