मंगळवार, 29 सप्टेंबर 2026
निसरेफाटा-गिरेवाडी मार्गावर अपघातांचे सत्र सुरुच; अवघ्या आठवडाभरात तिघांचा बळी
मल्हारपेठ : पाटण-कराड रस्त्यावरील निसरेफाटा, गिरेवाडी व मल्हारपेठ परिसरात गेल्या काही दिवसांपासून अपघातांचे प्रमाण वाढल्याने नागरिकांमध्ये चिंतेचे वातावरण निर्माण झाले आहे. या मार्गावर अवघ्या आठवडाभरात सलग झालेल्या अपघातांमध्ये तिघांचा मृत्यू झाल्याने रस्ते सुरक्षेचा प्रश्न पुन्हा ऐरणीवर आला आहे.
निसरेफाटा–गिरेवाडी–मल्हारपेठ परिसरातील रस्त्यावर दिवसभर मोठ्या प्रमाणात वाहनांची वर्दळ असते. त्यातच काही वाहनचालकांकडून भरधाव वेगाने वाहने चालविणे, वाहतुकीच्या नियमांकडे दुर्लक्ष करणे तसेच मद्यसेवन करून वाहन चालविण्याचे प्रकार होत असल्याच्या तक्रारी नागरिकांकडून व्यक्त होत आहेत. परिणामी, किरकोळ अपघातांबरोबरच गंभीर अपघातांचे प्रमाण वाढत असल्याचे चित्र दिसून येत आहे.
गेल्या आठ दिवसांत घडलेल्या सलग अपघातांमध्ये तिघांना आपला जीव गमवावा लागल्याने परिसर हादरला आहे. विशेषतः तरुणांकडून वेगाने वाहने चालविण्याचे प्रकार वाढत असल्याची चर्चा असून, रात्रीच्या वेळी या मार्गावर वाहनांची तपासणी व गस्त वाढविण्याची मागणी नागरिकांकडून होत आहे.
‘बेधुंद वेगाला आवर घालण्याची गरज’
मद्यसेवन करून वाहन चालविणे हे वाहनचालकासह इतर निष्पाप नागरिकांच्या जीवासाठीही धोकादायक ठरू शकते. त्यामुळे पोलिस प्रशासनाने या मार्गावर विशेष मोहीम राबवून मद्यपी वाहनचालकांची तपासणी करावी, वेगमर्यादेचे उल्लंघन करणाऱ्या वाहनांवर कारवाई करावी तसेच रात्रीच्या वेळी नियमित गस्त वाढवावी, अशी मागणी नागरिकांकडून होत आहे.
दरम्यान, अपघातांची मालिका सुरू राहिल्याने पालकांचीही चिंता वाढली आहे. तरुण मुलांनी दुचाकी अथवा चारचाकी वाहने चालविताना वेगावर नियंत्रण ठेवावे, मद्यसेवन करून वाहन चालवू नये आणि वाहतुकीचे नियम पाळावेत, असे आवाहन पालक व सामाजिक कार्यकर्त्यांकडून करण्यात येत आहे.
या मार्गावरील अपघातप्रवण ठिकाणांची पाहणी करून आवश्यक त्या ठिकाणी गतिरोधक, दिशादर्शक फलक, रिफ्लेक्टर, पथदिवे व इतर सुरक्षा उपाययोजना कराव्यात. तसेच वाहतूक व पोलीस प्रशासनाने संयुक्तपणे जनजागृती मोहीम राबवावी, अशी मागणी जोर धरत आहे.
वाहतुकीचा प्रश्न बनला गंभीर
सलग अपघातांमुळे निसरेफाटा–गिरेवाडी–मल्हारपेठ मार्गावरील सुरक्षित वाहतुकीचा प्रश्न गंभीर झाला असून, आणखी जीवितहानी होण्यापूर्वी प्रशासनाने तातडीने उपाययोजना कराव्यात, अशी अपेक्षा नागरिक व्यक्त करत आहेत.
