शुक्रवार, 6 नोव्हेंबर 2026
Chandrapur News: चंद्रपुरात भेसळखोरांवर FDA चा दणका! १० आस्थापनांचे परवाने निलंबित, ५१ दुकानांना सुधारणा नोटीस
Pune Pitbull Attack: सोसायटीत सायकल चालवताना निष्पाप मुलावर जीवघेणा प्रसंग, परिसरात भीतीचे वातावरण
विशेष म्हणजे, भेसळ किंवा अन्नपदार्थांच्या दर्जाबाबत संशय निर्माण झाल्याने तब्बल ३६ लाख रुपये किमतीचा ८ हजार ९८८ किलो अन्नपदार्थांचा साठा जप्त करण्यात आला आहे. जप्त केलेल्या साठ्यामध्ये खाद्यतेल, खवा, मिरची पावडर, हळद पावडर, धने पावडर, विविध मसाले, गूळ, शेंगदाणे आणि चहा पावडर आदी अन्नपदार्थांचा समावेश आहे. सणासुदीच्या काळात नागरिकांकडून मिठाई, फराळाचे साहित्य, खाद्यतेल आणि मसाल्यांची मोठ्या प्रमाणात खरेदी केली जाते. या संधीचा फायदा घेऊन काही व्यावसायिकांकडून निकृष्ट दर्जाचे किंवा भेसळयुक्त पदार्थ विकले जाण्याची शक्यता लक्षात घेता प्रशासनाने तपासणी मोहीम तीव्र केली आहे. (फोटो सौजन्य – AI Created)
१ एप्रिल ते ३१ ऑक्टोबर २०२६ या सात महिन्यांच्या कालावधीत जिल्ह्यातील विविध अन्न आस्थापनांमधून ३१६ अन्ननमुने घेऊन विश्लेषणासाठी पाठविण्यात आले. त्यापैकी २१० नमुने प्रमाणित घोषित झाले आहेत, तर ९६ नमुन्यांचे अहवाल अद्याप प्रलंबित आहेत. तीन नमुने कमी दर्जाचे, पाच नमुने मिध्याछाप, तर दोन नमुने असुरक्षित असल्याचे निष्पन्न झाले आहे. यापैकी आठ प्रकरणांमध्ये न्यायनिर्णयासाठी सहआयुक्त, नागपूर यांच्याकडे खटले दाखल करण्यात आले असून उर्वरित प्रकरणांत पुढील कार्यवाही सुरू आहे. या सात महिन्यांत जिल्ह्यातील २४३ अन्न आस्थापनांची तपासणी करण्यात आली.
नियमांचे उल्लंघन आणि स्वच्छतेतील त्रुटी आढळल्याने १३५ आस्थापनांना सुधारणा नोटीस बजावण्यात आल्या. दहा आस्थापनांचे परवाने निलंबित करण्यात आले, तर २९ आस्थापनांविरुद्ध दंडात्मक कारवाई करून दोन लाख २० हजार रुपयांचा दंड वसूल करण्यात आला.
अन्न व्यावसायिकांनी अन्न सुरक्षा व मानके कायदा २००६ तसेच नियम व नियमन २०११ मधील तरतुदीचे काटेकोर पालन करूनच व्यवसाय करावा, नियमांचे उल्लंघन करणाऱ्यांविरुद्ध कठोर कारवाई करण्यात येईल, निर्भळ आणि सुरक्षित अन्न मिळणे हा प्रत्येक नागरिकाचा अधिकार असून अन्नपदार्थांमध्ये भेसळ करणाऱ्याऱ्यांची गय केली जाणार नाही.- प्रवीण उमप, सहाय्यक आयुक्त, अन्न व औषध
