निवडणूक प्रक्रियेवर जनतेचा विश्वास डळमळीत; वाढते गैरप्रकार अन् निर्णयांमुळे नाराजीची लाट

नुकत्याच झालेल्या नगरपरिषद व नगर पंचायत मतदान प्रक्रियेदरम्यान जिल्ह्यासह राज्यभर अनेक ठिकाणी घडलेल्या गैरप्रकारांमुळे निवडणूक व्यवस्थेवर नागरिकांचा विश्वास मोठ्या प्रमाणात ढासळला आहे.

• निवडणूक प्रक्रियेवर जनतेचा विश्वास डळमळीत
• वाढते गैरप्रकार अन् निर्णयांमुळे नाराजीची लाट
• आगामी निवडणुकांबाबत चिंता

यवत : नुकत्याच झालेल्या नगरपरिषद व नगर पंचायत मतदान प्रक्रियेदरम्यान जिल्ह्यासह राज्यभर अनेक ठिकाणी घडलेल्या गैरप्रकारांमुळे निवडणूक व्यवस्थेवर नागरिकांचा विश्वास मोठ्या प्रमाणात ढासळला आहे. लोकशाही मूल्यांना काळिमा फासणारे प्रकार उघड होत असल्याने सामान्य मतदार, कार्यकर्ते तसेच राजकीय क्षेत्रात प्रचंड असंतोष व्यक्त केला जात आहे. मतदानादरम्यान बोगस मतदान, बोगस मतदार याद्या, मतदारांवर दबाव, दहशत, मारहाण, गुंडगिरी, पैसेवाटप अशी गंभीर प्रकरणे मोठ्या प्रमाणात उघडकीस आली आहेत. प्रसारमाध्यमांमधून या घटना जनतेसमोर आल्याने कार्यकर्त्यांपासून सामान्यजनांपर्यंत सर्वांमध्ये भीती आणि अविश्वासाचे वातावरण निर्माण झाले आहे.

या निवडणुकीत प्रथमच एवढ्या मोठ्या प्रमाणात गैरव्यवहार झाल्याचे दिसून येत असून, विशेष बाब म्हणजे सत्ताधारी गटाकडूनच असे प्रकार मोठ्या प्रमाणात केल्याचे आरोप होत आहेत. त्यामुळे या प्रकरणांची दखल घेतली जाईल का? असा प्रश्न जनतेसमोर उभा राहिला आहे.

निकाल जाहीर करण्यात विलंब

३ डिसेंबर रोजी निकाल जाहीर होणार असल्याची अधिकृत घोषणा असूनदेखील, अचानक निकाल जाहीर करणे थांबवून आता ते २१ डिसेंबरला घोषित केले जातील, अशी माहिती देण्यात आली. या अचानक घेतलेल्या निर्णयामुळे कार्यकर्त्यांमध्ये आणि नागरिकांमध्ये संताप उसळला आहे.. निवडणूक आयोग आणि न्यायालयाचे निर्णय वारंवार बदलत असल्याने उमेदवार, त्यांचे पॅनलप्रमुख, पक्षनेते तसेच मतदार या सर्वांमध्ये प्रचंड संभ्रम निर्माण झाला आहे.

यापूर्वीही जिल्हा परिषद, महानगरपालिका आणि सहकार क्षेत्रातील निवडणुका दीर्घ काळ लांबल्या होत्या. सरकारने वेळेत निवडणुका न घेण्याची जबाबदारी टाळल्याचा आरोपही होत आहे. अखेर निवडणुका झाल्या तरी निकाल रोखून ठेवण्यात आल्याने प्रश्न चिघळला आहे.

आगामी निवडणुकांबाबत चिंता

आता पुढे जिल्हा परिषद आणि महानगरपालिका निवडणुका होणार आहेत. मात्र सद्यस्थिती पाहता या निवडणुका पारदर्शक, प्रामाणिक आणि दहशतीविना होतील का? असा गंभीर सवाल जनतेतून उपस्थित केला जात आहे.

जबाबदारी कोणाावर?

मतदानादिवशी घडलेले प्रकार माध्यमांमधून स्पष्टपणे समोर आले आहेत. निवडणूक आयोग, प्रशासन, पोलिस विभाग, राजकीय पक्ष तसेच शासन यंत्रणा या सर्वांनीच या घटनांकडे पुरेसं गांभीर्याने पाहिले नसल्याचे स्पष्ट झाले आहे. हे सर्व प्रकार लोकशाही प्रक्रियेला मोठा धक्का देणारे असून “ही लोकशाही की अराजकशाही?” असा सवाल नागरिकांमधून ऐकू येत आहे. निवडणूक ही लोकशाहीची पायरी आहे. पण जर त्याच प्रक्रियेवर जनतेचा विश्वास उडू लागला तर लोकशाहीचे अस्तित्वच धोक्यात येईल, अशी चिंता तज्ज्ञांकडून व्यक्त केली जात आहे.