अहिल्यानगर / गिरीश रासकर : मराठी भाषा केवळ संवाद साधण्याचे साधन नसून महाराष्ट्राच्या संस्कृतीचे, सामाजिक, ऐतिहासिक जीवनाचा एक भाग समाजाला जातो. याच वैभवसंपन्न भाषेला अभिजात दर्जा मिळविण्यासाठी अनेक वर्ष वाट पहावी लागली. अखेर केंद्र सरकारने २०२४ साली मराठी भाषेला अभिजात दर्जा बहाल करत गौरव केला. याच मराठी भाषेविषयी माहिती व मराठी भाषेची महती सांगणारे ‘अभिजात मराठी राजभाषा गौरव गीता’चे अनावरण राज्याचे उपमुख्यमंत्री अजित पवार यांच्या हस्ते संपन्न झाले.
मराठी भाषा महाराष्ट्राचा अभिमान स्वाभिमान आहे. मराठीला अभिजात भाषेचा दर्जा मिळावा यासाठी मराठी माणसं, प्रादेशिक राजकीय पक्ष यांची एकजूट पाहायला मिळाली होती. याचपार्श्वभूमीवर आता राज्याचे उपमुख्यमंत्री अजित पवार यांनी अभिजात मराठी राजभाषा गौरव गीता’चे अनावरण केले आहे. या गीताचे गायन अंजली गायकवाड, नंदिनी गायकवाड आणि अंगद गायकवाड यांनी केलेले आहे.
गायकवाड भगिनी या ‘सारेगमप लिटिल चॅम्प, संगीत सम्राट, तसेच लखनौ मधील क्लासिकल वाॅईस या स्पर्धेच्या विजेत्या आहेत. अंजली गायकवाडला शाहू मोडक पुरस्कार, संगीत सम्राट पुरस्कार मिळालेले आहेत. या गीताला गेल्या पंचवीस वर्षापासून संगीताचे शिक्षण देणारे अंगद गायकवाड यांनी संगीत दिलेले आहे. शुद्ध कल्याण हा मुख्य राग या गाण्यामध्ये वापरलेला आहे. याबरोबरच मिश्र मारु बिहाग, मिश्र भूप, मिश्र यमन, भटियार, शंकरा, हंसध्वनी, ललित, मारवा, पूरिया धनश्री या रागांचा वापर या गीतामध्ये करण्यात आलेला आहे. या गाण्याचे गीतकार डॉ महेश दळे हे आहेत. मराठी भाषेतील कंदर्प वृत्तामध्ये या गाण्याचे बोल लिहिलेले आहेत.
मराठी भाषेला अभिजात भाषेचा दर्जा प्राप्त झालेला आहे. या भाषेविषयी आपल्यापैकी प्रत्येकालाच वाटणारी तळमळ व तिच्या विषयीचा अभिमान गीतकाराने शब्दबद्ध केला आहे. या शब्दांना पूर्णपणे न्याय देईल, असेच संगीत संगीतकार अंगद गायकवाड यांनी दिलेले आहे. गीतकार व संगीतकारांच्या कौशल्यांवर शोभून दिसणारा मुकुट म्हणजेच गायकवाड भगिनी व त्यांचे गुरु व पिता अंगद गायकवाड यांचे सुमधुर गायन हे होय. ‘सत्ययुग योगायुर्वेदम’ या यूट्यूब चॅनल वर हे गीत उपलब्ध करण्यात आलेले आहे. तसेच सर्व ऑडिओ प्लॅटफॉर्मवर सुद्धा हे गीत उपलब्ध करून देण्यात आलेले आहे.
.png "Videos"){kind=small}
