Mouth Ulcer: वारंवार तोंड येतेय का? दुर्लक्ष करू नका; ‘या’ ५ गंभीर आजारांचे असू शकतात संकेत

Frequent Mouth Ulcer Causes: तोंडात अल्सर होणे सामान्य असले तरी ते वारंवार होत असतील किंवा लवकर बरे होत नसतील तर त्याकडे दुर्लक्ष करु नका. यामागची कारणे कोणती, जाणून घ्या.

• वारंवार तोंड येतेय का?
• दुर्लक्ष करू नका
• ‘या’ ५ गंभीर आजारांचे असू शकतात संकेत

अधूनमधून तोंड येणे ही एक सामान्य समस्या आहे. अनेकदा ती काही दिवसांत आपोआप बरी होते. मात्र तुम्हाला वारंवार तोंडात अल्सर होत असेल किंवा बरे होण्यासाठी जास्त वेळ लागत असेल, तर त्याकडे दुर्लक्ष करणे धोकादायक ठरू शकते. तज्ज्ञांच्या मते, तोंडातील अल्सर हे केवळ मसालेदार पदार्थ, तणाव किंवा जीवनसत्त्वांच्या कमतरतेमुळेच होत नाहीत. तर, कधीकधी गे एखाद्या गंभीर आजाराचे सुरुवातीचे लक्षण असू शकते. वारंवार तोंड येण्यामागे कारणे कोणती, जाणून घ्या.

Hair Spa खरंच केसांसाठी फायदेशीर की फक्त पैशांची उधळण; जाणून घ्या

पोषणतत्त्वांच्या कमतरतेमुळे वाढू शकतो धोका

शरीरातील आवश्यक पोषक तत्वांच्या कमतरतेचा परिणाम अनेकदा सर्वप्रथम तोंड आणि त्वचेवर दिसून येतो. शरीरात व्हिटॅमिन B12, लोह आणि फॉलिक अॅसिडची कमतरता असल्यास तोंडाच्या आतील त्वचा कमकुवत होते. ज्यामुळे वारंवार फोड येण्याची समस्या वाढू शकते. याशिवाय, जिभेला जळजळ होणे, तोंडाच्या चवीत बदल, अशक्तपणा, थकवा, चक्कर येणे आणि त्वचा पिवळी पडणे यांसारखी लक्षणे देखील दिसू शकतात.या कमतरता भरून काढण्यासाठी हिरव्या पालेभाज्या, कडधान्ये, दूध, अंडी, मासे आणि सुका मेवा आहारात समाविष्ट करणे उपयुक्त ठरते.

पचनसंस्थेतील विकारही असू शकतात कारण

सीलिअॅक रोग, क्रोहन रोग आणि अल्सरेटिव्ह कोलायटिससारख्या पचनसंस्थेच्या आजारांमुळे शरीराला आवश्यक पोषक तत्त्वे नीट शोषता येत नाहीत. परिणामी तोंडात अल्सर होऊ शकतात. यासोबत पोटदुखी, अतिसार, गॅस, भूक कमी लागणे आणि वजन कमी होणे अशी लक्षणेही जाणवू शकतात. सेलिॲक डिसीजमध्ये, ग्लूटेन नावाच्या प्रथिनावर शरीराच्या प्रतिक्रियेमुळे लहान आतड्यावर परिणाम होतो. क्रोहन डिसीज आणि अल्सरेटिव्ह कोलायटिस हे असे आजार आहेत ज्यामुळे आतड्यांमध्ये सूज येते.

रोगप्रतिकारक शक्ती कमकुवत झाल्यास वाढतो त्रास

जेव्हा शरीराची रोगप्रतिकारशक्ती कमकुवत होते, तेव्हा संसर्गाशी लढण्याची क्षमता कमी होते. यामुळे तोंडात जिवाणू किंवा विषाणूंचा प्रादुर्भाव वाढू शकतो, ज्यामुळे वारंवार तोंडात अल्सर होतातसततचा ताण, अपुरी झोप, अयोग्य आहार किंवा काही औषधांमुळे रोगप्रतिकारक शक्ती कमी होते. अशा वेळी अल्सर लवकर बरे होत नाहीत आणि पुन्हा पुन्हा उद्भवतात.

मधुमेहाचेही असू शकते लक्षण

जेव्हा रक्तातील साखरेची पातळी दीर्घकाळ नियंत्रणात राहत नाही, तेव्हा शरीराची संसर्गाशी लढण्याची क्षमता कमी होऊ शकते. यामुळे तोंडात जिवाणू किंवा बुरशीजन्य संसर्गाचा धोका वाढतो, ज्यामुळे अल्सर होते.मधुमेहींना तोंड कोरडे पडणे, हिरड्यांच्या समस्या, वारंवार होणारे संसर्ग आणि जखमा उशिरा भरणे यांसारख्या समस्यांचाही त्रास होऊ शकतो.

ऑटोइम्यून आजार

काही स्वयंप्रतिरोधक रोगांमध्ये, शरीराची रोगप्रतिकार प्रणाली चुकून स्वतःच्याच निरोगी टिश्यूजवर हल्ला करते. अशा परिस्थितीत वारंवार तोंड येण्याची समस्या होऊ शकते. बेसेट सिंड्रोम ही एक अशी स्थिती आहे, ज्यामध्ये तोंडात फोड किंवा डोळ्यांखाली सूज येऊ शकते. ल्युपससारख्या आजारांमध्ये, तोंडाच्या आतदेखील फोड येऊ शकतात.

कधी डॉक्टरांचा सल्ला घ्यावा?

जर अल्सरसोबत तीव्र वेदना, ताप, वारंवार संसर्ग, वजन झपाट्याने कमी होणे अशी लक्षणे दिसत असतील तर विलंब न करता डॉक्टरांचा सल्ला घेणे आवश्यक आहे.

टीप – हा लेख केवळ सामान्य माहितीसाठी लिहिण्यात आला असून कोणत्याही प्रकारच्या उपचाराचा दावा यामध्ये करण्यात आलेला नाही. कोणताही उपाय करण्यापूर्वी आपल्या डॉक्टरांचा सल्ला घ्या.

Analogue Paneer: तुम्हीही खात नाही ना बनावट पनीर? कसे तयार होते; आरोग्यासाठी किती धोकादायक