मंगळवार, 25 ऑगस्ट 2026
पुणे जिल्ह्यात भेसळयुक्त, अवमानक अन्नसाठ्यांवर कारवाईचा बडगा(फोटो- सोशल मिडिया)
पुणे : पुणे जिल्ह्यात अन्न व औषध प्रशासनाने विविध ठिकाणी केलेल्या तपासण्यांमध्ये अवमानक आणि असुरक्षित अन्नपदार्थांचा साठा, लेबलिंगमधील त्रुटी तसेच परवान्याविना अन्न व्यवसाय सुरू असल्याचे प्रकार समोर आले आहेत. इंदापूर येथील दूध प्रकल्पातील ३३७० लिटर संशयित अवमानक गायीचे दूध, मार्केट यार्डातील मोठ्या प्रमाणातील चणा, खारीक, मोहरी, जवस आणि जिऱ्याचा साठा जप्त करून त्यांच्यावर कायदेशीर कारवाई सुरू करण्यात आली आहे. तर वारजे येथील मोरया मिसळचा अन्न परवाना निलंबित करण्यात आला आहे.
अन्न व औषध प्रशासनाने २१ ते २३ ऑगस्टदरम्यान जिल्ह्यातील विविध अन्न व्यवसायांची तपासणी केली. इंदापूर तालुक्यातील मौली मिल्क अँड ॲग्रो प्रॉडक्ट्स येथे गायीच्या दुधाच्या दोन टाक्यांची तपासणी करण्यात आली. त्यामध्ये ३३७० लिटर दूध, सुमारे १ लाख ३१ हजार ५६० रुपये किमतीचे, आढळले. दुधाची आम्लता तपासणी सकारात्मक आल्याने ते अवमानक असल्याचा संशय व्यक्त करण्यात आला असून, संबंधित साठ्यावर कारवाई करण्यात आली आहे.
दरम्यान, वारजे येथील मोरया मिसळच्या तपासणीत खाद्यपदार्थांमध्ये कृत्रिम रंगाचा वापर आणि मुदतबाह्य खाद्यपदार्थांचा साठा आढळून आला. त्यामुळे संबंधित आस्थापनाचा अन्न परवाना निलंबित करण्यात आला.
मार्केटयार्डात मोठ्या साठ्यांची तपासणी
मार्केटयार्डातील धनश्री सेल्स येथे १० हजार २०० किलो चणा आणि ३३ हजार ६०० किलो खारीक आढळून आली. या खाद्यपदार्थांच्या लेबलिंगमध्ये त्रुटी आढळल्याने ते अवमानक किंवा असुरक्षित असल्याचा संशय आहे. त्याच परिसरातील लेकसिटी या आस्थापनाकडे ८१५८ किलो मोहरी, ५६३८ किलो जवस आणि ३१९६ किलो जिरे आढळले. मात्र, संबंधित आस्थापना आवश्यक परवान्याविना व्यवसाय करत असल्याचे तपासणीत स्पष्ट झाले. याशिवाय, विक्रेता व वाहतूकदाराकडील ३९८५.४ किलो सैल हरभऱ्यात बाह्य पदार्थ आढळल्याने त्यावरही कारवाई करण्यात आली.
खेड तालुक्यातील महालक्ष्मी महिला गृहउद्योग संस्थेकडे आढळलेल्या ७७८ किलो व्हाईट वाटाण्याचा साठाही अवमानक असल्याचा संशय आढळला आहे. या सर्व प्रकरणांमध्ये अन्न सुरक्षा व मानके अधिनियम आणि संबंधित नियमांनुसार पुढील कायदेशीर कार्यवाही सुरू आहे. नागरिकांना सुरक्षित व गुणवत्तापूर्ण अन्न उपलब्ध व्हावे यासाठी जिल्ह्यातील दूध संकलन केंद्रे, प्रक्रिया केंद्रे, खाद्यपदार्थ विक्रेते आणि अन्य अन्न व्यवसायांची तपासणी सुरूच राहणार असल्याचे अन्न व औषध प्रशासनाने स्पष्ट केले आहे.
