मंगळवार, 3 नोव्हेंबर 2026
डोंबिवली : आपल्या मुलीला आणि मुलाला भेटण्यासाठी गेलेल्या बापाला आणि बापाच्या आईला बेदम मारहाण केल्याची घटना डोंबिवलीत घडली आहे. धक्कादायक म्हणजे सासरच्या मंडळींनी वयोवृद्ध आजीला अर्ध नग्न करून बेदम मारहाण केली आहे. घटनेचा व्हिडिओ सोशल मीडियावर व्हायरल झाला आहे. याप्रकरणी टिळक नगर पोलिसांनी गुन्हा दाखल करत पुढील कारवाई सुरू केली आहे.
डोंबिवली पूर्वेतील खंबाळपाडा येथील भोईरवाडी परिसरात राहणाऱ्या अजय कुशवाहा यांच्या पत्नीसोबत वाद सुरू आहे. पत्नी आपल्या मुली आणि मुलासोबत आपल्या आई-वडिलांसोबत राहते. पती-पत्नीमध्ये वाद सुरू असल्याने घटस्फोट प्रक्रिया सुरू आहे. दोन दिवसांपूर्वी अजय आपल्या मुली आणि मुलाला भेटण्यासाठी आपल्या सासुरवाडीत गेला होता. त्या ठिकाणी आधी त्याला आपल्या मुली आणि मुलाला भेटून दिले नाही नंतर त्याच्या मेव्हण्याने आपला काही मित्रांना बोलून त्या ठिकाणी अजयला बेदम मारहाण केली. मग मध्यस्थी करायला गेलेल्या अजयची आईला देखील महिलांनी आणि पुरुषांनी मारहाण केली.
या मारहाणी दरम्यान अजयच्या आईचे कपडे फाटले कपडे फाटेपर्यंत तिला मारहाण सुरू होती. या घटनेचा व्हिडिओ सोशल मीडियावर चांगलाच व्हायरल झाला आहे. या प्रकरणात डोंबिवलीतील टिळक नगर पोलिसांनी अमानुषपणे मारहाण करणाऱ्या गणेश सिंग, अरविंद सिंग, नयना देवी यांच्या विरोधात गुन्हा दाखल केला आहे. या प्रकरणात टिळक नगर पोलिसांनी पुढील तपास सुरू केला आहे. मात्र या प्रकारे अमानुषपणे मारहाण करण्यात विरोधात ठोस कारवाई झाली पाहिजे अशी मागणी केली जात आहे. या मारहाणीत गंभीर जखमी असलेल्या अजयची आईवर डोंबिवलीतील शास्त्रीनगर रुग्णालयात उपचार सुरू आहेत.
