Ukadiche Modak Recipe: मोदकांना द्या सुंदर कळीदार आकार! प्लास्टिकच्या पिशवीची ही ट्रिक पाहून तुम्हीही म्हणाल ‘वा!’

Ukadiche Modak Recipe: गणेशोत्सवात उकडीचे मोदक बनवताना सुंदर कळीदार आकार देणे अनेकांसाठी आव्हानात्मक ठरते. मात्र मोदकाची उकड मऊ आणि व्यवस्थित मळलेली असेल तर कळ्या पाडणे सोपे जाते.

• मोदकाची पारी मऊ असणे सर्वात महत्त्वाचे.
• पारीच्या कडा बारीक आणि मधला भाग थोडा जाड ठेवा.
• उकड ओल्या कापडाने झाकल्यास ती मऊ राहते.

गणपती बाप्पा घरी आले की स्वयंपाकघरातून सर्वात आधी आठवण येते ती मोदकांची. गरमागरम उकडीचे मोदक आणि त्यातून येणारा नारळ-गुळाचा वास म्हणजे गणेशोत्सवाची खास मजाच. पण मोदक बनवताना एक काम अनेकांना कठीण जाते, ते म्हणजे त्याला छान कळ्या पाडणे.

हाताने कळ्या काढताना त्या कधी मोठ्या तर कधी छोट्या होतात. काही वेळा मोदक बंद करताना सगळ्या कळ्यांचा आकारही बिघडतो. त्यामुळे अनेक जण थेट बाजारातून मोदकाचा साचा घेऊन येतात. मात्र घरात असलेल्या काही साध्या वस्तूंच्या मदतीनेही हे काम सोपे करता येते. Ukadiche Modak Recipe:

पारी मऊ असणे सगळ्यात महत्त्वाचे

मोदक सुंदर दिसण्यासाठी सुरुवातीपासूनच पारीकडे लक्ष द्यावे लागते. उकड नीट मळलेली आणि मऊ असेल तर पुढचे काम सहज होते. उकड कडक झाली तर पारी करताना ती तुटू शकते.

तयार पीठ बराच वेळ उघडे ठेवू नका. ओल्या कापडाने झाकून ठेवल्यास ते मऊ राहते. मोदकासाठी छोटा गोळा घेऊन हाताने नीट फिरवून घ्यावा. हाताला चिकटत असल्यास अगदी थोडे तूप वापरता येते.

पारीचा मधला भाग थोडा जाड ठेवला तर मोदक भरताना आणि बंद करताना तो फाटत नाही. कडा मात्र तुलनेने बारीक असाव्यात. पारी तयार झाल्यावर तिला हाताने हळूहळू वाटीसारखा आकार द्यावा.

प्लास्टिकच्या शीटची भन्नाट मदत

हाताने कळ्या पाडणे जमत नसेल तर स्वच्छ आणि जाड प्लास्टिकचा तुकडा वापरून पाहा. पारी प्लास्टिकवर ठेवून त्यावर दुसरा तुकडा ठेवावा. त्यानंतर हलक्या हाताने पारी लाटावी.

पारी तयार झाल्यावर वरचा प्लास्टिकचा भाग काढून त्यात सारण भरावे. आता प्लास्टिकच्या मदतीने पारी वर उचलत हळूहळू तिच्या कडा एकत्र आणाव्यात. बोटांनी जास्त दाब देण्याची गरज नाही. हलक्या चिमटी घेत गेल्यास कळ्यांसारखा आकार तयार होतो. या पद्धतीत सुरुवातीला थोडा सराव लागेल, पण हात बसल्यानंतर मोदकाचा आकार चांगला येतो.

चमच्याने आधी खुणा करा

कळ्या पडतात, पण त्या एकसारख्या दिसत नाहीत, अशी अडचण असेल तर एक छोटी युक्ती वापरता येते. पारी लाटल्यानंतर छोट्या वाटीने तिच्या मध्यभागी हलकी गोल खूण करा.

त्यानंतर चमच्याच्या मागच्या बाजूने पारीवर समान अंतरावर हलक्या खुणा द्याव्यात. साधारण आठ ते बारा ठिकाणी अशा खुणा करता येतील. मात्र पारी कापायची नाही, फक्त निशाणी करायची आहे.

Workout and Heart Health: वर्कआऊट फायदेशीर, पण ‘या’ चुका पडू शकतात महागात; हृदयाची काळजी कशी घ्याल?

आता प्रत्येक खुणेच्या ठिकाणी अंगठा आणि तर्जनीने हलकी चिमूट घेत गेल्यास कळ्या जवळपास समान आकाराच्या दिसतात. सुरुवातीला ही पद्धत उपयोगी पडते. नंतर हाताला सवय झाली की खुणा करण्याचीही गरज राहत नाही.

दोन वाट्यांची पद्धतही सोपी

घरात दोन वेगवेगळ्या आकाराच्या छोट्या वाट्या असतील तर त्यांचाही उपयोग करता येतो. लहान वाटीत प्लास्टिकचा तुकडा ठेवून त्यावर पारी ठेवावी. हाताने हलका दाब देऊन पारीला वाटीचा आकार द्यावा.

गरज वाटल्यास त्यावर दुसरी वाटी ठेवून अगदी हलका दाब देता येतो. त्यामुळे पारीचा आकार व्यवस्थित होतो. त्यात सारण भरल्यानंतर प्लास्टिकच्या मदतीने कडा वर आणून मोदक बंद करता येतो. ही पद्धत विशेषतः ज्यांना बोटांनी पारीचा आकार देणे अवघड जाते त्यांच्यासाठी सोयीची ठरू शकते.

घरच्या घरी कागदाचा साचाही बनवता येतो

मोदकाचा तयार साचा नसेल तर बटर पेपरची मदत घेता येते. कागदाची काही वेळा घडी करून गोल आकारात कापावा आणि त्यावर ठरावीक अंतराने छोटे कट द्यावेत. कागद उघडल्यानंतर समान अंतरावर खाचा तयार होतील.

त्यावर पारी ठेवून प्रत्येक खाचेच्या जागी हलकी चिमूट घेतली की कळ्यांचा आकार तयार होतो. ही पद्धत वापरताना कागद स्वच्छ आणि अन्नपदार्थांसाठी योग्य असणे महत्त्वाचे आहे.

घरातील लाकडी फर्निचरला अचानक वाळवी लागल्यास ती नष्ट करण्यासाठी सोपे आणि प्रभावी घरगुती उपाय कोणते? जाणून घ्या

शेवटच्या टप्प्यात घाई नको

मोदकाच्या कळ्या तयार झाल्यानंतर सारण भरावे आणि मग सावकाश कडा बंद कराव्यात. बंद करताना जास्त जोर लावला तर आधी केलेल्या कळ्या सपाट होऊ शकतात. मोदकाचे वरचे टोकही हलक्या हाताने बंद करावे. पारी कुठे कोरडी वाटत असेल तर अगदी थोडे तूप लावता येते. मात्र जास्त तूप वापरल्यास कडा एकमेकांना चिकटवताना अडचण येऊ शकते.