रविवार, 15 नोव्हेंबर 2026
Sambhajinagar Municipal Corporation Revenue (Photo Credit - X)
मनपा आयुक्त जी. श्रीकांत यांच्या मार्गदर्शनाखाली सुरुवातीपासूनच कराच्या वसूलीकडे विशेष लक्ष देण्यात आले. वर्षभरात उत्पन्न वाढीसाठी विविध उपाययोजना राबविल्या. मालमत्ता कर वसुलीसाठी मैत्र कक्ष सुरू केला. वसूली कर्मचाऱ्यांना टॅब देऊन त्यांच्यावर वसूलीची जबाबदारी सोपवली. झोन कार्यालयातील वसूली अधिकाऱ्यांना घरोघरी पाठवून कर वसूली केली. मालमत्ता कर विभागाचे उपायुक्त विकास नवाळे यांनी नागरिकांना घरबसल्या मालमत्ता कर भरण्यासाठी ऑनलाईन सुविधा उपलब्ध करून दिली.
महापालिकेच्या मालमत्ता विभागानेही यावर्षी वसूलीचा विक्रम केला. शहरातील ४८८ गाळ्याचे भाडे, हॉलचे भाडे आणि लीजवर दिलेल्या पडिक जमीनीच्या भाडेपोटी १३.१० कोटी वसूल झाले. मालमत्ता विभागाच्या उपायुक्त अपर्णा थेटे आणि सहायक आयुक्त संजय चामले यांनी यावर्षी मालमत्ताच्या गाळ्यांचे भाडे कराराचे नुतनीकरण करून रेडीरेकनर दराने भाडे आकारणी केली. त्याचा सर्वाधिक फायदा झाला. मागील वर्षी मालमत्ता विभागाला ११ कोटी रुपयाचे उत्पन्न झाले होते. यावर्षी १३.१० कोटीचे उत्पन्न झाले आहे.
महापालिकेला सर्वाधिक उत्पन्न देणाऱ्या नगररचना विभागाने यावर्षी विक्रमी वसूली करीत २०१ कोटी रुपये उत्पन्न मिळाले, नगररचना उपसंचालक मनोज गर्गे यांच्या मार्गदर्शनाखाली आणि उपनगर रचनाकार कौस्तुभ भावे यांच्यासह उपअभियंता यांनी गुंठेवारी विभागाच्या संचिकांना मान्यता दिली. वर्षभरात गुंठेवारीच्या ९३०० संचिका मंजूर केल्यामुळे त्यातून ७७ कोटी रुपये मिळाले. गुंठेवारीसाठी दर कमी करण्यात आले. त्याचा सर्वसामान्य नागरिकांना फायदा झाला आहे. त्यामुळेच मनपाच्या तिजोरीत ७७ कोटी रुपये जमा झाले. त्यासोबतच यावर्षी १३१४ बांधकाम परवानगी देण्यात आल्या आहेत. रजिष्ट्री केली जाणार नसल्याचा नियम लागू झाल्यामुळे भोगवटा प्रमाणपत्र घेण्यासाठी बांधकाम व्यवसायिकांनी राहिलेली रक्कम जमा केली. त्यामुळे मनपाला १२४ कोटी रुपयांचे उत्पन्न मिळाले.
