भाजपमधील अंतर्गत वाद उफाळला, दिलीप माने यांच्या प्रवेशाला विरोध; कार्यकर्त्यांचा पक्ष कार्यालायासमोर ठिय्या

काँग्रेसचे माजी आमदार दिलीप माने यांच्या भाजपा पक्षप्रवेशाला दक्षिण सोलापूर तालूक्यातील कार्यकर्त्यांनी विरोध करित पक्ष कार्यालयासमोर ठिय्या मांडला.

सोलापूर : काँग्रेसचे माजी आमदार दिलीप माने यांच्या भाजपा पक्षप्रवेशाला दक्षिण सोलापूर तालूक्यातील कार्यकर्त्यांनी विरोध करित पक्ष कार्यालयासमोर ठिय्या मांडला. दिलीप माने यांच्या पक्षप्रवेशाआधीच पक्षात दुफळी निर्माण झाल्याचं चित्र दिसून येत आहे. पार्टी विथ डिफरन्स म्हणणाऱ्या भारतीय जनता पार्टीतील भाजपच्या कार्यकर्त्यांनी सोलापुरातील भाजप कार्यालयासमोर धरणे आंदोलन करुन सर्वांचे लक्ष वेधले आहे. जिल्ह्यातील काँग्रेस-राष्ट्रवादी काँग्रेसचे चार माजी आमदार भाजपात प्रवेश करणार आहेत. मात्र आता काँग्रेसचे माजी आमदार दिलीप माने यांच्या भाजप प्रवेशाला भाजप पदाधिकाऱ्यांकडूनच विरोध करण्यात येत आहे.

याविरोधात भारतीय जनता पार्टीचे दक्षिण सोलापूर तालुक्यातील पदाधिकारी यांनी धरणे आंदोलन सुरू केलं होतं. घोटाळ्यात बुडालेल्या आणि जनतेची फसवणूक करणाऱ्या कलंकित नेत्यांच्या पक्ष प्रवेशाचा जाहीर निषेधेच्या घोषणा देण्यात आल्या. दरम्यान आंदोलनावेळी भाजपमध्ये दिलीप माने यांचा प्रवेश मान्य नाही, अशा घोषणा भाजप कार्यकर्त्यांनी दिल्या आहेत. कार्यालयासमोर आंदोलन करणाऱ्या कार्यकर्त्यांची समजूत घालण्यासाठी भाजप शहराध्यक्ष रोहिणी तडवळकर पोहोचल्या. त्यावेळी कार्यकर्त्यांनी आणि पदाधिकाऱ्यांनी कलंकित नेत्यांना प्रवेश नको, अशी जोरदार घोषणाबाजी आणि गोंधळ सुरु केला, त्यानंतर भाजप शहराध्यक्ष रोहिणी तडवळकरयांनी सर्वांची समजूत घातली आणि सर्वांची निवेदने घेतली.

आंदोलनकर्त्यांशी चर्चा झाल्यानंतर भाजप शहराध्यक्ष रोहिणी तडवळकर यांनी माध्यमांशी संवाद साधला. यावेळी बोलताना त्या म्हणाल्या, दक्षिण सोलापूरच्या सर्व पदाधिकाऱ्यांनी भारतीय जनता पार्टी कार्यालयासमोर आज जे नवीन प्रवेश होणार आहेत त्यासंदर्भात आंदोलन केलेलं आहे. परंतु भाजपची भूमिका स्पष्ट आहे, प्रदेशाध्यक्ष, मुख्यमंत्री आणि पालकमंत्री यांच्या समवेत या सर्व गोष्टींची चर्चा होऊन हे निर्णय होत असतात. त्यामुळे शहराचा फार मोठा मोठा सहभाग नसतो. जेव्हा अशा मोठ्या नेत्यांचे पक्षप्रवेश पक्ष करत असतो तेव्हा पार्टीने त्यांच्या हिताचा काहीतरी निर्णय घेतलेला असतो, त्यांचा विचार केला असेल, पार्टीने या संदर्भात काहीतरी बेरजेचे राजकारण केलेले असेल, याबाबत माझी आणि बापूंची चर्चा झालेली आहे.

पालकमंत्र्यांची चर्चा झाली आहे. प्रदेशाध्यक्षांशी चर्चा झालेली आहे. प्रदेशाध्यक्षांनी बापूंशी चर्चा करून या बाबतीमध्ये ते नक्की निर्णय घेतील, असं सांगितलं आहे. कार्यकर्त्यांनी आता जे निवेदन दिलेले आहे, ते पक्षात येणाऱ्या नेत्यांच्या विरोधात आहे. त्यांच्या भावना प्रदेशाध्यक्ष, मुख्यमंत्री आणि पालकमंत्र्यांपर्यंत पोहोचवण्याचं काम मी नक्की करेन आणि सर्व कार्यकर्त्यांच्या ज्या भावना आहेत त्याचा पालकमंत्री प्रदेशाध्यक्ष आणि मुख्यमंत्री विचार करून निर्णय घेतील, असा मला विश्वास आहे असंही भाजप शहराध्यक्ष रोहिणी तडवळकर यांनी म्हटलं आहे. पुढे त्यांनी आलेल्या निवेदनाबाबत माहिती देताना सांगितलं की यामध्ये कोणत्याही आमदाराचे नाव आलेलं नाही. कार्यकर्त्यांच्या भावना कोणत्या आमदाराबाबत आहेत किंवा कोणत्या आमदाराला त्यांचा विरोध आहे, त्या संदर्भात प्रदेशाध्यक्ष त्यांच्याशी चर्चा करून निर्णय घेतील, असंही पुढे त्यांनी म्हटलं आहे.

माजी आमदार बबनदादा शिंदे, यशवंत माने, राजन पाटील यांच्यासह शेकडो कार्यकर्ते भाजपा पक्ष प्रवेश करण्याची शक्यता वर्तविण्यात येत असताना क्रिडा मंत्री दत्तामामा भरणे हे सोलापूर दौऱ्यावर आहेत. नाराज माजी आमदारांचा भाजपा पक्ष प्रवेश रोखण्याचा त्यांचा प्रयत्न आहे.