Rabi season water schedule 2026 : शेतकऱ्यांसाठी मोठा दिलासा ! रब्बीला दोन, उन्हाळ्यात एक आवर्तन

Rabi season water schedule 2026 : छत्रपती संभाजीनगर येथील नांदूर मधमेश्वर प्रकल्पाच्या लाभक्षेत्रातील शेतकऱ्यांसाठी रब्बी हंगामात दोन आणि उन्हाळी हंगामात एक, अशी तीन पाणी आवर्तने देण्याचे नियोजन करण्यात आले.शेतकऱ्यांच्या प्रत्यक्ष गरजेनुसार एक टीएमसीपेक्षा अधिक पाणी देण्याबाबत सकारात्मक भूमिका घेण्यात आली.

• आवर्तन सुमारे दोन टीएमसीपर्यंत वाढविण्याची मागणी   
• पुढील हंगामातील गरजांचा फेरआढावा घेण्यात येईल   
• रब्बी हंगामातील पहिले आवर्तन २० नोव्हेंबरला 

Rabi season water schedule 2026 :  छत्रपती संभाजीनगर येथील नांदूर मधमेश्वर प्रकल्पाच्या लाभक्षेत्रातील शेतकऱ्यांना रब्बी हंगामात दोन आणि उन्हाळी हंगामात एक, अशी तीन आवर्तने देण्याचे नियोजन करण्यात आले आहे. पहिल्या आवर्तनात प्रत्यक्ष गरजेनुसार वाढीव पाणी उपलब्ध करून देण्यात येईल. तसेच जानेवारीमध्ये उपलब्ध पाणीसाठ्याचा फेरआढावा घेऊन अतिरिक्त आवर्तनाबाबत निर्णय घेण्यात येईल, अशी माहिती जलसंपदामंत्री राधाकृष्ण विखे पाटील यांनी सोमवारी दिली. विभागीय आयुक्त कार्यालयात सोमवारी मंत्री विखे पाटील यांच्या अध्यक्षतेखाली नांदूर मधमेश्वर प्रकल्पाच्या कालवा सल्लागार समितीची बैठक झाली.

आवर्तन सुमारे दोन टीएमसीपर्यंत वाढविण्याची मागणी

बैठकीला खा. संदिपान भुमरे, आ. प्रशांत बंब, आ. रमेश बोरनारे, आ. विठ्ठलराव लंघे पाटील, आ. प्रतापसिंह पाटील, आ. अंबादास दानवे, झेडपी अध्यक्ष अविनाश गलांडे, तसेच विभागीय आयुक्त जी. श्रीकांत, जिल्हाधिकारी विनय गौडा जी. सी., झेडपी सीईओ मिन्नू पी. एम., गोदावरी मराठवाडा पाटबंधारे विकास महामंडळाचे कार्यकारी संचालक जयंत गवळी, जलसंपदा विभागाचे अधीक्षक अभियंता राजेंद्र धोडपकर यांच्यासह संबंधित विभागांचे अधिकारी उपस्थित होते. दुष्काळी परिस्थितीच्या पार्श्वभूमीवर पहिल्या आवर्तनासाठी प्रस्तावित एक टीएमसी पाणी अपुरे पडू शकते, त्यामुळे शेतकऱ्यांची सिंचनाची गरज लक्षात घेऊन हे आवर्तन सुमारे दोन टीएमसीपर्यंत वाढविण्याची मागणी लोकप्रतिनिधींनी केली.

त्यावर डॉ. विखे पाटील यांनी सकारात्मक भूमिका घेत प्रत्यक्ष आवश्यकता आणि उपलब्ध पाणीसाठा विचारात घेऊन वाढीव पाणी देण्याचे नियोजन करण्याचे निर्देश अधिकाऱ्यांना दिले.

बाळापूर तालुक्यात पाणीप्रश्न बिकट; तलावांनी गाठला तळ, नळाला पाणी येत नसल्याने…

पुढील हंगामातील गरजांचा फेरआढावा घेण्यात येईल

पहिल्या आवर्तनानंतर जानेवारीमध्ये उपलब्ध पाणीसाठा, प्रत्यक्ष सिंचनासाठी झालेला वापर आणि पुढील हंगामातील गरजांचा फेरआढावा घेण्यात येईल. त्यानुसार अतिरिक्त पाणी किंवा आणखी एक आवर्तन देण्याबाबत निर्णय घेता येईल, असे डॉ. विखे पाटील यांनी स्पष्ट केले.
पिण्याच्या पाण्याच्या गरजेला बाधा न आणता शेतीसाठी पाण्याचे नियोजन करावे. दुष्काळी परिस्थितीत उपलब्ध पाण्याचा काटकसरीने व कार्यक्षमतेने वापर करून लाभक्षेत्रातील शेतकऱ्यांना अधिकाधिक लाभ मिळेल, यासाठी संबंधित अधिकाऱ्यांनी योग्य नियोजन करावे, अशा सूचनाही त्यांनी दिल्या.

रब्बी हंगामातील पहिले आवर्तन २० नोव्हेंबरला

बैठकीत जलसंपदा विभागाच्या अधिकाऱ्यांनी प्रकल्पातील पाण्याची उपलब्धता, विविध धरणांतील साठा, मंजूर आरक्षण आणि प्रस्तावित आवर्तनांचे सादरीकरण केले. त्यानुसार रब्बी हंगामातील पहिले आवर्तन २० नोव्हेंबर ते ५ डिसेंबर २०२६ या कालावधीत एक टीएमसी, तर दुसरे आवर्तन १९ फेब्रुवारी ते १२ मार्च २०२७ या कालावधीत १.३५५ टीएमसी पाण्याचे प्रस्तावित आहे. उन्हाळी हंगामासाठी २० एप्रिल ते १ मे २०२७ या कालावधीत एक आवर्तन प्रस्तावित करण्यात आले आहे.

अमरावतीत श्री संत शिरोमणी रूपलालजी महाराजांचे भव्य राष्ट्रीय स्मारक उभारणार: मुख्यमंत्री फडणवीस