कर्जतमध्ये भाजपाची 'इनकमिंग' वाढवणारे शिंदेंच्या शिवसेनेला झाले कनेक्ट!
कर्जत-जामखेड मतदारसंघात अचानक घडलेल्या राजकीय हालचालींनी स्थानिक राजकारणात मोठी खळबळ उडवली आहे. कर्जत नगरपंचायतीतील सत्तासमीकरणांवर निर्णायक प्रभाव असलेले भाजप नेते प्रवीण घुले आणि सचिन घुले यांनी समर्थकांसह उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करत नवे राजकीय संकेत दिले आहेत.
तीन वर्षांपूर्वी प्रविण घुले यांनी काँग्रेसमधून त्यावेळी उपमुख्यमंत्री असलेले देवेंद्र फडणवीस यांच्या उपस्थितीत भाजपात प्रवेश केला होता. खुल्या प्रवर्गातील घुले हे पहिले प्रस्थ विधानपरिषदेचे सभापती प्रा. राम शिंदें यांना मिळाले होते. त्यांच्या पक्षप्रवेशानंतर कर्जत-जामखेड मतदारसंघात भाजपात ‘इनकमिंग’ वाढले. त्याचा फायदा २०२४ च्या विधानसभा निवडणुकीत प्रा. राम शिंदे यांना झाला. त्यांचा केवळ १२४३ मतांनी निसटता पराभव झाला. घुले बंधुंनी घेतलेला हा निर्णय भाजप नेते सभापती प्रा. राम शिंदे यांना धक्का मानला जातो.
स्थानिक पातळीवर किंगमेकर म्हणून ओळख असलेल्या घुले बंधूंच्या या पावलामुळे कर्जत नगरपंचायतीतील सत्तेचे संतुलन बदलण्याची चिन्हे दिसत आहेत. घुले बंधूंचा प्रभाव केवळ नगरपंचायतीच्या माध्यमातून केवळ कर्जत शहरापुरता मर्यादित नसून ग्रामीण भागातही त्यांचे मजबूत जाळे आहे. पूर्वी २०१९ ला रोहित पवार यांच्या राजकीय घडामोडींमध्येही त्यांची भूमिका महत्त्वाची राहिली होती. २०२४ ला प्रा. राम शिंदेंना कर्जत तालुक्यातून लक्षणीय मते मिळाली. यामध्येही घुले बंधू यांचे योगदान महत्त्वाचे ठरले होते. त्यामुळे त्यांच्या पक्षांतराकडे केवळ स्थानिक घटना म्हणून नव्हे, तर भविष्यातील व्यापक राजकीय रणनीती म्हणून पाहिले जात आहे.
या घडामोडींमुळे सर्वांचे लक्ष कर्जत नगरपंचायतीच्या नगराध्यक्षा रोहिणी घुले यांच्या भूमिकेकडे लागले आहे. कुटुंबातील प्रमुख सदस्यांनी शिवसेनेत प्रवेश केल्यानंतर त्या भाजपमध्ये कायम राहणार की नवा राजकीय निर्णय घेणार, याकडे मतदारसंघाचे लक्ष लागले आहे. त्यांच्या पुढील पावलावर नगरपंचायतीतील सत्तेचे भवितव्य अवलंबून राहणार असल्याचे स्पष्ट होत आहे.
भाजपाला रामराम ठोकून शिवसेनेत प्रवेश करण्याच्या घुले बंधूच्या निर्णयाची चाहूल आधीच सोशल मीडियाद्वारे लागली होती, समर्थकांनी ‘जय महाराष्ट्र’चे स्टेटस शेअर करत बदलांचे संकेत दिले होते. त्यानंतर मुंबईत जाऊन त्यांनी अधिकृतरित्या शिवसेनेत प्रवेश केला. त्यांच्या या प्रवेशानंतर घुले बंधूच्या भूमिकेबाबत सुरू असलेल्या वर्षांना पूर्णविराम मिळाला.
राजकीय जाणकारांच्या मते, हा केवळ पक्षप्रवेश नसून २०२९ च्या विधानसभा निवडणुकीच्या दृष्टीने आखलेली रणनीती असू शकते, कर्जत-जामखेड मतदारसंघात घुले कुटुंबाचा प्रभाव लक्षात घेतल्यास, या बदलाचा परिणाम आगामी काळात अधिक ठळकपणे जाणवण्याची शक्यता आहे. एकूणच घुले बंधूच्या या निर्णायक पावलामुळे कर्जत-जामखेडमधील राजकारण नव्या टप्प्यात प्रवेश करत आहे. पुढील काही दिवसांत आणखी मोठ्या घडामोडी घडण्याची शक्यता नाकारता येत नाही.
.png "Videos"){kind=small}
